កិច្ចព្រមព្រៀងយោធាលើកទីមួយបង្អស់រវាងជប៉ុន និងកូរ៉េខាងត្បូង
ជប៉ុននិងកូរ៉េខាងត្បូងត្រៀមនឹងចុះហត្ថលេខាលើកិច្ចព្រមព្រៀងយោធាមួយនាពេលឆាប់ៗខាងមុខ។ នេះជាលើកទីមួយហើយ ដែលប្រទេសជិតខាងទាំងពីរនឹងធ្វើកិច្ចសហប្រតិបត្តិការយោធារវាងគ្នា។ ព័ត៌មានស្តីពីកិច្ចសហប្រតិបត្តិការយោធានេះបានធ្លាក់មកដល់ ជួនចំពេលមួយ ដែលកូរ៉េខាងជើងបាននិងកំពុងបន្តគំរាមកំហែងទៅលើកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០១:២៣
កិច្ចព្រមព្រៀងនេះប្រហែលជានឹងត្រូវចុះហត្ថលេខានាពេលឆាប់ៗខាងមុខ យ៉ាងយូរនៅដំណាច់ខែឧសភា។ នេះបើយោងទៅតាមអ្នកនាំពាក្យនៃក្រសួងការពារជាតិកូរ៉េខាងត្បូង។ ប្រភពដដែលអះអាងថា ស្របទៅតាមកិច្ចព្រមព្រៀងនេះ កូរ៉េខាងត្បូងនិងជប៉ុន នឹងចែករំលែកគ្នានូវព័ត៌មានសម្ងាត់ស្តីពីកម្មវិធីនុយក្លេអ៊ែរនិងកម្មវិធីកាំជ្រួចមីស្ស៊ីលរបស់កូរ៉េខាងជើង។ ភាគីទាំងពីរក៏នឹងប្រហែលជាត្រូវធ្វើកិច្ចសហប្រតិបត្តិការរវាងគ្នាដែរ នៅលើវិស័យសង្គ្រោះក្នុងផ្ទៃសមុទ្រ និងនៅលើវិស័យរក្សាសន្តិភាពនៅក្រៅប្រទេស។
នេះជាលើកទីមួយហើយដែលជប៉ុននិងកូរ៉េខាងត្បូងបានធ្វើកិច្ចចរចាយោធារវាងគ្នា។ ទោះជាភាគីទាំងពីរអះអាងថា កិច្ចចរចាបានផ្តើមឡើងតាំងពីឆ្នាំទៅមិញមកម្ល៉េះក៏ដោយ ក៏ព័ត៌មាននេះធ្លាក់មកដល់ជួនចំពេលមួយដែលតំបន់អាស៊ីបូព៌ាកំពុងឋិតក្នុងភាពតានតឹងខ្លាំង។ កាលពីខែមុន កូរ៉េខាងជើងបានទទួលបរាជ័យក្នុងការបាញ់សាកល្បងគ្រាប់rocket ហើយក្រោយមកបានប្រាប់ឱ្យដឹងថាខ្លួនកំពុងត្រៀមសាកល្បងជាលើកទីបីអាវុធនុយក្លេអ៊ែរនាពេលឆាប់ៗខាងមុខនេះ។ លើសពីនេះទៅទៀត របបកុម្មុយនិស្តព្យុងយ៉ាងក៏ថែមទាំងបានគំរាមដែរថា ខ្លួនអាចកំទេចកូរ៉េខាងត្បូងឱ្យទៅជាផេះ តែប៉ុន្មាននាទីប៉ុណ្ណោះ។
យ៉ាងណាក៏ដោយ កិច្ចព្រមព្រៀងយោធានេះរវាងជប៉ុននិងកូរ៉េខាងត្បូងនឹងច្បាស់ជាធ្វើឱ្យកូរ៉េខាងជើងខឹងក្រេវក្រោធ។ វាក៏ច្បាស់ជានឹងមិនធ្វើឱ្យចិនសប្បាយចិត្តដែរទេ ដ្បិតទីក្រុងប៉េកាំងអាចវាយតម្លៃថា ទាំងនេះជាសញ្ញានៃការពង្រីកឥទ្ធិពលរវាងសហរដ្ឋអាមេរិកនិងសម្ព័ន្ធមិត្តរបស់ខ្លួននៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ