រដ្ឋាភិបាលបើកការអនុញ្ញាតដំណើរការម៉ាស៊ីនប្រតិកម្មជាថ្មី
ជាងមួយឆ្នាំក្រោយពីគ្រោះមហន្តរាយនៅមជ្ឈមណ្ឌលនុយក្លេអ៊ែរ Fukushima និងទោះបីជាមានការប្រឆាំងខ្លាំងក្លាពីសំណាក់ពលរដ្ឋក្តី រដា្ឋភិបាលជប៉ុន នៅថ្ងៃសៅរ៍១៦មិថុនានេះ បានបើកការអនុញ្ញាត្តឲ្យចាប់ដំណើរការជាថ្មីឡើងវិញម៉ាស៊ីនប្រតិកម្មពីរ នៅតំបន់ អូសាកា ដើម្បីចៀសវាង ការដាច់ភ្លើង នៅក្នុងប្រទេសជប៉ុននារដូវក្តៅដែលមានអាកាសធាតុក្តៅនិងសើម។ ជាសេចក្តីសម្រេចចិត្តមួយនៅក្នុងកាលៈទេសៈពិបាកបន្តិចពីព្រោះកម្រិតប្រជាប្រិយភាពរបស់លោកនាយករដ្ឋមន្ត្រីជប៉ុន Yoshihiko Noda បានស្រុតចុះខ្លាំងមែនទែនបន្ទាប់ពីមហន្តរាយនុយក្លេអ៊ែរនៅ Fukushima កាលពីថ្ងៃ១១មីនា២០១១ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ម៉ាស៊ីនប្រតិកម្មទាំងពីរនៅមជ្ឈមណ្ឌលនុយក្លេអ៊ែរ Ohi ដែលត្រូវចាប់ដំណើរការឡើងវិញនោះ ស្ថិតនៅក្នុងការគ្រប់គ្រងរបស់ក្រុមហ៊ុន Kansai Electric Power Co ដែលធ្វើអាជីវកម្មនៅតំបន់ អូសាកាប៉ែកខាងលិចប្រទេសជប៉ុន។ ការចាប់ដំណើរការម៉ាស៊ីនប្រតិកម្មនេះ នឹងអាចនាំទៅដល់ការចាប់ដំណើរការម៉ាស៊ីននុយក្លេអ៊ែរផ្សេងទៀត ទោះបីជាមានការប្រឆាំងពីសំណាក់ប្រជាជនជប៉ុនក្តី ពាក់ព័ន្ធនឹងបញ្ហាសន្តិសុខរបស់ពួកគេ និងសុវត្ថិភាពនៃម៉ាស៊ីនប្រតិកម្មជប៉ុនផ្សេងទៀត ដែលសរុបមាន ៥០គ្រឿង។
លោក Yukio Edano រដ្ឋមន្ត្រីក្រសួងពាណិជ្ជកម្មនិងថាមពលបានថ្លែងថា “ ពុំមានមធ្យោបាយអស្ចារ្យណាមួយអាចដោះស្រាយបានភ្លាមទេនៅក្នុងវិស័យការពារគ្រោះមហន្តរាយ” ។ ប៉ុន្តែដោយសារយើងធ្លាប់មានបទពិសោធន៍បន្ទាប់ពីគ្រោះថ្នាក់នៅ Fukushima មក ឥឡូវនេះ រដ្ឋាភិបាល បាន ដាក់ចេញនូវវិធានការការពារសុវត្ថិភាពបានល្អប្រសើរជាងមុនហើយ"-នេះជាការអះអាងរបស់លោក Yukio Edano នៅឱកាសសន្និសីទសារព័ត៌មានមួយ បន្ទាប់ពីបានជូនដំណឹងនេះរួចមក។
ការសម្រេចចិត្តរបស់រដ្ឋាភិបាលជប៉ុនក្នុងការផ្តល់សន្ទុះនៅលើវិស័យនុយក្លេអ៊ែរនាពេលនេះ គឺជាជ័យជំនះមួយសំរាប់វិស័យនុយក្លេអ៊ែរជប៉ុន និងក៏សំរាប់ឧស្សាហកម្មទាំងស្រុងនៅក្នុងប្រទេសដែរ ដែលកំពុងតែមានការព្រួយបារម្ភខ្លាំងអំពីការឡើងថ្លៃភ្លើងហួសហេតុ។
គួររំលឹកថា បន្ទាប់ពីគ្រោះមហន្តរាយនៅ Fukushima មកប្រជាជនជប៉ុន នៅតែបន្តបញ្ចេញកំហឹងប្រឆាំងរដ្ឋាភិបាលនិងក្រុមហ៊ុនតិបកូដែលជាអ្នកធ្វើអាជីវកម្មមជ្ឈមណ្ឌលនុយក្លេអ៊ែរFukushima អំពីអសមត្ថភាពក្នុងការគ្រប់គ្រងស្ថានការណ៍ក្រោយពីអគារម៉ាស៊ីននុយក្លេអ៊ែរ បានផ្ទុះឆេះ និងធ្លាយចេញនូវធាតុវិទ្យុសកម្មជាគ្រោះថ្នាក់ដ៏ធំសំរាប់ជីវិតមនុស្ស ។ នៅថ្ងៃសុក្រ ម្សិលមិញនេះ បាតុករ ជប៉ុនជាច្រើនរាប់ពាន់នាក់ បានប្រមូលផ្តុំគ្នា នៅពីមុខការិយាល័យរបស់នាយករដ្ឋមន្ត្រីជប៉ុន ដើម្បីប្រឆាំងនឹងសេចក្តីសម្រេចចិត្តទុកជាមុននេះ--ដោយពួកគេបានស្រែកតវ៉ាយ៉ាងខ្លាំងៗថា “ជីវិតមនុស្ស មានតម្លៃខ្លាំងជាងសេដ្ឋកិច្ច” ។ ពួកបាតុករ-បានចោទទៀតថា” ការបើកភ្លើងខៀវ យ៉ាងប្រញាប់និងប្រកបដោយគ្រោះថ្នាក់របស់លោកនាយករដ្ឋមន្ត្រីណូដាក្នុងការបើកជាថ្មី នៅមជ្ឈមណ្ឌលនុយក្លេអ៊ែរ Ohi គឺធ្វើឡើងដោយគ្មានគិតគូរអំពីមតិយោបល់របស់អ្នកជំនាញការនៅក្នុងវិស័យសន្តិសុខនុយក្លេអ៊ែរនិង អំពីការប្រឆាំងជំទាស់ពីសំណាក់ប្រជាជនរបស់ខ្លួនទេ។
សូមបញ្ជាក់ថា ប្រជាជនជប៉ុនចំនួន ៧ លាន៥សែននាក់ បានចុះហត្ថលេខាលើញត្តិមួយ ដែលទាមទារឲ្យរដ្ឋាភិបាលជប៉ុនបោះបង់ចោលទាំងស្រុងថាមពលនុយក្លេអ៊ែរ-៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ