សេចក្តីព្រាងក្រមប្រតិបត្តិក្នុងបញ្ហាសមុទ្រខាងត្បូងនឹងត្រូវពិភាក្សានៅកម្ពុជាស្អែកនេះ
ក្រុមការងារនៃឧត្តមមន្ត្រីអាស៊ានបានបញ្ចប់សេចក្តីព្រាងក្រមប្រតិបត្តិនៃបញ្ហាសមុទ្រចិនខាងត្បូងនៅក្នុងកិច្ចប្រជុំលើកទី៧នៅថ្ងៃនេះ។ សេចក្តីព្រាងក្រមប្រតិបត្តិនេះនឹងត្រូវដាក់ក្នុងរបៀបវារៈពិភាក្សារបស់ឧត្តមមន្ត្រីអាស៊ាននៅថ្ងៃព្រហស្បតិ៍ស្អែក។ អាស៊ាន ពិសេសសមាជិកទាំង៤ រួមមាន ហ្វីលីពីន ម៉ាឡេស៊ី វៀតណាម និងប្រ៊ុយណេ ត្រូវរកអោយបានជំហររួមមួយ មុននឹងទៅជជែកជាមួយមហាអំណាចចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ក្រុមការងារត្រូវបញ្ចប់សេចក្តីព្រាងក្រមប្រតិបត្តិក្នុងបញ្ហាសមុទ្រចិនខាងត្បូងនៅថ្ងៃពុធនេះ និងត្រូវដាក់ជូនដើម្បីពិភាក្សាដល់កិច្ចប្រជុំឧត្តមមន្ត្រីអាស៊ាននៅថ្ងៃព្រហស្បតិ៍ស្អែក។
លោក នង សាកល អគ្គនាយករងនៃអគ្គនាយកដ្ឋានអាស៊ានរបស់ក្រសួងការបរទេស បានប្រាប់អ្នកសារព័ត៌មាននៅថ្ងៃពុធនេះថា ក្រុមការងារត្រូវស្វែងរកសមាសធាតុសំខាន់ៗសម្រាប់ការពិភាក្សារបស់ក្រុមឧត្តមមន្ត្រី។ ហើយបញ្ហាដែលចោទខ្លាំងនៅពេលនេះ គឺការប្រើប្រាស់ពាក្យពេចន៍។
បើយោងតាមប្រសាសន៍របស់មន្ត្រីក្រសួងការបរទេសដដែល អាស៊ានពិសេសសមាជិកពាក់ព័ន្ធនឹងជម្លោះនេះត្រូវស្វែងរកជំហររួមសិន មុននឹងទៅជជែកជាមួយប្រទេសចិន។ លោក នង សាកលបានប្រាប់អោយដឹងថាគោលដៅរបស់ក្រមប្រតិបត្តិCode of Conduct គឺការពង្រឹងសហប្រតិបត្តិការ កសាងមិត្តភាព រក្សាស្ថិរភាពក្នុងសមុទ្រចិនខាងត្បូង។
ការបង្កើតក្រមប្រតិបត្តិនេះ ត្រូវបានធ្វើឡើងដោយយោងលើស្មារតីនៃសេចក្តីប្រកាសស្តីបញ្ហាសមុទ្រចិនខាងត្បូងដែលអាស៊ាននិងចិនបានចុះហត្ថលេខាកាលពីឆ្នាំ២០០២។
ចិនបានមានបំណងចង់ដោះស្រាយទ្វេភាគីជាមួយសមាជិកអាស៊ានទាំង៤ដែលមានជម្លោះជាមួយចិនរួមមាន ហ្វីលីពីន វៀតណាម ម៉ាឡេស៊ី និងប្រ៊ុយណេ។ ក្នុងចំណោមប្រទេសទាំង៤នេះ គឺហ្វីលីពីន និងវៀតណាមដែលប្រឈមមុខស្រួចស្រាវជាងគេទល់ជាមួយចិន។
ចុងក្រោយនេះ ហ្វីលីពីន និងចិនបានប្រឈមមុខដាក់គ្នាខ្លាំងគួរអោយព្រួយបារម្ភដោយសារជម្លោះដែនកោះ។ជាជម្លោះដែលជំរុញអោយហ្វីលីពីនស្វែងរកជំនួយពីអាមេរិកទៀតផង។
យោងតាមទីភ្នាក់ងារព័ត៌មានបារាំងAFPភាពតានតឹងបានកើតឡើងសារជាថ្មីទៀតនៅថ្ងៃនេះ រវាងចិននិងហ្វីលីពីន។
សមាជិកអាស៊ានទាំង៤ដែលមានជម្លោះជាមួយចិនកំពុងស្វែងរកការរួមដៃគ្នាដើម្បីជជែកអោយស្មើកំលាំងគ្នាជាមួយចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ