ប្រធានាធិបតីចិននឹងទៅកម្ពុជានិយាយពីជម្លោះសមុទ្រចិនខាងត្បូង
អ្នកនាំពាក្យក្រសួងការបរទេសចិន បានថ្លែងប្រាប់អ្នកកាសែតកម្ពុជាមួយក្រុម នៅទីក្រុងប៉េកាំងថា ក្នុងដំណើរទស្សនកិច្ចរបស់លោកប្រធានាធិបតីចិន ហូ ចិនតាវ ( Hu Jintao ) មកកាន់ប្រទេសកម្ពុជានៅចុងខែមីនាខាងមុខនេះ គឺប្រមុខរដ្ឋចិន រំពឹងថា ជម្លោះតាមព្រំដែនសមុទ្រ នៅតំបន់ភាគខាងត្បូងប្រទេសចិន ជាមួយប្រទេសសមាជិកអាស៊ាន រួមមាន វៀតណាម ហ្វីលីពីន ម៉ាឡេស៊ី និងប្រ៊ុយណេ នឹងមិនក្លាយជារបៀបវារៈ នៅក្នុងកិច្ចប្រជុំកំពូលអាស៊ាន នៅកម្ពុជា ចាប់ពីថ្ងៃទី៣០មីនា ដល់ថ្ងៃទី៤មេសាឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣២
ក្នុងពិធីស្វាគមន៍ក្រុមអ្នកកាសែតកម្ពុជា ដែលបានបំពេញទស្សនកិច្ច ក្នុងទីក្រុងប៉េកាំង កាលពីព្រលប់ថ្ងៃទី១៩ ខែមីនា ឆ្នាំ២០១២ លោក លូ វីម៉ិន ( Liu Weimin ) អ្នកនាំពាក្យក្រសួងការបរទេសចិន បានលើកឡើងថា ប្រមុខដឹកនាំចិន លោក ហ៊ូចិនតាវ ដែលនឹងបំពេញទស្សនកិច្ចនៅកម្ពុជា ដែល អាចនឹងនាំមកនូវផលប្រយោជន៍យ៉ាងល្អ រវាងប្រទេសទាំងពីរ។ ក្រៅពីជួយរឹតចំណងមិត្តភាពរវាងប្រទេសទាំងពីរ ប្រមុខដឹកនាំចិន និងកម្ពុជា គ្រោងនឹងចុះហត្ថលេខារួមគ្នា លើវិស័យសេដ្ឋកិច្ច និងពាណិជ្ជកម្ម។
តាមកម្មវិធី លោកប្រធានាធិបតីចិន ហ៊ូចិនតាវ នឹងមកកម្ពុជា ចាប់ពីថ្ងៃទី៣០មីនា ដល់ថ្ងៃទី២មេសា ឆ្នាំ២០១២។ រីឯកិច្ចប្រជុំកំពូលអាស៊ាន ដែលកម្ពុជាធ្វើជាប្រធាន នឹងធ្វើឡើងចាប់ពីថ្ងៃទី៣០មីនា ដល់ថ្ងៃទី៤មេសា ឆ្នាំ២០១២។ ក្នុងនោះ កិច្ចប្រជុំរវាងប្រមុខដឹកនាំរដ្ឋាភិបាលទាំង១០ ប្រទេស ធ្វើនៅថ្ងៃទី៣មេសា។
អ្នកនាំពាក្យក្រសួងការបរទេសចិន បញ្ជាក់ប្រាប់អ្នកកាសែតកម្ពុជាថា ប្រទេសចិនគាំទ្រកម្ពុជាក្នុងការធ្វើជាប្រធានអាស៊ាន ក៏ដូចជាការបើកកិច្ចប្រជុំកំពូលអាស៊ានខាងមុខ។
ពាក់ព័ន្ធនឹងជម្លោះសមុទ្រចិនខាងត្បូង ជាមួយប្រទេសសមាជិកអាស៊ាន រួមមាន វៀតណាម ហ្វីលីពីន ម៉ាឡេស៊ី និងប្រ៊ុយណេ ត្រូវបានអ្នកនាំពាក្យក្រសួងការបរទេសចិនជឿថា មេដឹកនាំអាស៊ាន នឹងមិនលើកយក បញ្ហានេះ ទៅពិភាក្សាក្នុងកិច្ចប្រជុំកំពូលអាស៊ានខាងមុខឡើយ។
តាមអ្នកនាំពាក្យ ជម្លោះព្រំដែនសមុទ្រប្រទេសជិតខាងរបស់ចិន ជាទំនាស់ឯកជន និងជានិច្ចកាលគោលនយោបាយរបស់ចិន រក្សាសុខសន្តិភាព និងធ្វើជាមិត្តភក្តិជិតខាងល្អ។ ដូចនេះការទុកឱ្យប្រទេសដែលមានបញ្ហា ពិភាក្សាគ្នា ក្នុងលក្ខណៈការយោគយល់ និងសន្តិវិធី វាជាដំណោះស្រាយមួយល្អបំផុត។
អ្នកនាំពាក្យ បានគូសបញ្ជាក់ថា កម្ពុជាកន្លងមក បានដើរតួនាទីយ៉ាងល្អក្នុងទំនាស់ព្រំដែន នៅសមុទ្រភាគខាងត្បូងចិន ដោយក្នុងនោះ កម្ពុជាបានប្រឆាំង ចំពោះការលើកយកបញ្ហាជម្លោះព្រំដែនរបស់ប្រទេសជិតខាង ជាមួយចិន មកពិភាក្សា ក្នុងកិច្ចប្រជុំអាស៊ាន កាលពីកន្លងមក។
ដើម្បីរៀបចំកិច្ចប្រជុំកំពូលអាស៊ាន ដែលប្រទេសកម្ពុជា ធ្វើជាម្ចាស់ផ្ទះ នាចុងខែមីនានេះ ចិនបានជួយកម្ពុជាលើបញ្ហាបច្ចេកទេស និងសន្តិសុខ។ នេះគេមិនទាន់រាប់ដល់ជំនួយ និងប្រាក់កម្ចីរាប់ពាន់លានដុល្លាររបស់ចិន ដែលបានផ្តល់ឲ្យកម្ពុជាក្នុងមួយឆ្នាំៗឡើយ។
ជុំវិញដំណើរមកកាន់ប្រទេសកម្ពុជារបស់ប្រធានាធិបតីចិន នៅមុនកិច្ចប្រជុំកំពូលអាស៊ាន នៅថ្ងៃនេះ មិនទាន់មានអត្ថាធិប្បាយពីលោក កុយ គួង អ្នកនាំពាក្យក្រសួងការបរទេសកម្ពុជាទេ។ ក៏ប៉ុន្តែ មន្ត្រីជាន់ខ្ពស់រដ្ឋាភិបាល បានលើកឡើងថា លោកប្រធានាធិបតីចិន ហ៊ូចិនតាវ នឹងជួបលោកនាយករដ្ឋមន្ត្រី ហ៊ុន សែន ដើម្បីពន្យល់ប្រាប់ប្រមុខដឹកនាំកម្ពុជា ដែលជាប្រធានអាស៊ាន នៅឆ្នាំ២០១២នេះ អំពីជំហររបស់ចិន នៅក្នុងជម្លោះសមុទ្រចិនខាងត្បូង ខណៈដែលចិនបង្ហាញចេតនារួចហើយថា ចិនមិនចង់ឲ្យអាស៊ានលូកដៃ ក្នុងជម្លោះរវាងចិន និងបណ្តាប្រទេសសមាជិកអាស៊ាន រួមមាន វៀតណាម ហ្វីលីពីន ម៉ាឡេស៊ី និងប្រ៊ុយណេ ក្នុងជម្លោះដណ្តើមដែនកោះ Spratly និង Paracel ដែលបានអូសបន្លាយប្រមាណ ២ ទសវត្សរ៍នោះឡើយ។
យ៉ាងណាក៏ដោយ ជម្លោះដែនកោះនៅសមុទ្រចិនខាងត្បូង គឺជាប្រធានបទ ដែលអង្គការសង្គមស៊ីវិលជាតិ និងអន្តរជាតិ លើកមកពិភាក្សាគ្នាក្នុងសន្និសីទមួយ នៅទីក្រុងភ្នំពេញ នាថ្ងៃទី២២មីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ