ព្យុះសង្ឃរា Odile បានបង្កមហន្តរាយនៅភាគខាងជើងប្រទេសម៉ិចសិក
ព្យុះសង្ឃរា Odile បានបំផ្លិចបំផ្លាញផ្ទះសម្បែង និងហេដ្ឋារចនាសម្ព័ន្ធអោយខូចខាតយ៉ាងដំណំនៅតំបន់ទេសចរ Los Cabos ភាគពាយ័ព្យប្រទេសម៉ិកសិក។ ប្រជាជនក្នុងតំបន់ និងភ្ញៀវទេសចរបរទេសត្រូវបានជន្លៀសខ្លួនទៅកាន់ទីកន្លែងសុវត្ថិភាព។ ព្រលានយន្តហោះអន្តរជាតិ Los Cabos ត្រូវបានបិទជាបណ្តោះអាសន្ន។ រដ្ឋាភិបាលប្រទេសម៉ិកសិកបានប្រកាសដាក់តំបន់នោះក្នុងភាពអាសន្ន។ កងទ័ពត្រូវបានដាក់ពង្រាយដើម្បីទប់ស្កាត់ការលួចប្លន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
គិតមកដល់ល្ងាចថ្ងៃច័ន្ទនេះ អាជ្ញាធរប្រទេសម៉ិកសិកពុំទាន់បានប្រកាសតុល្យភាពផ្លូវការនៅឡើយទេជុំវិញការបាត់បង់អាយុជីវិតប្រជាជន និងការខូចខាតផ្ទះសម្បែង ក៏ដូចជាហេដ្ឋារចនាសម្ព័ន្ធនៅតំបន់ទេសចរ Los Cabos នៃរដ្ឋ Baja California។ ព្យុះសង្ឃរាOdile បានចាប់ផ្តើមបោកបក់ចាប់តាំងពីល្ងាចថ្ងៃអាទិត្យមកម្ល៉េះ ក្នុងល្បឿន ២៣០ គីឡូម៉ែត្រក្នុងមួយម៉ោង។ ប៉ុន្តែ ព្យុះនេះបានធ្លាក់ដល់ដីកាលពីថ្ងៃច័ន្ទនេះ ក្នុងល្បឿន ១៨៥ គីឡូម៉ែត្រក្នុងមួយម៉ោង។
ផ្ទះប្រជាជនក្រីក្រត្រូវបានបំផ្លិចបំផ្លាញស្ទើរតែទាំងស្រុង។ ចំណែកនៅតាមដងផ្លូវ គេឃើញបង្គោលអគ្គិសនីបានដួលរលំពាសវាលពាសកាល។ ដើមឈើធំៗបានបាក់ធ្លាក់ និងបានបោកបំផ្លាញរថយន្តដែលចតនៅតាមដងផ្លូវ។
បើតាមមជ្ឈមណ្ឌលជាតិព្យុះសង្ឃរារបស់សហរដ្ឋអាមេរិច ភាពគ្រោះថ្នាក់នៃព្យុះសង្ឃរា Odile នេះត្រូវបានគេចាត់ទុកក្នុងកំរិត ៣ លើ ៥ នៃមាត្រដ្ឋាន Saffir-Simpson។ មុនការមកដល់នៃព្យុះកំណាចនេះ អាជ្ញាធរម៉ិកសិកបានជន្លៀសប្រជាជននិងភ្ញៀវទេសចរអោយចេញពីតំបន់ឆ្នេរឆ្ពោះទៅកាន់ទីជំរកសុវត្ថិភាពចំនួន ១៦៤ កន្លែងដែលមានសមត្ថភាពអាចទទួលមនុស្សបានចំនួន ៣ ម៉ឺននាក់។ គិតមកដល់ពេលនេះព្រលានយន្តហោះអន្តរជាតិ Los Cabos ត្រូវបានបិទជាបណ្តោះអាសន្ន។ ជើងហោះហើរក្នុងស្រុក និងក្រៅស្រុកទាំងអស់ត្រូវបានលប់ចោលទាំងស្រុង។កងទ័ពត្រូវបានដាក់ពង្រាយនៅតាមបណ្តាហាង និងផ្សារទំនើបធំៗ ដើម្បីទប់ស្កាត់ការចូលលួចឆក់យកឥវ៉ាន់ពីសំណាក់ប្រជាជនក្រីក្រ។
បច្ចុប្បន្ននេះ ទឹកភ្លៀងដែលអាចមានកំរិតដល់ ៣៥ មីលីម៉ែត្រកំពុងបន្តធ្លាក់នៅតាមតំបន់ដែលទទួលរងការប៉ះពាល់។ ចំណែកទឹករលកនៅតាមឆ្នេរសមុទ្របានបោកបក់រហូតដល់កំពស់ ៤ ម៉ែត្រ។ បើតាមការព្យាករណ៍របស់អ្នកជំនាញឧត្តុនិយមប្រទេសម៉ិកស៊ិកបានអោយដឹងថា ក្នុងរយៈពេលប៉ុន្មានថ្ងៃខាងមុខនេះឥទ្ធិពលរបស់ព្យុះសង្ឃរាOdile អាចបង្កអោយមានមហន្តរាយផ្សេងៗដូចជា ទឹកជំនន់ ការធ្លាក់បាក់ដី និងខ្យល់កំបុតត្បូងជាដើម។ កំពស់ទឹករលកនៅតាមតំបន់ឆ្នេរអាចឡើងដល់កំរិត ១០ ម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ