បញ្ហាសមុទ្រចិនខាងត្បូងមិនមែនជារបៀបវារៈនៃកិច្ចប្រជុំកំពូលអាស៊ានទេ
ក្នុងនាមជាប្រធានអាស៊ាននៅឆ្នាំ២០១២ កម្ពុជានឹងធ្វើជាម្ចាស់ផ្ទះ នៃកិច្ចប្រជុំកំពូលអាស៊ានលើកទី២០ និងកិច្ចប្រជុំថ្នាក់រដ្ឋមន្ត្រីពាក់ព័ន្ធផ្សេងៗទៀត ចាប់ពីថ្ងៃទី៣០ ខែមីនា ដល់ថ្ងៃទី៤ ខែមេសា នៅទីក្រុងភ្នំពេញ។ តាមសេចក្តីប្រកាសរបស់ក្រសួងការបរទេស កាលពីព្រលប់ថ្ងៃទី២៦មីនាម្សិលមិញ គឺមិនមានឡើយ របៀបវារៈ ស្តីពី បញ្ហាជម្លោះនៅសមុទ្រចិនខាងត្បូង រវាងប្រទេសចិន និងបណ្តាប្រទេសសមាជិកអាស៊ាន រួមមាន វៀតណាម ហ្វីលីពីន ម៉ាឡេស៊ី និងប្រ៊ុយណេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៤
សេចក្តីជូនព័ត៌មានរបស់ក្រសួងការបរទេស ចុះថ្ងៃទី២៦ ខែមីនា ឆ្នាំ២០១២ បង្ហាញថា លោកនាយករដ្ឋមន្ត្រី ហ៊ុន សែន នឹងធ្វើជាប្រធាន នៃកិច្ចប្រជុំកំពូលអាស៊ានលើកទី២០។ ក្នុងអំឡុងពេលកិច្ចប្រជុំកំពូលអាស៊ានលើកទី២០ ប្រមុខដឹកនាំអាស៊ានទាំង ១០ ប្រទេស រំពឹងថា នឹងត្រូវអនុម័តលើឯកសារមួយចំនួន។ រួមមាន៖ ទី១-សេចក្ដីថ្លែងការណ៍នៅភ្នំពេញ ស្ដីពីអាស៊ាន៖ សហគមន៍តែមួយ - វាសនាតែមួយ។ ២-សេចក្ដីថ្លែងការណ៍របស់ប្រមុខដឹកនាំប្រទេសអាស៊ាន ស្ដីពី តំបន់អាស៊ាន គ្មានគ្រឿងញៀនឆ្នាំ២០១៥ និងឯកសារទី៣-ឯកសារទស្សនាទានស្ដីពីចលនាសកលនិយមកណ្ដាល។
ជាមួយគ្នានោះ ដើម្បីអបអរសាទរខួបលើកទី៤៥ របស់អាស៊ាន ប្រមុខដឹកនាំប្រទេសអាស៊ានទាំងអស់ នឹងចេញ“សេចក្ដីថ្លែងការណ៍ស្ដីពីខួបលើកទី៤៥ របស់អាស៊ាន ក្រោមប្រធានបទ ដំណើរឆ្ពោះទៅមុខ”។
សេចក្តីប្រកាសបង្ហាញថា ក្នុងកិច្ចប្រជុំថ្នាក់រដ្ឋមន្ត្រីអាស៊ានផ្សេងទៀត នឹងលើកឡើងពីបញ្ហាសិទ្ធិមនុស្ស កិច្ចប្រជុំគណៈកម្មការតំបន់អាស៊ីអាគេ្នយ៍គ្មានអាវុធនុយក្លេអ៊ែរ និងកិច្ចប្រជុំ ក្រុមប្រឹក្សានយោបាយ-សន្តិសុខអាស៊ាន ជាដើម។
ស្របពេលជាមួយគ្នានេះ រដ្ឋមន្ត្រីការបទេសអាស៊ាន នឹងចុះហត្ថលេខាលើឯកសារមួយចំនួន រួមមាន៖ សេចក្ដីប្រកាសអាស៊ានលើពិធីសារ ស្ដីពី សន្ធិសញ្ញាតំបន់អាស៊ីអាគ្នេយ៍ គ្មានអាវុធនុយក្លេអ៊ែរ និងពិធីសារធម្មនុញ្ញអាស៊ាន ស្ដីពីយន្ដការដំណោះស្រាយជម្លោះ។
តាមសេចក្តីប្រកាសផ្លូវការពីរបៀបវារៈនៃកិច្ចប្រជុំកំពូលអាស៊ាន ចាប់ពីថ្ងៃ៣០មីនា ដល់ថ្ងៃ៤មេសា គឺមិនមានរបៀបវារៈស្តីពីជម្លោះនៅសមុទ្រចិនខាងត្បូងទេ។ បញ្ហាជម្លោះសមុទ្រចិនខាងត្បូង រវាងប្រទេសចិន និងបណ្តាប្រទេសសមាជិកអាស៊ាន រួមមាន វៀតណាម ហ្វីលីពីន ម៉ាឡេស៊ី និងប្រ៊ុយណេ ត្រូវបានឯកអគ្គរដ្ឋទូតចិន ប្រចាំកម្ពុជា លោក ផាន ក្វាងសៀ ( Pan Quangxue ) នៅរសៀលថ្ងៃអង្គារនេះ បានប្រកាសក្នុងសន្និសីទកាសែតថា ចិន ប្រកាន់ជំហរដាច់ខាត មិនឲ្យបញ្ហាសមុទ្រចិនខាងត្បូង ក្លាយទៅជាបញ្ហាអន្តរជាតិទេ ហើយចិនប្រឆាំងនឹងប្រទេសខ្លះ ដែលលើកយកបញ្ហាមិនសមស្របពាក់ព័ន្ធទៅនឹងសមុទ្រចិន យកមកធ្វើជាលេស ដើម្បីជ្រៀតចូល ក្នុងបញ្ហាជម្លោះសមុទ្រចិនខាងត្បូង។
ជំហររបស់ឯកអគ្គរដ្ឋទូតចិនដូច្នេះ គឺដូចគ្នានឹងជំហររបស់កម្ពុជា ដែលត្រូវបានប្រមុខការទូតកម្ពុជា លោក ហោ ណាំហុង បានប្រកាសកាលពីថ្ងៃចន្ទម្សិលមិញ។ នោះគឺកម្ពុជា ក៏មិនចង់ឲ្យយកបញ្ហាសមុទ្រចិនខាងត្បូង ធ្វើជាអន្តរជាតិភាវូបនីយកម្មទេ។ ម្យ៉ាងទៀតតាមលោកហោ ណាំហុង ការលើកយកបញ្ហាសមុទ្រចិនខាងត្បូង ធ្វើជាលក្ខណៈអន្តរជាតិ នឹងនាំអោយស្មុគស្មាញ និងមិនឆ្លើយតបនឹងផលប្រយោជន៍ប្រទេសណាមួយទេ។
យ៉ាងណាក៏ដោយ អ្នកការទូត បានលើកឡើងថា បើទោះបីជាមិនមានចែងក្នុងរបៀបវារៈផ្លូវការ ក៏ប៉ុន្តែក្នុងកិច្ចប្រជុំកំពូលអាស៊ានដោយបិទទ្វារ រដ្ឋមន្ត្រីការបរទេស និងប្រមុខរដ្ឋាភិបាល ប្រទេសសមាជិកអាស៊ានទាំង១០ អាចនឹងលើកឡើងពីបញ្ហាជម្លោះរបស់ប្រទេសខ្លួន និងចិន ក្នុងបញ្ហាសមុទ្រចិនខាងត្បូង។ ក៏ប៉ុន្តែប្រហែលជា នឹងមិនមានសេចក្តីសម្រេចផ្លូវការរវាងប្រទេសទាំង១០ ក្នុងសមាគមអាស៊ាន លើបញ្ហាជម្លោះសមុទ្រចិនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ