ជម្លោះជុំវិញកោះសេនកាគុផ្ទុះឡើងជាថ្មីរវាងជប៉ុន និងចិន
ក្រសួងការបរទេសជប៉ុនបានកោះហៅឯកអគ្គរដ្ឋទូតចិនប្រចាំនៅទីក្រុងតូក្យូ(Tokyo)មកស្តីបន្ទោស។មូលហេតុគឺមកពីនៅព្រឹកថ្ងៃពុធទី១១កក្កដានេះនាវាយាមល្បាតរបស់ចិនចំនួនបីគ្រឿងបានចូលទៅក្នុងដែនទឹករបស់ជប៉ុនក្បែរទីប្រជុំកោះសេនកាគុ(Senkaku)។ មិនមែនជាលើកទីមួយទេដែលប្រទេសជិតខាងទាំងពីរមើលមុខគ្នាមិនចំដោយហេតុតែបញ្ហាទីប្រជុំកោះសេនកាគុ។
ចុះផ្សាយនៅថ្ងៃ៖
ស្តាប់ - ០១:២០
នាវាយាមល្បាតទាំងបីគ្រឿងរបស់ចិន បានចូលមកក្បែរទីប្រជុំកោះសេនកាគុនៅពេលព្រលឹមភ្លឺស្រាងៗ ហើយបាននៅទ្រេលទ្រលក្នុងដែនទឹករបស់ជប៉ុនមួយសន្ទុះធំ មុននិងបានចាកចេញទៅវិញនៅទីបំផុត។ នេះបើយោងទៅតាមប្រភពព័ត៌មានខាងប្រទេសជប៉ុន។
ប៉ុន្មានម៉ោងក្រោយឧប្បត្តិហេតុនេះ ក្រសួងការបរទេសជប៉ុនបានកោះហៅឯកអគ្គរដ្ឋទូតចិនមកស្តីបន្ទោសនិងមកនិយាយប្រាប់ជាថ្មីនិងជាផ្លូវការថា សេនកាគូជាទឹកដីរបស់ជប៉ុន។
យ៉ាងណាក៏ដោយ នាវាយាមល្បាតរបស់ចិនបានចូលមកក្នុងដែនទឹករបស់ជប៉ុន ជួនចំពេលមួយដែលទីក្រុងតូក្យូ បាននិងកំពុងបន្តចរចាជាមួយម្ចាស់កម្មសិទ្ធិឯកជន ជនជាតិជប៉ុនម្នាក់ ដើម្បីទិញកោះតូចៗចំនួនបីនៃទីប្រជុំកោះសេនកាគុ មកធ្វើជាសម្បត្តិរដ្ឋ។ ហើយគម្រោងការទិញកោះតូចៗទាំងបីនេះកំពុងធ្វើឱ្យចិនខឹងសម្បារដ្បិតចិនយល់ឃើញថា ធ្វើបែបនេះ រដ្ឋាភិបាលជប៉ុនចង់បង្កើនការត្រួតពិនិត្យទៅលើកោះសេនកាគុ។
សូមជម្រាបថា ជប៉ុនបានឈ្លានពានយកទីប្រជុំកោះសេនកាគុ ពីចិននៅឆ្នាំ១៨៩៥។ ថ្នាក់ដឹកនាំចិនចេះតែទាមទារចង់បានសេនកាគុមកវិញ។ ក៏ប៉ុន្តែ ជប៉ុនមិនព្រម ហើយគ្មានបំណងចង់ដោះស្រាយបញ្ហានេះទេ ពីព្រោះទីប្រជុំកោះសេនកាគុនេះ អាចមានប្រេងកាត ឧស្ម័នធម្មជាតិ និងជាតំបន់សម្បូរទៅដោយត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ