សង្គមស៊ីវិលបរិហារតុលាការថា ប្រើច្បាប់មិនត្រូវក្នុងការចាប់ខ្លួន សកម្មជនបក្សប្រឆាំង
អង្គការឃ្លាំមើលសិទ្ធមនុស្សធំៗ ចំនួន៤ នៅកម្ពុជា បាននិយាយថា ការចាប់ខ្លួន ចោទប្រកាន់ និងកោះហៅ តំណាងរាស្ត្រ និងសកម្មជនគណបក្សសង្គ្រោះជាតិ ជាបន្តបន្ទាប់ ក្រោយមានកិច្ចព្រមព្រៀង រវាងគណបក្សជាប់ឆ្នោតទាំងពីរ គឺជាចេតនានយោបាយ។ ម្យ៉ាងទៀត ពួកគេ បានចោទប្រកាន់តុលាការថា មិនបានប្រើច្បាប់បាតុកម្ម ប៉ុន្តែបែរជាប្រើច្បាប់ព្រហ្មទណ្ឌទៅវិញ។ ការបរិហារបែបនេះបានធ្វើឡើងក្នុងសន្និសីទមួយ នៅឯភោជនីយដ្ឋានខ្មែរសុរិន្ទ នារសៀលថ្ងៃទី ២០សីហានេះ។
ចុះផ្សាយនៅថ្ងៃ៖
ស្តាប់ - ០២:៣៨
សង្គមស៊ីវិល បានអះអាងថា សកម្មភាពប្រើប្រព័ន្ធតុលាការដដែលៗនេះទៅលើសកម្មជនបក្សប្រឆាំង គឺជាចេតនានយោបាយដើម្បីដាក់សម្ពាធទៅលើគណបក្សនេះ ឲ្យព្រមធ្វើវិសោធកម្មបទបញ្ជាផ្ទៃក្នុងរដ្ឋសភា កំណែទម្រង់ គ.ជ.ប និងអភ័យឯកសិទ្ធអ្នកតំណាងរាស្ត្រ។
លោក នី ចរិយា ប្រធានផ្នែកស៊ើបអង្កេតសិទ្ធិមនុស្សសមាគម អាដហុក បានលើកឡើងថា, តាមការវិភាគផ្នែកច្បាប់ បទចោទ ទាំង៣ របស់តុលាការសាលាដំបូងរាជធានីភ្នំពេញ គឺមិនត្រឹមត្រូវនោះទេ។ សូមបញ្ជាក់ថា បទចោទទាំង៣ របស់តុលាការក្រុងភ្នំពេញ រួមមាន ការដឹកនាំចលនាកុបកម្ម តាមមាត្រា ៤៥៩នៃក្រមព្រហ្មទណ្ឌ, ចោទប្រកាន់ពីបទញុះញង់ឲ្យមានអំពើឧក្រិដ្ឋ តាមមាត្រា ៤៩៥ នៃក្រមព្រហ្មទណ្ឌ និងចោទពីបទផ្តើមគំនិតក្នុងអំពើហិង្សា ដោយចេតនា មានស្ថានទំងន់ទោស តាមមាត្រា ២៨ និង ២១៨ នៃក្រមព្រហ្មទណ្ឌ។
អ្នកស្រី ចក់ សុភាព នាយិការប្រតិបត្តិនៃអង្គការ CCHR បានបន្ថែមថា តុលាការគួរប្រើច្បាប់បាតុកម្មដើម្បីចាត់វិធានការណ៍ មិនគួរប្រើច្បាប់ព្រហ្មទណ្ឌនោះទេ។ អ្នកស្រី បាននិយាយថា កន្លងមករដ្ឋាភិបាល មិនបានស្វែងរកយុត្តិធម៌ ពិតប្រាកដ ដល់ជនរងគ្រោះ ស្លាប់ និងរបួស ក្នុងករណីអំពើហិង្សា នៅក្បាលថ្នល់ ផ្លូវវែងស្រែង និងស្ទឹងមានជ័យនោះទេ ប៉ុន្តែបែរជាចាត់ថាបាតុកម្ម នៅជិតទីលានប្រជាធិបតេយ្យ កាលពីថ្ងៃទី ១៥កក្កដា គឺជារឿងដ៏ធ្ងន់ធ្ងរមួយទៅវិញ។ នាយិការប្រតិបត្តិ របស់មជ្ឈមណ្ឌលសិទ្ធិមនុស្សកម្ពុជា ក៏យល់ស្របដែរថា នេះគឺចេតនានយោបាយ ដើម្បីដាក់សម្ពាធលើគណបក្សប្រឆាំង ដោយប្រើប្រព័ន្ធតុលាការសុទ្ធសាធ។
លោក ហង្ស ពុទ្ធា នាយកប្រតិបត្តិអង្គការ NICFEC ក៏បានហៅការចាប់ខ្លួនតំណាងរាស្ត្រ និងសកម្មជនបក្សប្រឆាំងនេះ ថាជារឿងនយោបាយដែរ។ លោកបានផ្អែកលើទិដ្ឋភាព ចំនួន២ គឺការចាប់ខ្លួនមុនកិច្ចចរចារ និងក្រោយពីមានកិច្ចព្រមព្រៀង។ លោក ហង្ស ពុទ្ធា បាននិយាយថា ការចាប់ខ្លួន មុនកិច្ចចរចារ គឺរដ្ឋាភិបាលរបស់បក្សប្រជាជនកម្ពុជា មានបំណង បំបែកទស្សនៈនយោបាយគណបក្សសង្គ្រោះជាតិ ព្រោះគណបក្សនេះ កើតចេញពីគណបក្ស២ គឺសម រង្ស៊ី និងសិទ្ធមនុស្ស។
ម្យ៉ាងទៀត គឺដើម្បីបង្ហាញថា តុលាការគឺជាឧបករណ៍របស់បក្សណាមួយ។ នាយកប្រតិបត្តិអង្គការ NICFEC បានហៅព្រឹត្តិការណ៍ថ្ងៃ ១៥កក្កដា ថាគឺជាការគ្រោងទុកដើម្បីបង្កើតរឿងផ្សេងទៀត ក្នុងបំណងដាក់សម្ពាធ ដល់បក្សសង្គ្រោះជាតិ ដើម្បីឲ្យមានការស្រុះស្រួល លើកំណែទម្រង់គ.ជ.ប និងវិសោធនកម្មបទបញ្ជាផ្ទៃក្នុងរដ្ឋសភា។
សូមបញ្ជាក់ថា បន្ទាប់ពីមានព្រឹត្តិការណ៍ហិង្សាបាតុកម្ម រំដោះទីលានប្រជាធិបតេយ្យ របស់តំណាងរាស្ត្រគណបក្សសង្គ្រោះជាតិ តុលាការក្រុងភ្នំពេញ បានចេញដីការចាប់ខ្លួន ចោទប្រកាន់ និងកោះហៅតំណាងរាស្ត្រ និងសកម្មជនគណបក្សសង្គ្រោះជាតិជាបន្តបន្ទាប់។ ថ្មីៗនេះ សកម្មជនគណបក្សសង្គ្រោះជាតិចំនួន ៣រូប ក៏ត្រូវបានចាប់ឃុំខ្លួន នៅពន្ធនាគារព្រៃស ១៨ថ្ងៃមកហើយ និងមិនអនុញាត្ត ឲ្យមានការចូលសួរសុខទុក្ខពីក្រុមគ្រួសារទៀតផង ។ នេះបើតាមសេចក្តីថ្លែងការណ៍របស់អង្គការការពារសិទ្ធិមនុស្សលីកាដូ នៅថ្ងៃទី២០សីហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ