នយោបាយសេដ្ឋកិច្ចរបស់លោកស្ហ៊ីនហ្សូអាបេកំពុងផ្តល់ផ្លែផ្កា
ចុះផ្សាយនៅថ្ងៃ៖
នៅថ្ងៃចន្ទនេះ រដ្ឋាភិបាលជប៉ុនទើបតែនឹងបញ្ចេញតួលេខមួយថ្មីទៀត ដែលបង្ហាញថា សេដ្ឋកិច្ចជប៉ុន កាលពីក្នុងចន្លោះខែមករា ដល់ខែមីនា ដើមឆ្នាំនេះ តាមពិតទៅ មិនមែនកើនឡើងត្រឹម ៣,៥% ដូចតួលេខដែលបង្ហាញ កាលពីលើកមុននោះទេ ប៉ុន្តែ កើនឡើងលើសពីនេះទៅទៀត គឺកើនឡើងរហូតដល់ទៅ ៤,១% បើគិតជាអត្រាកំណើនប្រចាំឆ្នាំ។ តួលេខនេះប្រាកដជានឹងធ្វើឲ្យលោកស្ហ៊ីនហ្សូ អាបេ កាន់តែអាចទទួលបាននូវការគាំទ្រខ្លាំងឡើងថែមទៀត ចំពោះនយោបាយសេដ្ឋកិច្ចរបស់លោក ដែលពេលនេះ ត្រូវបានផ្តល់រហស្សនាមថា « Abenomics»។
នៅក្នុងពេលដែលសេដ្ឋកិច្ចនៅប្រទេសជាច្រើន ជាពិសេស នៅអឺរ៉ុប កំពុងតែស្ថិតក្នុងភាពត្រដាបត្រដួស ដោយសារតែវិបត្តិបំណុល ជប៉ុនវិញ ដែលជាប្រទេសមានបំណុលសាធារណៈដ៏ច្រើនសន្ធឹកសន្ធាប់ និងជួបនឹងវិបត្តិសេដ្ឋកិច្ចតាំងពីប្រមាណជា២០ឆ្នាំមកហើយនោះ ស្រាប់តែកំពុងតែមានកំណើនសេដ្ឋកិច្ចខ្ពស់ធ្វើឲ្យគេមានការភ្ញាក់ផ្អើល។
សំណួរ-តើលោកស្ហ៊ីនហ្សូ អាបេ បានដាក់ចេញនូវនយោបាយសេដ្ឋកិច្ចអ្វីខ្លះ ទើបធ្វើឲ្យសេដ្ឋកិច្ចជប៉ុនចាប់ផ្តើមមានកំណើនខ្ពស់បែបនេះ?
នយោបាយសេដ្ឋកិច្ច ដែលជប៉ុន បានដាក់ចេញកន្លងទៅនេះ មានពីរធំៗ គឺនយោបាយរូបិយវត្ថុ ដាក់ចេញដោយធនាគារកណ្តាល និងនយោបាយសារពើពន្ធ ដាក់ចេញដោយលោកស្ហ៊ីនហ្សូ អាបេ។
បង្កើនការចំណាយសាធារណៈ
រដ្ឋាភិបាលរបស់លោកស្ហ៊ីនហ្សូ អាបេ បានបង្កើនការចំណាយយ៉ាងច្រើនសន្ធឹកសន្ធាប់ ជាពិសេស ការចំណាយ ខាងផ្នែកសាធារណការ (ការសាងសង់ ជួសជុល ថែទាំ រចនាសម្ព័ន្ធ)។ គោលដៅ គឺបង្កើនការចំណាយ ដើម្បីបង្កើនតម្រូវការទីផ្សារក្នុងស្រុក។
បោះពុម្ពលុយ
ក្នុងពេលជាមួយគ្នា ធនាគារកណ្តាលជប៉ុនបានដាក់ចេញ នូវនយោបាយ ដែលគេតែងតែនិយាយជាទូទៅថា “ជាការបោះពុម្ពលុយ”។ តាមការពិតវាមិនមែនជាការបោះពុម្ពក្រដាសលុយទេ ដោយសារតែសម័យកាលបច្ចុប្បន្ននេះ មិនមែនទាល់តែជាក្រដាសប្រាក់ទើបអាចជាលុយដែលគេយកទៅចាយបាននោះទេ។ នៅក្នុងសម័យកាលនេះ លុយភាគច្រើនធ្វើចរាចរតាមប្រព័ន្ធអេឡិចត្រូនិក។
ដូច្នេះ វិធានការសំខាន់របស់ធនាគារកណ្តាលជប៉ុន គឺការបង្កើនសាច់ប្រាក់ឲ្យចរាចរ នៅក្នុងទីផ្សារ តាមរយៈការបញ្ចេញលុយមកទិញមូលបត្របំណុលរដ្ឋ ឬទិញមូលបត្ររបស់ឯកជន។ ធនាគារកណ្តាលជប៉ុន គ្រោងបង្កើនបរិមាណសាច់ប្រាក់ឲ្យចរាចរនៅក្នុងទីផ្សារឲ្យបាន ១ទ្វេជា២ ក្នុងរយៈពេល ២ឆ្នាំខាងមុខនេះ ហើយគោលដៅចុងក្រោយ បង្កើនអត្រាអតិផរណាប្រចាំឆ្នាំឲ្យបានដល់ ២%។
សំណួរ-តើការបង្កើនសាច់ប្រាក់នៅក្នុងទីផ្សារ និងការបង្កើនការចំណាយរបស់រដ្ឋនេះ មានអានុភាពអ្វី នៅក្នុងការជំរុញឲ្យសេដ្ឋកិច្ចជប៉ុនមានកំណើនបាន?
ទៅតាមទ្រឹស្តីម៉ាក្រូសេដ្ឋកិច្ច នៅពេលដែលសាច់ប្រាក់ ដែលចរាចរនៅក្នុងទីផ្សារមានការកើនឡើង ឥទ្ធិពលសំខាន់ទី១ គឺអត្រាការប្រាក់ធ្លាក់ចុះ ហើយចរន្តឥណទានក្នុងវិស័យឯកជនក៏មានការងាយស្រួលជាងមុន។ នៅពេលដែលអត្រាការប្រាក់ទាប ហើយលុយក៏ងាយស្រួលខ្ចី វាជំរុញឲ្យក្រុមហ៊ុនសហគ្រាស និងបុគ្គលឯកជន នាំគ្នាខ្ចីលុយពីធនាគារ ដើម្បីយកមកធ្វើការវិនិយោគ ពង្រីកកិច្ចការរកស៊ី ឬក៏ (ចំពោះបុគ្គលឯកជន) បង្កើនការចំណាយ ទិញទំនិញប្រើប្រាស់ទូទៅធម្មតា។ ការចំណាយទូទៅរបស់ឯកជនមានការកើនឡើង (បើទោះជាការចំណាយដើម្បីទិញទំនិញប្រើប្រាស់ទូទៅធម្មតា ឬក៏ចំណាយក្នុងការវិនិយោគក៏ដោយ) វាធ្វើឲ្យតម្រូវការទីផ្សារក្នុងស្រុកមានការកើនឡើង ហើយសកម្មភាពសេដ្ឋកិច្ច (សកម្មភាពផលិត ឬសកម្មភាពផ្តល់សេវាកម្ម) មានការកើនឡើង។
ចំពោះការបង្កើនការចំណាយរបស់រដ្ឋក៏មានឥទ្ធិពលប្រហាក់ប្រហែលគ្នានេះដែរ។ រដ្ឋបង្កើនការចំណាយ គឺមានន័យថា រដ្ឋយកលុយទៅទិញទំនិញឬសេវាកម្ម ឬក៏បង្កើនប្រាក់ខែដល់មន្រ្តីសាធារណៈ។ ដូច្នេះ លុយដែលរដ្ឋចំណាយ វានាំទៅបង្កើនប្រាក់ចំណូលដល់ក្រុមហ៊ុនសហគ្រាស ឬបុគ្គលឯកជន។ នៅពេលដែលចំណូលកើនឡើង ក្រុមហ៊ុនសហគ្រាស ឬក៏បុគ្គលឯកជនអស់ទាំងនេះក៏អាចចាប់ផ្តើមមានទំនុកចិត្តលើសេដ្ឋកិច្ច ហើយនាំគ្នាបង្កើនការចំណាយរបស់ខ្លួនជាបន្តទៅទៀត។ ជាលទ្ធផល ការចំណាយទូទៅកើនឡើង តម្រូវការទីផ្សារក្នុងស្រុកកើនឡើង សកម្មភាពសេដ្ឋកិច្ចកើនឡើង ហើយផលិតផលក្នុងស្រុកសរុបកើនឡើង។
សំណួរ- ជប៉ុនកំពុងតែមានជាប់បំណុលសាធារណៈយ៉ាងច្រើនសន្ធឹកសន្ធាប់ស្រាប់ បើចេះតែខ្ចីលុយគេមកបង្កើនការចំណាយបែបនេះ តើវាអាចនឹងបង្កទៅជាវិបត្តិបំណុល ដូចជា នៅក្នុងតំបន់ចាយលុយអឺរ៉ូដែរឬទេ?
នេះគឺជាសំណួរដែលចោទតាំងពីមុនពេលលោកស្ហ៊ីនហ្សូ អាបេ ដាក់ចេញនយោបាយសេដ្ឋកិច្ចរបស់លោក ហើយនៅតែមានអ្នកខ្លះបន្តចោទសួរ រហូតមកទល់នឹងពេលនេះ។
នៅក្នុងពេលបច្ចុប្បន្ននេះ បំណុលរដ្ឋរបស់ជប៉ុនមានរហូតដល់ទៅ ២៣០% នៃផលិតផលក្នុងស្រុកសរុប ដែលជាអត្រាបំណុលសាធារណៈខ្ពស់បំផុត នៅក្នុងចំណោមប្រទេសដែលមានឧស្សាហកម្មជឿនលឿនផ្សេងទៀត។
តាមពិតបំណុលសាធារណៈរបស់ជប៉ុន មានអត្រាខ្ពស់ជាងប្រទេសខ្លះ ដែលកំពុងជួបនឹងវិបត្តិបំណុល នៅក្នុងតំបន់ចាយលុយអឺរ៉ូទៅទៀត។ ក៏ប៉ុន្តែ រហូតមកទល់នឹងពេលនេះ ជប៉ុនមិនធ្លាក់ក្នុងវិបត្តិបំណុល ដូចនៅអឺរ៉ុប ដោយសារតែបំណុលភាគច្រើន ជាបំណុលដែលរដ្ឋជប៉ុនជំពាក់ប្រជាជនជប៉ុនខ្លួនឯង។ ជាទូទៅ គេសង្កេតឃើញថា ប្រជាពលរដ្ឋជប៉ុនឲ្យលុយរដ្ឋខ្ចី ក្នុងស្មារតីស្រឡាញ់ជាតិ ជាជាងស្មារតីស្វែងរកផលចំណេញ ពីការយកការប្រាក់ខ្ពស់។ ម្យ៉ាងទៀត រដ្ឋាភិបាលជប៉ុនអាចខ្ចីលុយពីធនាគារកណ្តាលខ្លួនឯង ដើម្បីមកចំណាយ ដែលខុសពីនៅក្នុងតំបន់ចាយលុយអឺរ៉ូ ដែលធនាគារកណ្តាលមិនមានសិទ្ធិផ្តល់ប្រាក់កម្ចីឲ្យរដ្ឋជាសមាជិក។
មានអ្នកជំនាញសេដ្ឋកិច្ចខ្លះ យល់ថា នយោបាយដែលលោកស្ហ៊ីនហ្សូ អាបេ ដាក់ចេញពេលនេះ អាចធ្វើឲ្យអត្រាការប្រាក់បំណុលរដ្ឋជប៉ុនមានការកើនឡើង ហើយបរិមាណបំណុលសាធារណៈនឹងបន្តកើនឡើងកាន់តែខ្ពស់។
លោកស្ហ៊ីនហ្សូ អាបេ តែងតែពន្យល់បកមកវិញថា បរិមាណបំណុលសាធារណៈរបស់ជប៉ុនមានច្រើនសន្ធឹកសន្ធាប់មែន ក៏ប៉ុន្តែ បើសិនជាជប៉ុនបន្តទុកឲ្យសេដ្ឋកិច្ច គ្មានកំណើនដូចពេលកន្លងទៅនេះ ក៏មិនមែនជាដំណោះស្រាយ ក្នុងការកាត់បន្ថយបំណុលនេះដែរ ពីព្រោះថា បើសិនជាគ្មានកំណើនសេដ្ឋកិច្ច សកម្មភាពសេដ្ឋកិច្ចធ្លាក់ចុះ ចំណូលរដ្ឋ ជាពិសេស ចំណូលពីការប្រមូលពន្ធក៏ត្រូវធ្លាក់ចុះ រដ្ឋក៏គ្មានលុយមកកាត់បន្ថយបំណុលរបស់ខ្លួនបានដែរ។ ជប៉ុនត្រូវការចាំបាច់នូវកំណើនសេដ្ឋកិច្ច ទើបអាចកាត់បន្ថយបំណុលរបស់ខ្លួនបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ