ជប៉ុនរំលឹកខួបលើកទី ៦៦ នៃការទម្លាក់គ្រាប់បែកបរមាណូនៅហ៊ីរ៉ូស៊ីម៉ា
នៅថ្ងៃទី ៦ សីហា ឆ្នំា ២០១១ នេះ ប្រទេសជប៉ុនបានរៀបចំពិធីរំលឹកខួបលើកទី ៦៦ឆ្នំានៃការទម្លាក់គ្រាប់បែកបរមាណូលើទីក្រុង ហ៊ីរ៉ូស៊ីម៉ាពីសំណាក់សហរដ្ឋអាមេរិក កាលណោះ នៅថ្ងៃទី ៦ សីហា ឆ្នំា ១៩៤៥។ ៣ថ្ងៃក្រោយមក ពោលគឺនៅថ្ងៃទី ៩ សីហា ឆ្នំា ១៩៤៥ ដដែល អាមេរិកបានទម្លាក់មួយគ្រាប់ទៀតលើទីក្រុងណាហ្គាសាគី។ ពិធីរំលឹកខួបឆ្នំានេះត្រូវបានរៀបចំឡើង ៦ខែ ក្រោយពីជប៉ុនបានទទួលរងគ្រោះមហន្តរាយនុយក្លេអ៊ែរនៅ Fukushima។
ចុះផ្សាយនៅថ្ងៃ៖
ស្តាប់ - ០៥:៥៥
ព្រឹត្តិការណ៍កាលពី ៦៦ឆ្នំាមុន ពិតជាព្រឹត្តិការណ៍ប្រវត្តិសាស្រ្តមួយដែលពិភពលោក ពិសេសប្រជាជនជប៉ុនមិនអាចបំភ្លេចបានទេ។ នៅថ្ងៃទី ៦ សីហា ឆ្នំា ១៩៤៥ វេលាម៉ោង ៨ និង១៥នាទី ម៉ោងក្នុងប្រទេសជប៉ុន ទាហានអាមេរិកំាងបានទម្លាក់គ្រាប់បែកបរមាណូលើកទីមួយទៅលើទីក្រុងហ៊ីរ៉ូស៊ីម៉ា កាលណោះបានផ្តាច់ជីវិតជនស៊ីវិលអស់ជាង ១៤ម៉ឺននាក់។ គ្រាប់បែកបរមាណូលើកទីមួយនោះបានផ្ទុះនៅកំពស់ ៦០០ម៉ែត្រ ពីលើទីក្រុងហ៊ីរ៉ូស៊ីម៉ា ហើយកម្លំាងផ្ទុះរបស់វា ស្មើនឹងជាតិផ្ទុះតេអិនតេចំនួន ១ម៉ឺន ៥ពាន់តោន។ ក្រោយពីការទម្លាក់នៅហ៊ីរ៉ូស៊ីម៉ានោះមក រដ្ឋាភិបាលជប៉ុនជំនាន់នោះបន្តបង្អែបង្អង់មិនព្រមបញ្ចេញប្រតិកម្មអ្វីទំាងអស់។ ស្រាប់តែ ៣ថ្ងៃក្រោយមក ពោលគឺនៅថ្ងៃទី ៩ សីហា ឆ្នំា ១៩៤៥ដដែល ទាហានអាមេរិកបានទម្លាក់គ្រាប់បែកបរមាណូមួយគ្រាប់ទៀតទៅលើទីក្រុង ណាហ្គាសាគី កាលណោះបានផ្តាច់ជីវិតប្រជាជនជប៉ុនចំនួន៧ម៉ឺននាក់បន្ថែមទៀត។ គឺទើបតែមួយសប្តាហ៍ បន្ទាប់ពីបានទទួលគ្រាប់បែកបរមាណូលើកទី២នោះទេ ទើបជប៉ុនបានបង្ខំចិត្តសុំចុះចាញ់ ហើយសង្រ្គាមលោកលើកទី២ក៏បានបិទបញ្ចប់តំាងពីពេលនោះ។
ប៉ុន្តែ ៦៦ឆ្នំា ក្រោយមក ព្រឹត្តិការណ៍នៅហ៊ីរ៉ូស៊ីម៉ា និងណាហ្គាសាគីនៅតែបន្តតាមលងអារម្មណ៍របស់ប្រជាជនជប៉ុនបន្តទៀត ព្រោះថា វាបានបន្សល់ទុកនូវជនរងគ្រោះរាប់សិបម៉ឺននាក់ដែលបានទទួលរងធាតុវិទ្យុសកម្ម និងរាប់សិបម៉ឺននាក់ផ្សេងទៀតដែលខ្លួនប្រាណរបស់គេត្រូវបានដុតរោលដោយភ្លើង និងកំដៅគ្រាប់បែកបរមាណូ។ ចំណែកឯទីក្រុងហ៊ីរ៉ូស៊ីម៉ាក៏ត្រូវបានកម្លំាងគ្រាប់បែកបរមាណូបំផ្លាញខ្ទេចខ្ទី និងរាបធេងដូចត្រូវគេឈូសចោល។
ពិភពលោកធ្លាក់ចូលសករាជនុយក្លេអ៊ែរ
តំាងពីអាមេរិកបានប្រើប្រាស់គ្រាប់បែកបរមាណូទំាងពីរគ្រាប់ទម្លាក់លើប្រទេសជប៉ុនក្នុងសម័យសង្រ្គាមលោកលើកទី ២មក បានជម្រុញពិភពលោកឲ្យធ្លាក់ចូលក្នុងសករាជនុយក្លេអ៊ែរ និងបំផុសឲ្យមានការតស៊ូមតិស្តីពីភូមិសាស្រ្តនយោបាយ យោធា និងទស្សនវិជ្ជារហូតមកដល់ពេលបច្ចុប្បន្ន។
សម្រាប់ក្រុមអ្នកសន្តិភាពនិយម មានអ្នកខ្លះយល់ថា ការប្រើប្រាស់គ្រាប់បែកបរមាណូ គឺជារឿងមិនគួរកើតមានទេ។ តែសម្រាប់អ្នកខ្លះទៀតយល់ឃើញថា កុំតែអាមេរិកបានប្រើគ្រាប់បែកបរមាណូទាន់ពេល កុំអីពិភពលោកត្រូវធ្លាក់ក្នុងដៃជប៉ុន ហើយសង្រ្គាមលោកលើកទី ២ ក៏មិនមែនបិទបញ្ចប់នៅឆ្នំា ១៩៤៥ដែរ។ ម្យ៉ាងទៀត គ្រាប់បែកបរមាណូទំាង ២គ្រាប់របស់អាមេរិកមិនត្រឹមតែបានជួយឲ្យសង្រ្គាមលោកឆាប់ចប់ប៉ុណ្ណោះទេ តែថែមទំាងបានជួយស្រោចស្រង់ជីវិតទាហានអាមេរិករាប់សិបពាន់នាក់ ជនស៊ីវិល និងអ្នកទោសដែលស្ថិតលើដែនដីកាន់កាប់ដោយជប៉ុននាពេលនោះទៀតផង។
សម្រាប់ក្រុមអ្នកប្រឆំាងនឹងគ្រាប់បែកបរមាណូវិញ ពួកគេបានមើលឃើញថា ការប្រើប្រាស់គ្រាប់បែកបរមាណូ គឺជាឧក្រិដ្ឋកម្មសង្រ្គាម ពីព្រោះវាបានសម្លាប់តែជនស៊ីវិល។ ពួកគេយល់ឃើញថា គ្មានហេតុផលណាមួយដែលពិភពលោកត្រូវប្រើប្រាស់អាវុធបរមាណូក្នុងការធ្វើសង្រ្គាមទេ។
ជប៉ុនយល់កាន់តែច្បាស់ ពីគ្រោះថ្នាក់នុយក្លេអ៊ែរ
ពិធីរំលឹកខួបលើកទី ៦៦ឆ្នំានៃការទម្លាក់គ្រាប់បែកបរមាណូលើទីក្រុង ហ៊ីរ៉ូស៊ីម៉ាថ្ងៃនេះបានធ្វើឡើង ៦ខែបន្ទាប់ជប៉ុនបានជួបប្រទះនូវគ្រោះមហន្តរាយនុយក្លេអ៊ែរនៅ Fukushima។ គឺជាគ្រោះមហន្តរាយមួយដែលបានកើតឡើង ក្រោយពីមានគ្រោះរញ្ជួយដីក្នុងថ្ងៃទី ១១ មីនា ឆ្នំា ២០១១ ដែលបានផ្តាច់ជីវិតមនុស្សជាង ២ម៉ឺននាក់។
ចម្ងាយរវាងទីក្រុងហ៊ីរ៉ូស៊ីម៉ា និង Fukushima មានប្រមាណ ៨០០ គីឡូម៉ែត្រ។ ប៉ុន្តែសម្រាប់ប្រជាជនជប៉ុនដែលធ្លាប់បានភ្លក់រសជាតិក្នុងព្រឹត្តិការណ៍នៅហ៊ីរ៉ូស៊ីម៉ា និងណាហ្គាសាគីកាលពី ៦៦ឆ្នំាមុន ពិតជាបានគិតពីការលំបាកផ្សេងៗដែលប្រជាជននៅ Fukushima កំពុងជួបប្រទះ ពិសេសគឺការរើសអើងពីអ្នកដទៃ។ សូមជម្រាបជូនថា ពួកអ្នកដែលមានស្លាកស្នាម និងអ្នកជំងឺដោយធាតុវិទ្យុសកម្ម ត្រូវបានប្រជាជនជប៉ុនផ្សេងទៀតមិនរាប់រក និងមិនហ៊ាននៅក្បែរដោយខ្លាចឆ្លង។
បញ្ហាមួយទៀត គឺជម្រើសយកថាមពលនុយក្លេអ៊ែរ។ តំាងពីក្រោយគ្រោះមហន្តរាយនៅ Fukushima មក មានប្រជាជនជប៉ុនភាគច្រើនហាក់ដូចជាបានយល់កាន់តែច្បាស់ អំពីគ្រោះថ្នាក់ដែលបានកើតឡើងពីនុយក្លេអ៊ែរ។ ខណៈនេះ រដ្ឋាភិបាល ក៏ដូចជាប្រជាជនបានផ្តើមពិចារណាឡើងវិញ អំពីការផលិតថាមពលដោយប្រើប្រាស់នុយក្លេអ៊ែរ។ ថ្លែងនៅក្នុងពិធីរំលឹកខួបលើកទី ៦៦ឆ្នំា ថ្ងៃនេះ លោកនាយរដ្ឋមន្រ្តីជប៉ុន ណាអូតូ កានបានបញ្ជាក់ជាថ្មីម្តងទៀតថា ចាប់ពីអំណើះតទៅ រដ្ឋាភិបាលនឹងផ្តើមកាត់បន្ថយការប្រើប្រាស់ថាមពលនុយក្លេអ៊ែរ និងទាញប្រទេសជប៉ុនបន្តិចម្តងៗ ឲ្យចេញផុតពីការពឹងពាក់តែលើថាមពលនុយក្លេអ៊ែរ។ តែពេលនេះ លោក ណាអូតូ កានដែលប្រជាប្រិយភាពកាន់តែធ្លាក់ចុះនោះ នៅមិនទាន់បានកំណត់ពេលវេលា និងយុទ្ធសាស្រ្តច្បាស់លាស់នៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ