ចៅក្រមចោទប្រកាន់និងកោះហៅមេសហជីពក្នុងសំណុំរឿងបាតុកម្មកម្មករនៅផ្លូវវេងស្រេង
លោក ជា សុខហៀង ចៅក្រមស៊ើបសួរ តុលាការសាលាដំបូងរាជធានីភ្នំពេញ បានចេញដីកាបង្គាប់ឲ្យមេដឹកនាំសហជីពកម្មករ លោក ប៉ាវ ស៊ីណា ចូលខ្លួន ដើម្បីចៅក្រមសួរចម្លើយ នៅព្រឹកថ្ងៃទី១២កញ្ញា ក្នុងសំណុំរឿងកម្មកររោងចក្រកាត់ដេរ ធ្វើបាតុកម្ម មុខសួនឧស្សាហកម្មកាណាឌីយ៉ា នៅផ្លូវវេងស្រេង។ តាមដីកាបង្គាប់ឲ្យចូលខ្លួន លោក ប៉ាវ ស៊ីណា ប្រធានសហព័ន្ធសហជីពចលនាកម្មករ ត្រូវបានចោទប្រកាន់ពីបទហិង្សាដោយចេតនា ធ្វើឲ្យខូចខាតដោយចេតនាមានស្ថានទម្ងន់ទោស គំរាមកំហែង និងបិទផ្លូវ ក្នុងពេលកម្មករធ្វើបាតុកម្ម ចាប់ពីថ្ងៃទី២៥ខែធ្នូ ឆ្នាំ២០១៣ រហូតដល់ថ្ងៃទី៣មករា ឆ្នាំ២០១៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ដីកាបង្គាប់ឲ្យចូលខ្លួននោះ ចេញដោយលោក ជា សុខហៀង ចុះថ្ងៃទី២២ ខែសីហា ឆ្នាំ២០១៤ ហើយបានទៅដល់ដៃមេដឹកនាំសហជីពកម្មករ លោក ប៉ាវ ស៊ីណា នៅព្រឹកថ្ងៃទី២ ខែកញ្ញា ឆ្នាំ២០១៤។
ចៅក្រមបានចោទប្រកាន់ លោកប៉ាវស៊ីណា ពីបទហិង្សាដោយចេតនា ស្ថានទម្ងន់ទោស ធ្វើឲ្យខូចខាតដោយចេតនាស្ថានទម្ងន់ទោស គំរាមកំហែងថា នឹងធ្វើឲ្យខូចខាត ដែលភ្ជាប់នូវបញ្ហាអ្វីមួយ និងប្រើមធ្យោបាយ ដើម្បីជាឧបសគ្គដល់ចរាចរណ៍សាធារណៈ។
ក្នុងដីកា ចៅក្រមបានកំណត់ថា បទល្មើសចោទប្រកាន់លើមេដឹកនាំសហជីពកម្មករខាងលើនេះ បានប្រព្រឹត្តនៅចំណុចមុខសួនឧស្សាហកម្ម កាណាឌីយ៉ា ផ្លូវវេងស្រេង កាលពីថ្ងៃទី២៥ ខែធ្នូ ឆ្នាំ២០១៣ រហូតដល់ថ្ងៃទី៣ ខែមករា ឆ្នាំ២០១៤។ បទល្មើសនោះ ត្រូវផ្តន្ទាទោស តាមមាត្រា ២១៨ មាត្រា ៤១១ មាត្រា ៤២៤ នៃក្រមព្រហ្មទណ្ឌ និងមាត្រា ៧៨ នៃច្បាប់ចរាចរណ៍ផ្លូវគោក។
លោកប៉ាវស៊ីណា បានចាត់ទុកចំណាត់ការរបស់ចៅក្រមលើរូបលោក នៅពេលនេះ ថាជារឿងគំរាមកំហែងថ្មីមួយទៀត ក្នុងបំណងបន្ទច់បង្អាក់មេដឹកនាំសហជីពកម្មករ មិនឲ្យធ្វើយុទ្ធនាការ ទាមទារឡើងប្រាក់ខែកម្មករ ១៧៧ ដុល្លារ។ យុទ្ធនាការនោះ នឹងធ្វើនៅថ្ងៃទី១៧កញ្ញា។
ជាការកត់សម្គាល់ ក្នុងសំណុំរឿងចោទប្រកាន់មេដឹកនាំសហជីពកម្មករនេះ យ៉ាងហោចណាស់ ក៏មានមេដឹកនាំសហជីពកម្មករ ៥ រូបផ្សេងទៀត រួមមាន លោករ៉ុងឈុន និងលោកអាត់ធន់ ជាដើម ត្រូវបានចៅក្រមចោទប្រកាន់ និងកោះហៅឲ្យចូលខ្លួន ដូចលោកប៉ាវស៊ីណាដែរ។ មូលហេតុ មកពីការដឹកនាំកម្មករទាំងនោះ បានដឹកនាំកម្មកររោងចក្រកាត់ដេរ ធ្វើបាតុកម្ម ទាមទារឡើងប្រាក់ខែ កាលពីថ្ងៃទី២៥ធ្នូ ដល់ថ្ងៃទី៣មករា។ ប៉ុន្តែគិតត្រឹមរសៀលថ្ងៃពុធនេះ គឺមានតែលោកប៉ាវស៊ីណាម្នាក់ប៉ុណ្ណោះ បានទទួលដីកា។
ក្រោយហេតុការណ៍បាតុកម្មភ្លាមៗ កាលពីខែមករា លោករ៉ុងឈុន ត្រូវបានចៅក្រមបង្គាប់ឲ្យចូលបំភ្លឺ ជាមួយនឹងមេដឹកនាំគណបក្សសង្គ្រោះជាតិ លោកសមរង្ស៊ី និងលោកកឹមសុខា។
បាតុកម្មកាលណោះ នាំឲ្យទាហាន ប៉ូលិស និងប៉េអឹម បានបង្ក្រាបយ៉ាងហិង្សា បណ្តាលឲ្យកម្មករយ៉ាងហោចណាស់ ៥ នាក់ ត្រូវបានបាញ់ស្លាប់ និងរបួសជាង ៤០ នាក់ផ្សេងទៀត។ មេដឹកនាំសហជីព និងកម្មករ ២៣ នាក់ ត្រូវបានចាប់ឃុំខ្លួនអស់ជាច្រើនខែ ហើយទ្រព្យសម្បត្តិរោងចក្រមួយចំនួន ត្រូវបាតុករវាយកម្ទេច។
ប៉ុន្តែចំណាត់ការរបស់តុលាការនៅពេលនេះ ធ្វើឡើងប្រឆាំងតែមេដឹកនាំសហជីពកម្មករប៉ុណ្ណោះ។ ចំណែកទាហាន ប៉ូលិស និងប៉េអឹម ដែលបានបង្ក្រាបលើបាតុករ មិនត្រូវបានចៅក្រម ចាត់ការទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ