ព្យុះកំណាច ហាយយ៉ានបានងាកចេញពីកម្ពុជាហើយ
ជាដំណឹងល្អសម្រាប់កម្ពុជា។ ព្យុះទីហ្វុងហាយយ៉ាន់ដែលបានបំផ្លាញភាគកណ្តាលនៃប្រទេសហ្វីលីពីននោះ នឹងផ្លាស់ប្តូរទិសឆ្ពោះទៅទីក្រុងហាណូយ បន្ទាប់ពីវាមកដល់ភាគកណ្តាលនៃតំបន់ឆ្នេររបស់ប្រទេសវៀតណាម នៅយប់ថ្ងៃទី១០វិច្ឆិកានេះ។ នេះបើតាមការអះអាងរបស់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម។ ទោះយ៉ាងណាក៏ដោយ លោករដ្ឋមន្ត្រីបញ្ជាក់ថា ឥទ្ធិពលនៃខ្យល់ព្យុះនេះ ក៏នឹងធ្វើអោយមានភ្លៀងធ្លាក់ខ្លះនៅតំបន់ខ្ពង់រាបរបស់កម្ពុជាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ព្យុះកំណាចហាយយ៉ាន់ដែលបានបង្កវិនាសកម្មយ៉ាងធ្ងន់ធ្ងរ នៅភាគកណ្តាលនៃប្រទេសហ្វីលីពីន ហើយដែលត្រូវកម្ពុជាព្យាករណ៍ថា វានឹងជះឥទ្ធិពលនៅតំបន់ខ្ពង់រាបនៃប្រទេសកម្ពុជានោះ នឹងប្តូរទិសដៅងាកចេញពីកម្ពុជាវិញ នៅយប់ថ្ងៃអាទិត្យនេះ នៅពេលវាធ្វើដំណើរមកដល់តំបន់ឆ្នេរនៃប្រទេសវៀតណាម។
រដ្ឋមន្ត្រីក្រសួងធនធានទឹក និងឧតុនិយម លោកលឹម គានហោបានថ្លែងប្រាប់វិទ្យុបារាំងអន្តរជាតិនៅថ្ងៃនេះថា នៅពេលដែលព្យុះហាយយ៉ានមកដល់តំបន់ឆ្នេរភាគកណ្តាលនៃប្រទេសវៀតណាមនោះ ព្យុះនេះនឹងងាកទិសដៅទៅភាគខាងជើង ដោយអូសតាមតំបន់ឆ្នេរក្នុងប្រទេសវៀតណាម ឆ្ពោះទៅទីក្រុងហាណួយ និងបញ្ចប់ទៅក្នុងទីក្រុងគុនមីង ខេត្តយូណានប្រទេសចិន។ ក្នុងន័យនេះ បើតាមការបញ្ជាក់របស់លោករដ្ឋមន្ត្រីក្រសួងធនធានទឹក និងឧតុនិយម កម្ពុជានឹងរួចផុតកាន់តែឆ្ងាយពីព្យុះហាយយ៉ាននេះ។ ទោះយ៉ាងណាក៏ដោយ លោករដ្ឋមន្ត្រីប្រាប់អោយដឹងថា វាក៏អាចមានភ្លៀងធ្លាក់ខ្លះនៅតំបន់ខ្ពង់រាបរបស់កម្ពុជាដែរ។
គួររម្លឹកថា នៅថ្ងៃទី៨វិច្ឆិកា ក្រសួងធនធានទឹកបានជូនដំណឹងអំពីឥទ្ធិពលនៃព្យុះកំណាច ហាយយ៉ានដែលជាប្រភេទ« Super Typhoon» ដែលនឹងធ្វើដំណើរបុកចំភាគកណ្តាលនៃប្រទេសវៀតណាមនៅយប់ថ្ងៃទី១០ វិច្ឆិកានេះ ដោយនឹងបង្កអោយមានភ្លៀង និងខ្យល់កន្ត្រាក់នៅតំបន់ខ្ពង់រាបរបស់កម្ពុជា ដូចជាក្នុងខេត្តព្រះវិហារ ស្ទឹងត្រែង បន្ទាយមានជ័យ មណ្ឌលគិរី រតនៈគិរី និងខេត្តក្រចេះ។
ព្យុះហាយយ៉ានគឺជាព្យុះទី៣០ដែលជះឥទ្ធិពលមកដល់កម្ពុជា។ ជារៀងរាល់ឆ្នាំ កម្ពុជាត្រូវរងឥទ្ធិពលខ្យល់ព្យុះដែលកើតចេញពីមហាសមុទ្រប៉ាស៊ីហ្វិក និងសមុទ្រចិនខាងត្បូងចំនួន២៧ ជាមធ្យម។
ព្យុះហាយយ៉ាន់បានបង្កវិនាសកម្មយ៉ាន់ធ្ងន់ធ្ងរនៅក្នុងខេត្តភាគកណ្តាលនៃប្រទេសហ្វីលីពីន។ អាជ្ញាធរនៃប្រទេសហ្វីលីពីនបាននិយាយនៅថ្ងៃអាទិត្យនេះថា មានមនុស្ស១ម៉ឺននាក់ត្រូវបានគេជឿថា បានស្លាប់ដោយព្យុះហាយយ៉ាននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ