កូរ៉េខាងត្បូង-ជប៉ុន -

អត្ថបទចុះផ្សាយនៅថ្ងៃ សុក្រ 10 សីហា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 10 សីហា 2012

ប្រមុខដឹកនាំនៃទីក្រុងសេអ៊ូលទៅបំពេញទស្សនកិច្ចនៅកោះដុកដូ

ប្រធានាធិបតីកូរ៉េខាងត្បូង លោក លី ម្ញុងបាក ទៅបំពេញទស្សនកិច្ចនៅថ្ងៃសុក្រទី១០សីហាឆ្នាំ២០១២នៅកោះដុកដូជាភាសាកូរ៉េ ឬ កោះតាកេស្ហ៊ីម៉ាជាភាសាជប៉ុន

REUTERS/Korea Pool/Yonhap

ដោយ សៀក សារិន

ប្រធានាធិបតីកូរ៉េខាងត្បូង លោកលី ម្ញុងបាកត្រូវអញ្ជើញទៅបំពេញទស្សនកិច្ចនៅថ្ងៃសុក្រនៅកោះដុកដូដែលជាតំបន់ដែនដីឈ្លោះដណ្តើមចង់បានដោយប្រទេសជប៉ុននិងប្រទេសកូរ៉េខាងត្បូង។ ដំណើរទស្សនកិច្ចរបស់លោកប្រធានាធិបតីកូរ៉េខាងត្បូងនេះ នឹងក្លាយជាកត្តាមកជួយដុតបញ្ឆេះភ្លើងសង្គ្រាមផ្លូវទូតរវាងទីក្រុងតូក្យូនិងទីក្រុងសេអ៊ូល។

សេចក្តីរាយការណ៍របស់សៀក សារិន

ស្តាប់ (01:55)

10/08/2012 by សៀក សារិន

ដំណើរទស្សនកិច្ចរបស់លោកប្រធានាធិបតីកូរ៉េខាងត្បូង លី ម្ញុងបាក នៅលើកោះដុកដូជាភាសាកូរ៉េ ឬ កោះតាកេស្ហ៊ីម៉ាជាភាសាជប៉ុន ដែលឋិតនៅក្នុងសមុទ្រជប៉ុន គឺពិតជាដំណើរទស្សនកិច្ចលើកទីមួយពុំដែលកើតមាន។

ទាំងនេះបានបណ្តាលឲ្យលោករដ្ឋមន្ត្រីក្រសួងកាបរទេសជប៉ុនថ្លែងថា “ដំណើរទស្សនកិច្ចរបស់ប្រមុខដឹកនាំកូរ៉េខាងត្បូងនៅលើកោះនោះ នឹងជះផលវិបាកអវិជ្ជមានដល់ទំនាក់ទំនងជប៉ុន-កូរ៉េខាងត្បូង ហើយទីក្រុងតូក្យូនឹងធ្វើការឆ្លើយតបតវិញយ៉ាងមុតមាំ”។

ចំណែកឯអ្នកនាំពាក្យរបស់លោកប្រធានាធិបតីកូរ៉េខាងត្បូងបានថ្លែងប្រាប់ថា “បើយោងតាមកម្មវិធី លោក លី ម្ញុងបាក ត្រូវអញ្ជើញទៅបំពេញទស្សនកិច្ចនៅលើកោះកូរ៉េខាងត្បូងឈ្មោះ Ulleung ហើយអាចជិះឧទ្ធម្ភាគចក្រទៅកាន់កោះដុកដូ បើប្រសិនជាមានអាកាសធាតុល្អ។

គួរកត់សម្គាល់ថា ប្រទេសកូរ៉េខាងត្បូងនិងប្រទេសជប៉ុនបានឈ្លោះដណ្តើមចង់បាន កោះដុកដូជាភាសាកូរ៉េ ឬ កោះតាកេសស្ហ៊ីម៉ាជាភាសាជប៉ុន អស់រយៈរាប់ទសវត្សរ៍មកហើយ។ ទីក្រុងសេអ៊ូលបានយកទាហានទៅដាក់យាមល្បាតតាំងពីឆ្នាំ១៩៥៤ម្ល៉េះ។

លោកប្រធានាធិបតីកូរ៉េខាងត្បូង លី ម្ញុងបាក អញ្ជើញទៅកោះដុកដូនេះធ្លាក់ចំពេលតែប៉ុន្មានថ្ងៃប៉ុណ្ណោះនឹងឈានដល់ថ្ងៃទី១៥សីហា ដែលជាថ្ងៃខួបទទួលស្គាល់ការចុះចាញ់សង្គ្រាមលោកលើកទីពីរដោយប្រទេសជប៉ុន។ ហើយក៏ជាថ្ងៃដែលប្រទេសជប៉ុនត្រូវបិទបញ្ចប់ការគ្រប់គ្រងអាណានិគមនិយមរបស់ខ្លួនទៅលើប្រទេសកូរ៉េអស់រយៈកាល៣៥ឆ្នាំ។

ចំពោះដំណើរទស្សនកិច្ចរបស់លោកប្រធានាធិបតីកូរ៉េខាងត្បូង លី ម្ញុងបាក ដែលត្រូវធ្វើនៅកោះដុកដូ ភាគីជប៉ុនបានថ្លែងបញ្ជាក់ថា “ទាំងនេះពិតជាការមួយដ៏គូរឲ្យសោកស្តាយខ្លាំងណាស់ ហើយម្យ៉ាងទៀតវាធ្លាក់ចំពេលដែលទីក្រុងតូក្យូកំពុងរិះរកទិសដៅថ្មីមួយសម្រាប់ទំនាក់ទំនងជាមួយទីក្រុងសេអ៊ូល”។

ចំណែកឯប្រទេសកូរ៉េខាងត្បូងវិញបានប្រកាសឲ្យដឹងថា គេនឹងរៀបចំឲ្យមានសមយុទ្ធមួយនៅជិតកោះទាំងនោះនៅរវាងពាក់កណ្តាលខែសីហា ដោយមាននាវាចម្បាំងប្រមាណ១០គ្រឿងចូលរួម ហើយនិងមានសព្វាវុធដទៃទៀត៕