ស៊ីរីត្រៀមខ្លួនសហការកំចាត់ក្រុមជីហាតជាមួយសហគមន៍អន្តរជាតិ
នៅថ្ងៃចន្ទម្សិលមិញ រដ្ឋាភិបាលស៊ីរីបានប្រកាសត្រៀមខ្លួនសហការ ជាមួយសហគមន៍អន្តរជាតិ ដើម្បីកំចាត់ក្រុមជីហាត ដែលកំពុងវាយលុកនៅស៊ីរី និងអ៊ីរ៉ាក់។ អង្គការសហប្រជាជាតិបានចោទក្រុមជីហាតរដ្ឋអ៊ីស្លាម ថាបានរើសអើងសម្លាប់ប្រជាជនភាគតិច និងសហគមន៍សាសនា នៅអ៊ីរ៉ាក់។ ដោយឡែក ក្រុងដាម៉ាសព្រមានថារាល់ប្រតិបត្តិការកំចាត់ក្រុមជីហាតនៅស៊ីរី គ្មានការសហការពីស៊ីរីទេនោះ គឺជាការឈ្លានពានលើស៊ីរី។
ចុះផ្សាយនៅថ្ងៃ៖
ស្តាប់ - ០១:៣៩
ថ្ងៃចន្ទម្សិលមិញ របបដឹកនាំស៊ីរីរបស់ប្រធានាធិបតីអាសាដ បានប្រកាសត្រៀមខ្លួនសហការណ៍ជាមួយសហគមន៍អន្តរជាតិ ដើម្បីកំចាត់ក្រុមជីហាត ក្នុងសកម្មភាពប្រយុទ្ធប្រឆាំងអំពើភេរវកម្ម ស្របតាមសេក្តីសម្រេចលេខ២១៧០របស់ក្រុមប្រឹក្សាសន្តិសុខអង្គការសហប្រជាជាតិ។ ក្រុមជីហាតរដ្ឋអ៊ីស្លាមដែលកំពុងវាយលុកនៅអ៊ីរ៉ាក់ និងស៊ីរីពេលនេះ បានប្រកាសបង្កើតរដ្ឋអ៊ីស្លាមកាលីហ្វា កាលពីចុងខែមិថុនា នៅតាមព្រំដែនអ៊ីរ៉ាក់និងស៊ីរី ក្នុងដែនដីដែលខ្លួនដណ្តើមបានរដ្ឋាភិបាល។
បេសកជនជាន់ខ្ពស់ទទួលបន្ទុកសិទ្ធិមនុស្សអង្គការសហប្រជាជាតិ លោកស្រី ណាវី ពីឡាយ បានលើកឡើងថា ក្រុមជីហាតកំពុងសម្លាប់មនុស្សយ៉ាងព្រៃផ្សៃ រំលោភសិទ្ធិមនុស្ស រៀងរាល់ថ្ងៃនៅអ៊ីរ៉ាក់ ហើយការកាប់សម្លាប់នេះ អាចក្លាយជាបទឧក្រិដ្ឋប្រឆាំងមនុស្សជាតិ។
នៅស៊ីរី ក្រៅពីប្រយុទ្ធនឹងកងទ័ពលោកអាសាដ ក្រុមជីហាតរដ្ឋអ៊ីស្លាមក៏ប្រយុទ្ធជាមួយក្រុមឧទ្ទាមដែលជាគូសត្រូវរបស់រដ្ឋាភិបាលស៊ីរីដែរ។ កាលពីថ្ងៃអាទិត្យ អាកាសយានដ្ឋានតាប់កា ក្នុងខេត្តរ៉ាកា ដែលជាកំពែងការពារចុងក្រោយរបស់របបដឹកនាំក្រុងដាម៉ាស ត្រូវបានក្រុមជីហាត ដណ្តើមយកបាន។
ក្នុងការត្រៀមសហការណ៍ជាមួយសហគមន៍អន្តរជាតិ ប្រយុទ្ធនឹងក្រុមជីហាត លោក វ៉ាលីត មូអាឡិម ជាតំណាងការទូតស៊ីរី បានបញ្ជាក់បន្ថែមថា ករណីអាមេរិកធ្វើការវាយប្រហារក្រុមជីហាតនៅស៊ីរី អាមេរិកត្រូវតែមានការសហការពីរដ្ឋាភិបាលស៊ីរី មិនដូច្នោះទេ ទង្វើអាមេរិកត្រូវចាត់ទុកថា ជាការឈ្លានពានស៊ីរី។
គួររំលឹកថា ក្រោយក្រុមជីហាតអារកអ្នកកាសែតអាមេរិក ចេម ហ្វូឡី ទាំងរស់ នៅអ៊ីរ៉ាក់មក ប៉ុន្មានថ្ងៃចុងក្រោយនេះ អាមេរិកគ្រោងនឹងពង្រីកប្រតិបត្តិការវាយប្រហារក្រុមជីហាត រហូតដល់ស៊ីរី។ ក្នុងប្រតិបត្តិការនេះ អាមេរិកត្រៀមខ្លួនរួចស្រេចនឹងបញ្ជូនយន្តហោះស៊ើបការណ៍និងដ្រូនទៅក្នុងដែនអាកាសស៊ីរី។ ប៉ុន្តែ ប្រធានាធិបតីអូបាម៉ា នៅទាន់សម្រេចបើកការវាយប្រហារលើស៊ីរីនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ