លោក ហ៊ូ ជីនតាវ និងព្រះរាជវង្សខ្មែរបង្ហាញភាពស្និទ្ធស្នាល
ក្រៅពីចំណងទាក់ទងស្អិតល្មួតជាមួយរដ្ឋាភិបាលក្រុងភ្នំពេញ ប្រធានាធិបតីចិន លោក ហ៊ូ ជីនតាវ ក៏បានបង្ហាញពីភាពស្និទ្ធស្នាលយ៉ាងខ្លាំងជាមួយព្រះរាជវង្សខ្មែរ។ គ្រាន់តែមកដល់កម្ពុជាភ្លាម ប្រមុខរដ្ឋចិនបានជួបសន្ទនាតាមទូរស័ព្ទជាមួយព្រះមហាក្សត្រនរោត្តម មុនីនាថសីហនុដែលកំពុងគង់ប្រថាប់នៅទីក្រុងប៉េកាំងដើម្បីសម្តែងពីទំនាក់ទំនងមិនអាចកាត់ផ្តាច់បានរវាងប្រទេសទាំងពីរ។ នៅឯទីក្រុងភ្នំពេញ លោកហ៊ូ ជីនតាវក៏បានទទួលព្រះរាជសវនាការយ៉ាងកក់ក្តៅពីសំណាក់ព្រះមហាក្សត្រ សម្តេច ព្រះបរមនាថ នរោត្តម សីហមុនី ដែរ។លោក ហ៊ូជីនតាវ បានទៅដល់ខេត្តសៀមរាបហើយនៅថ្ងៃនេះមុននឹងចាកចេញពីកម្ពុជានៅថ្ងៃស្អែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
នៅក្នុងដំណើរទស្សនកិច្ចរយៈពេល៤ថ្ងៃនៅកម្ពុជា លោក ហ៊ូ ជីនតាវ ប្រធានាធិបតីចិនត្រូវបានទទួលស្វាគមន៍យ៉ាងកក់ក្តៅនិងស្និទ្ធស្នាលពីសំណាក់ព្រះមហាក្សត្រសម្តេចព្រះបរមនាថ នរោត្តម សីហមុនី។ មេដឹកនាំកំពូលទីក្រុងប៉េកាំងត្រូវបានព្រះមហាក្សត្ររៀបចំព្រះរាជពិធីលៀងសាយភោជន៍ទទួលយ៉ាងមហោឡារិកនៅក្នុងព្រះបរមរាជវាំងកាលពីល្ងាចថ្ងៃសៅរ៍ម្សិលមិញ។
ក្រៅពីទំនាក់ទំនងដ៏ជិតស្និទ្ធ និងកក់ក្តៅរវាងរដ្ឋាភិបាលចិន និងកម្ពុជា ដំណើរទស្សនកិច្ចរបស់លោក ហ៊ូ ជីនតាវ ក៏បានបង្ហាញពីភាពស្និទ្ធស្នាលយ៉ាងខ្លាំងរវាងចិននិងគ្រួសារព្រះរាជវង្សខ្មែរ។ ជាក់ស្តែង គ្រាន់តែមកដល់កម្ពុជាភ្លាម លោក ហ៊ូ ជីនតាវ បានជួបពិភាក្សាតាមទូរស័ព្ទជាមួយសមេ្តចព្រះមហាក្សត្រិយ៍ នរោត្តម មុនីនាថ សីហនុ ដែលកំពុងគង់ប្រថាប់នៅទីក្រុងប៉េកាំង ប្រទេសចិន ជាមួយនឹងសម្តេចឪ នរោត្តម សីហនុ។ ប្រភពព័ត៌មានបានឲ្យដឹងថា កិច្ចសន្ទនានោះបានផ្តោតលើទំនាក់ទំនងយ៉ាងស្អិតល្មួតរវាងកម្ពុជានិងចិន ជាពិសេសរវាងគ្រួសាររាជវង្សខ្មែរជាមួយរដ្ឋាភិបាលទីក្រុងប៉េកាំង។ ទីក្រុងប៉េកាំងដែលគ្រួសារព្រះរាជវង្សខ្មែរជ្រើសរើសជាទីគង់ប្រថាប់សម្រាប់ព្យាបាលព្រះរាជសុខភាពតាំងពីយូរណាស់មកហើយ។ សម្តេចឪ នរោត្តម សីហនុ តែងតែគង់ប្រថាប់នៅក្នុងទីក្រុងប៉េកាំងជាច្រើនខែ និងជាញឹកញាប់ដើម្បីទទួលការព្យាបាលពីសំណាក់គ្រូពេទ្យចិន។ ព្រះមហាក្សត្រ សម្តេចព្រះបរមនាថ នរោត្តម សីហមុនី ក៏តែងយាងទៅទទួលការពិនិត្យព្រះរាជសុខភាពពីគ្រូពេទ្យចិនជាញឹកញាប់ដែរ។
លោក ហ៊ូ ជីនតាវ បានមកដល់ទីក្រុងភ្នំពេញកាលពីរសៀលថ្ងៃទី៣០មីនាក្នុងដំណើរទស្សនកិច្ចរយៈពេល៤ថ្ងៃនៅកម្ពុជា។ លោកបានទៅដល់ខេត្តសៀមរាបហើយនៅថ្ងៃអាទិត្យនេះដើម្បីទស្សនាប្រាង្គប្រាសាទនានាមុននឹងបញ្ចប់ទស្សនកិច្ចនៅថ្ងៃចន្ទទី២មេសាស្អែកនេះ។
ដំណើរទស្សនកិច្ចរបស់លោក ហ៊ូ ជីនតាវ បានបង្ហាញពីចំណងទាក់ទងកាន់តែជ្រាលជ្រៅរវាងកម្ពុជាចិន។ ទឹកប្រាក់សន្ធឹកសន្ធាប់មានទាំងជំនួយឥតសំណង និងប្រាក់កម្ចីសម្បទានសរុប៤៥០លានយ័នស្មើនឹងជាង៧០លានដុល្លារអាមេរិកត្រូវបានចិនសន្យាផ្តល់ឲ្យកម្ពុជា។ កិច្ចព្រមព្រៀងចំនួន១០ក៏ត្រូវបានចុះហត្ថលេខាផងដែរកាលពីថ្ងៃសៅរ៍ម្សិលមិញ។ លោក ហ៊ូ ជីនតាវបានកោតសរសើរចំពោះការរីកចម្រើននៅកម្ពុជាក្រោមការដឹកនាំរបស់រដ្ឋាភិបាល និងព្រះមហាក្សត្រខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ