លោកអូបាម៉ា៖អាមេរិកនៅមិនទាន់យុទ្ធសាស្រ្តដើម្បីប្រយុទ្ធនឹងក្រុមជីហាតអ៊ីរ៉ាក់រដ្ឋអ៊ីស្លាម
នៅស៊ីរី និងនៅអ៊ីរ៉ាក់ ក្រុមជីហាតអ៊ីរ៉ាក់ រដ្ឋអ៊ីស្លាមមិនបន្ថយដៃ ក្នុងការប្រព្រឹត្តិអំពើហិង្សា។ ចាប់តាំងពីថ្ងៃពុធ ក្រុមជីហាតអ៊ីរ៉ាក់ដែលបានប្រកាសរដ្ឋអ៊ីស្លាមនៅក្នុងទឹកដីស៊ីរីមួយផ្នែក និងអ៊ីរ៉ាក់ បានបាញ់ប្រហារជីវិតទាហានរដ្ឋាភិបាលស៊ីរី១៦០នាក់ ដែលពួកគេចាប់ខ្លួនបានក្នុងអំឡុងវាយដណ្តើមយកបានខេត្តរ៉ាកា ភាគខាងជើងស៊ីរី។ នៅថ្ងៃព្រហស្បតិ៍ទី ២៨ ទាហានមួកខៀវ៤៣នាក់របស់អង្គការសហប្រជាជាតិត្រូវបានពួកជីហាតមួយក្រុមទៀតដែលជាបណ្តាញអាល់កៃដា ចាប់ខ្លួន នៅតំបន់Golan ក្នុងទឹកដីស៊ីរី ជាប់ព្រំដែនអ៊ីស្រាអែល។ លោកប្រធានាធិបតី បារ៉ាក់ អូបាម៉ា វិញ បានថ្លែងបដិសេធមិនធ្វើប្រតិបត្តិការកងទ័ពអាមេរិកនៅស៊ីរី ដើម្បីប្រយុទ្ធប្រឆាំងនឹងក្រុមជីហាតអ៊ីរ៉ាក់ រដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០១:៥០
នៅចំពោះមុខនៃការកើនឡើងការកាប់សម្លាប់ព្រៃផ្សៃរបស់ក្រុមជីហាតអ៊ីរ៉ាក់រដ្ឋអ៊ីស្លាម លោកប្រធានាធិបតីអាមេរិកបានថ្លែងនៅក្រោយកិច្ចប្រជុំជាមួយទីភ្នាក់ងារសន្តិសុខជាតិកាលពីថ្ងៃព្រហស្បតិ៍ម្សិលមិញថា សេតវិមាននៅមិនទាន់មានយុទ្ធសាស្រ្តយ៉ាងណានៅឡើយទេ។ លោកបានបន្ថែមថា អាមេរិកគ្មានអ្វីដែលត្រូវជ្រើសរើសរវាងរបបលោកស៊ីរីដឹកនាំដោយលោកបាស្ហា អាល់អាសាដ នឹងក្រុមជីហាតអ៊ីរ៉ាក់រដ្ឋអ៊ីស្លាមនោះដែរ។ លោកអូបាម៉ានៅតែបញ្ជាក់ពីបំណងរបស់លោកក្នុងការបន្តគាំទ្រក្រុមប្រឆាំងស៊ីរី ដែលមិនជ្រុលនិយមនៅស៊ីរី។
នៅមួយរយៈចុងក្រោយនេះ ពោលគឺចាប់តាំងពីក្រុមជីហាតអ៊ីរ៉ាក់រដ្ឋអ៊ីស្លាមកើនឡើងទាំងឥទ្ធិពល និងកងទ័ព ប្រកាសបង្កើតរដ្ឋអ៊ីស្លាមនៅក្នុងទឹកដីស៊ីរី និងអ៊ីរ៉ាក់ ហើយនិងការបង្ហាញរូបភាពកាប់សម្លាប់យ៉ាងឃោឃៅទៅលើចំណាប់ខ្មាំង គេរំពឹងថា អាមេរិកនឹងអាចលូកដៃ ធ្វើអន្តរាគមន៍កងទ័ពទៅក្នុងប្រទេសស៊ីរី។ នាយសេនាធិការអាមេរិក លោក Martin Dempsey ធ្លាប់លើកឡើងថា ដើម្បីប្រយុទ្ធប្រឆាំងនឹងក្រុមជីហាតអ៊ីរ៉ាក់ រដ្ឋអ៊ីស្លាមបានសម្រេច គេត្រូវវាយប្រហារជើងអាកាសទៅក្នុងប្រទេសស៊ីរី ដែលអាមេរិកធ្លាប់ធ្វើបានសម្រេចនៅក្នុងទឹកដីអ៊ីរ៉ាក់។ តាមថ្នាក់ដឹកនាំការពារជាតិអាមេរិករូបនេះ ស៊ីរីជាទីតាំងក្បាលម៉ាស៊ីនរបស់ក្រុមជីហាតអ៊ីរ៉ាក់ រដ្ឋអ៊ីស្លាម។
របបលោកអាល់អាសាដក៏បានសំដែងចង់សហការជាមួយអាមេរិក និងសហគមន៍អន្តរជាតិ ដើម្បីប្រយុទ្ធប្រឆាំងនឹងសត្រូវរួម គឺក្រុមជីហាតអ៊ីរ៉ាក់ រដ្ឋអ៊ីស្លាម។ ប៉ុន្តែ ការថ្លែងរបស់លោកអូបាម៉ាថា កាលពីថ្ងៃព្រហស្បតិ៍ថា នឹងមិនធ្វើអន្តរាគមន៍ទ័ពអាកាសនៅស៊ីរី បានបិទបញ្ចប់ការទន្ទឹងរង់ចាំរបស់ទីក្រុងដាម៉ាស។ តាមលោកអូបាម៉ា ប្រធានាធិបតីស៊ីរី ដែលទទួលខុសត្រូវធ្វើឲ្យមនុស្សស្លាប់ជាង១សែននាក់នោះ បានបាត់បង់ភាពស្របច្បាប់ជាអ្នកដឹកនាំ ឬនិយាយបែបម្យ៉ាង គឺគ្មានតម្លៃមកដំឡើងខ្លួន សហការជាមួយអាមេរិកដើម្បីប្រយុទ្ធតបតនឹងក្រុមជីហាតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ