កាសែតNew York Times គាំទ្រអោយមានការជក់កញ្ឆាស្របច្បាប់ ទូទាំងសហរដ្ឋអាមេរិក
កាសែតប្រចាំថ្ងៃអាមេរិក New York Times បានចុះផ្សាយនៅចុងសប្តាហ៍នេះ សុំអោយអាជ្ញាធរសហព័ន្ធអាមេរិក ព្រមអនុញ្ញាតអោយការជក់កញ្ឆា ក្លាយជាសកម្មភាពស្របច្បាប់ នៅគ្រប់រដ្ឋទូទាំងសហរដ្ឋអាមេរិក។ កាសែតញូវយកថែមស៍ ថែមទាំងប្រៀបធៀបការហាមឃាត់ការជក់កញ្ឆា ទៅនឹងការហាមឃាត់ការសេពគ្រឿងស្រវឹងនៅអាមេរិក ចន្លោះពីឆ្នាំ១៩២០ ទៅឆ្នាំ១៩៣៣ ទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
សមាជិកនានានៃគណៈកម្មាធិការនិពន្ធរបស់កាសែតប្រចាំថ្ងៃអាមេរិក ញូវយកថែមស៍ បានជជែកគ្នាច្រើនលើកមកហើយ ទាក់ទងនឹងប្រធានបទកញ្ឆា។ ក្នុងការចុះផ្សាយ នៅថ្ងៃសៅរ៍ចុងសប្តាហ៍នេះ កាសែតញូវយកថែមស៍ បានលើកឡើងថា ការញៀនពឹងផ្អែកលើកញ្ឆា គ្រាន់តែជាបញ្ហាតូចតាចរបស់អ្នកជក់ប៉ុណ្ណោះ។ ហើយថា ការប្រើប្រាស់កញ្ឆាក្នុងលក្ខណៈសមស្រប ហាក់មិនបានប៉ះពាល់អ្នកដែលមានសុខភាពល្អទេ។
កាសែតអាមេរិកមួយនេះ បានសុំអោយអាជ្ញាធរសហព័ន្ធព្រមអោយមានការប្រើប្រាស់កញ្ឆា នៅគ្រប់ទីកន្លែង ទូទាំងសហរដ្ឋអាមេរិក។ កាសែតញូវយកថែមស៍ ថែមទាំងប្រៀបប្រដូចការជក់កញ្ឆា ទៅនឹងការផឹកស្រា ដែលអាជ្ញាធរបានហាមឃាត់ ចន្លោះពីឆ្នាំ១៩២០ ទៅឆ្នាំ១៩៣៣ទៀតផង។ និយាយអោយចំ មុនអនុញ្ញាតអោយមានការសេពសុរា ក្នុងប្រទេស អាមេរិកបានហាមឃាត់មិនអោយមនុស្សផឹកស្រា រហូតដល់ទៅ១៣ឆ្នាំ។ សម្រាប់កាសែតញូវយកថែមស៍ នេះជាកំហុសឆ្គង ព្រោះថា ថ្វីដ្បិតតែមានការហាមឃាត់ មនុស្សជាច្រើននៅតែបន្តផឹកស្រាដដែល ធ្វើអោយពួកគេជាប់ឈ្មោះជាជនឧក្រិដ្ឋ។ ផ្ទុយទៅវិញ ក្រោយមក អាជ្ញាធរបែរជាចេញច្បាប់អនុញ្ញាតអោយផឹកស្រាទៅវិញ ដូច្នេះ អ្នកផឹកកន្លងមក បានក្លាយខ្លួនជាជនឧក្រិដ្ឋឥតអំពើ។
យោងតាមកាសែតញូវយកថែមស៍ ភ្នាក់ងារ FBI បានចាប់ខ្លួនមនុស្សមានកញ្ឆាក្នុងដៃ ដល់ទៅ៦សែន៥ម៉ឺន៨ពាន់នាក់ ក្នុងឆ្នាំ២០១២ ចំនួននេះ គឺហាក់ដូចជាជ្រុលហួស ច្រើនលើសចំនួនអ្នកជក់គ្រឿងញៀនប្រភេទកូកាអ៊ីន រឺក៏អេរ៉ូអ៊ីន ដែលអាជ្ញាធរបានចាប់ខ្លួនទៅទៀត។ សម្រាប់កាសែតអាមេរិក ការដាក់ទោសបែបនេះ បានធ្វើអោយមានបញ្ហារើសអើងកើតឡើង ពិសេសការរើសអើងលើជនស្បែកខ្មៅតែម្តង។
ទោះយល់ស្របអោយមានការប្រើប្រាស់កញ្ឆានៅគ្រប់រដ្ឋក្នុងស្រុក កាសែតអាមេរិក ញូវយកថែមស៍ ជំទាស់មិនអោយជនអាយុក្រោម២១ឆ្នាំ ទិញកញ្ឆាយកទៅជក់ទេ ចៀសវាងប៉ះពាល់ដល់សុខភាព និងប្រាជ្ញា។
ឆ្នាំ២០១៤នេះ រដ្ឋវ៉ាស៊ីនតោន បានក្លាយជារដ្ឋទី២នៅអាមេរិក បន្ទាប់ពីរដ្ឋកូឡូរ៉ាដូ ដែលអនុញ្ញាតអោយមានការជក់កញ្ឆាក្នុងស្រុក។ ប្រជាជនរដ្ឋវ៉ាស៊ីនតោន បានបោះឆ្នោតប្រជាមតិ សម្រេចបែបនេះ កាលពីឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ