បណ្ណាល័យជាតិ បើកការតាំងពិព័រណ៍សៀវភៅដើម្បីលើកកម្ពស់ការអាន
បណ្ណាល័យជាតិ បានប្រកាសបើកពិព័រណ៍សៀវភៅកម្ពុជាឆ្នាំ ២០១៣ ដែលនឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី២៩វិច្ឆិកាដល់ទី១ធ្នូ នៅក្នុងបណ្ណាល័យជាតិតែម្តង។ ពិព័រណ៍នេះនឹងមានការចូលរួមពីសំណាក់អ្នកបោះពុម្ពសៀវភៅមកពីស្ថាប័នជាច្រើនដើម្បីបង្ហាញពីសៀវភៅរបស់ពួកគេដល់សាធារណជន។ គោលដៅនៃការតាំងពិព័រណ៍នេះគឺដើម្បីលើកទឹកចិត្តអ្នកបោះពុម្ពផង និងលើកស្ទួយការអានសៀវភៅផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ស្ថាប័នបោះពុម្ពសៀវភៅជាច្រើនទាំងជាតិនិងអន្តរជាតិ នឹងចូលរួមតាំងបង្ហាញសៀវភៅរបស់ខ្លួននៅឯបណ្ណាល័យជាតិ ដែលមានទីតាំងស្ថិតនៅខាងលិចវត្តភ្នំ ចាប់ពីថ្ងៃទី២៩វិច្ឆិកាដល់ថ្ងៃទី ១ធ្នូ ។ នេះគឺជាការតាំងពិព័រណ៍សៀវភៅដែលបណ្ណាល័យជាតិបានរៀបចំធ្វើឡើងពីរលើករួចមកហើយ។ ពិព័រណ៍សៀវភៅកម្ពុជាលើកទី១ត្រូវបានបើកធ្វើឡើងកាលពីឆ្នាំ ២០១១។
លោកស្រី ខ្លូត វិបុឡា នាយិកាបណ្ណាល័យជាតិ បានប្រាប់វិទ្យុបារាំងអន្តរជាតិ RFI ថា គោលដៅនៃការតាំងពិព័រណ៍សៀវភៅឆ្នាំ ២០១៣ នេះគឺដើម្បីលើកទឹកចិត្តអ្នកបោះពុម្ពសៀវភៅផង ក៏ដូចជាលើកកម្ពស់ការអានសៀវភៅនៅកម្ពុជាផង។ បើយោងតាមលោកស្រីនាយិកាបណ្ណាល័យជាតិ សិស្សសាលា ៣០០ នាក់ ត្រូវបានអញ្ជើញឲ្យចូលរួមក្នុងពិពិពរណ៍នេះ ដើម្បីស្តាប់បទបង្ហាញផ្សេងៗទាក់ទងនឹងការអានសៀវភៅ។ បទបង្ហាញដែលធ្វើឡើងដោយអ្នកជំនាញនិងអ្នកបោះពុម្ពសៀវភៅដោយផ្ទាល់។
ការតាំងពិព័រណ៍សៀវភៅឆ្នាំ ២០១៣ អាចដំណើរការទៅបានក្រោមការជួយឧត្ថម្ភពីវិទ្យាស្ថានបារាំងប្រចាំកម្ពុជា អង្គការយូណេស្កូ រួមជាមួយអង្គការបោះពុម្ភសៀវភៅជាច្រើនទៀតដូចជា អង្គការ SIPA អង្គការ Room To Read និងសាលា ប៊ែលធី ជាដើម។ ប្រសិនបើពិព័រណ៍នេះទទួលបានជោគជ័យ បណ្ណាល័យជាតិដែលស្ថិតក្រោមការគ្រប់គ្រងរបស់ក្រសួងវប្បធម៌ និងវិចិត្រសិល្បៈ គ្រោងនឹងបើកឲ្យមានការតាំងពិព័រណ៍សៀវភៅជារៀងរាល់ឆ្នាំតែម្តង។ នេះបើយោងតាមលោកស្រី ខ្លូត វិបុឡា។
គួរកត់សម្គាល់ថា នៅប្រទេសកម្ពុជា គេសង្កេតឃើញថា ពលរដ្ឋភាគច្រើនមិនសូវចូលចិត្តអានសៀវភៅទេ។ កង្វះវប្បធម៌អានសៀវភៅគឺជាគុណវិបត្តិដ៏ធំធេងរបស់សង្គមខ្មែរដែលធ្វើឲ្យការអភិវឌ្ឍន៍ប្រទេសជួបនឹងភាពយឺតយ៉ាវ។ ក្នុងបរិបទនេះ ការតាំងពិព័រណ៍សៀវភៅកម្ពុជាឆ្នាំ ២០១៣ នេះគឺជាព្រឹត្តិការណ៍ដ៏សំខាន់មួយ ដើម្បីផ្សព្វផ្សាយសៀវភៅផងនិងជំរុញការអានសៀវភៅនៅកម្ពុជាផង។ មាតា បិតា ត្រូវបានលើកទឹកចិត្តឲ្យនាំកូនរបស់ខ្លួនទៅចូលរួមក្នុងការតាំងពិព័រណ៍សៀវភៅនេះ។ កម្មវិធីប្លែកៗជាច្រើនសម្រាប់កុមារនឹងត្រូវរៀបចំឡើងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ