ជប៉ុនបង្កើតមូលនិធិពិសេសដើម្បីសងការខូចខាតដល់ជនរងគ្រោះនុយក្លេអ៊ែរហ៊្វូគូស្ហ៊ីម៉ា
នៅថ្ងៃពុធ ៣ សីហា ២០១១នេះ សភាជប៉ុនបានអនុម័តច្បាប់បង្កើតមូលនិធិពិសេសមួយ ដើម្បីសងការខូចខាតដល់ជនរងគ្រោះ ដោយសារគ្រោះមហន្តរាយនុយក្លេអ៊ែរ នៅហ្វ៊ូគូស្ហ៊ីម៉ា។ មូលនិធិពិសេសនេះ គឺជាមូលនិធិរបស់រដ្ឋ ក៏ប៉ុន្តែ ក្រុមហ៊ុនតិបកូ (TEPCO) ដែលជាម្ចាស់ក្រុមហ៊ុននុយក្លេអ៊ែរហ្វ៊ូគូស្ហ៊ីម៉ា ក៏នឹងត្រូវចូលរួមវិភាគទានមួយចំណែកធំដែរ។
ចុះផ្សាយនៅថ្ងៃ៖
ស្តាប់ - ០១:៣៨
ច្បាប់បង្កើតមូលនិធិពិសេសត្រូវបានអនុម័ត ក៏ប៉ុន្តែ ជប៉ុននៅមិនទាន់កំណត់លម្អិតនៅឡើយទេថា តើមូលនិធិនេះបានលុយពីប្រភពណា?
យោងតាមទីភ្នាក់ងារព័ត៌មានជប៉ុនក្យូដូ (Kyodo) មូលនិធិពិសេសនេះនឹងចាប់ផ្តើមដំបូង ជាមួយនឹងទឹកប្រាក់ប្រមាណ ២៦ពាន់លានដុល្លារ ដែលបានមកពីការលក់សញ្ញាប័ណ្ណពិសេសរបស់រដ្ឋ។ ក្រុមហ៊ុនតិបកូ ដែលជាម្ចាស់រោងចក្រនុយក្លេអ៊ែរហ្វ៊ូគូស្ហ៊ីម៉ា ព្រមទាំងក្រុមហ៊ុនអគ្គិសនីនុយក្លេអ៊ែរផ្សេងទៀត ក៏នឹងត្រូវចូលរួមចំណែកជាវិភាគទានប្រចាំឆ្នាំ ក្នុងមូលនិធិពិសេសនេះដែរ។
គួររំឭកឡើងវិញថា ដោយសារគ្រោះមហន្តរាយនុយក្លេអ៊ែរនៅហ្វ៊ូគូស្ហ៊ីម៉ា កាលពីខែមីនាកន្លងទៅនេះ ប្រជាជនប្រមាណ ៨ម៉ឺននាក់ត្រូវជម្លៀសចេញពីផ្ទះសម្បែង។ ក្រៅពីនេះការដាំដំណាំ ការចិញ្ចឹមសត្វ ការនេសាទ និងវិស័យទេសចរណ៍ ក៏ទទួលរងនូវការខូចខាតយ៉ាងខ្លាំងដែរ។
រដ្ឋាភិបាលជប៉ុន និងក្រុមហ៊ុនតិបកូ បានទទួលរងនូវការរិះគន់យ៉ាងខ្លាំង ចំពោះភាពយឺតយ៉ាវក្នុងការសងការខូចខាតដល់ជនរងគ្រោះ។ នៅថ្ងៃពុធនេះ កសិករប្រមាណ ៣០០នាក់បាននាំគ្នាធ្វើបាតុកម្ម នៅមុខទីស្នាក់ការក្រុមហ៊ុនតិបកូ ដើម្បីទាមទារសំណង។
អ្នកជំនាញសេដ្ឋកិច្ចជប៉ុនខ្លះយល់ថា ការណ៍ដែលរដ្ឋាភិបាលចាប់ផ្តើមបញ្ចេញលុយទៅសងជនរងគ្រោះនុយក្លេអ៊ែរ គឺជាដំណឹងល្អមួយ មិនត្រឹមតែសម្រាប់ជនរងគ្រោះប៉ុណ្ណោះទេ ប៉ុន្តែ ក៏ជាដំណឹងល្អសម្រាប់សេដ្ឋកិច្ចជប៉ុនផងដែរ ព្រោះថា លុយទាំងនេះនឹងត្រូវហូរចូលក្នុងសេដ្ឋកិច្ចជប៉ុន។
ក៏ប៉ុន្តែ សំណួរដែលចោទ គឺនៅត្រង់ថា តើលុយទាំងនេះមានប្រភពមកពីណា? ការពឹងផ្អែកខ្លាំងពេកលើការលក់សញ្ញាប័ណ្ណរដ្ឋមិនមែនជាមធ្យោបាយល្អប៉ុន្មានទេ ពីព្រោះ វានឹងធ្វើឲ្យបំណុលសាធារណៈរបស់ជប៉ុន ដែលកំពុងតែមានទំហំធំធេងស្រាប់ កាន់តែកើនឡើងថែមទៀត។ ប្រសិនបើយកវិភាគទានច្រើនពេកពីក្រុមហ៊ុនអគ្គិសនី វាអាចនឹងធ្វើឲ្យតម្លៃអគ្គិសនីកើនឡើង ហើយវាត្រឡប់ទៅជាបន្ទុកដល់មុខចំណាយរបស់ប្រជាពលរដ្ឋជប៉ុនទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ