ពួកភេរវជនយកទីក្រុងបាងកកធ្វើជាទីតាំងវាយប្រហារប្រយោជន៍អាមេរិក និងអ៊ីស្រាអែល
អាជ្ញាធរថៃបានបង្កើន ពង្រឹងសន្តិសុខ នៅតាមស្ថានទូតបរទេស សង្កាត់ទេសចរណ៍ ក្នុងក្រុងបាងកក និងនៅព្រលានយន្តហោះសុវណ្ណភូមិ បន្ទាប់ពីគេបានចាប់ឃាត់ខ្លួនភេរវជនអ៊ីរ៉ង់ពីរនាក់ ដែលបានបំផ្ទុះគ្រាប់បែក នៅកណ្តាលក្រុងបាងកក កាលពីថ្ងៃអង្គារ និងថ្ងៃពុធម្សិលមិញ។ អាជ្ញាធរថៃនៅថ្ងៃព្រហស្បតិ៍ទី ១៦ កុម្ភៈនេះបានស្នើឲ្យប្រទេសម៉ាឡេស៊ីធ្វើបត្យាប័នជនសង្ស័យអ៊ីរ៉ង់ ម្នាក់ដែលបានគេចខ្លួនទៅដល់ទឹកដីម៉ាឡេស៊ី កាលពីថ្ងៃពុធ។ ប៉ូលិសថៃក៏កំពុងស្វែងរកចាប់ស្រ្តីអ៊ីរ៉ង់ម្នាក់ដែល គេជឿថា ជាអ្នកជួយរៀបចំជួលផ្ទះឲ្យជនជាតិអ៊ីរ៉ង់ទាំងបីនាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០៣
តាម លោកវិឈាន ប៉ូតិភូស្រ៊ែ ប្រធានក្រុមប្រឹក្សាសនិ្តសុខជាតិថៃ គ្រាប់ផ្ទុះដែលប៉ូលិសរឹបអូសបាន គឺជាគ្រាប់បែកច្នៃ ដែលមានឥទ្ធិពលតិចតួច ដែលគេប្រើសំដៅវាយប្រហារបុគ្គល ប៉ុន្តែ មិនមែនសំដៅស្ថាប័ន ឬក្រុមមនុស្សច្រើនទេ។ នៅផ្ទះជួលដែលជនជាតិអ៊ីរ៉ង់បានធ្វើឲ្យផ្ទុះដោយសារកំហុសបច្ចេកទេសក្នុងការផលិតគ្រាប់ គេរកឃើញគ្រាប់បែកច្នៃមិនទាន់ផ្ទុះចំនួនពីរ និងវត្ថុធាតុផ្សេងទៀតសម្រាប់ផលិតគ្រាប់។
ប្រមុខប្រឹក្សាសន្តិសុខជាតិថៃអះអាងបញ្ជាក់ថា ការបំផ្ទុះគ្រាប់បែក កាលពីថ្ងៃអង្គារមិនមែនជាសកម្មភាពភេរវកម្មទេ។ ជាក់ស្តែង ជនជាតិអ៊ីរ៉ង់ទាំងពីរនាក់ដែលត្រូវចាប់ខ្លួនទាន់កាលពីថ្ងៃអង្គារត្រូវតុលាការថៃចោទត្រឹមបទប៉ុនប៉ងធ្វើឃាត និងមានគ្រឿងផ្ទុះជាប់ខ្លួន។
បើទោះជា គេនៅមិនទាន់មានភស្តុតាងណាមួយបញ្ជាក់ពីក្រុមមនុស្សដែលជាគោលដៅវាយប្រហាររបស់ជនសង្ស័យអ៊ីរ៉ង់ ប៉ុន្តែ អ៊ីស្រាអែលបានសន្និដ្ឋានរួចហើយ ថា ជនជាតិអ៊ីរ៉ង់ទាំងប៉ុន្មាននាក់ហ្នឹង មានផែនការវាយប្រហារបំផ្លាញមន្រ្តីទូតរបស់ខ្លួន នៅក្នុងប្រទេសថៃ។ អ៊ីស្រាអែលហ៊ាននិយាយដូច្នេះ ព្រោះថា គ្រឿងផ្ទុះពីរគ្រាប់ រកឃើញក្នុងផ្ទះដែលជនជាតិអ៊ីរ៉ង់ជួល គឺមានលក្ខណៈស្រដៀងគ្នា និងគ្រាប់បែកដែលភេរវជនបានគប់លើរថយន្តមន្រ្តីទូតអ៊ីស្រាអែល ក្នុងទីក្រុងញូវដេលី កាលពីថ្ងៃចន្ទ។
បន្ទាប់ពីមានការចោទប្រកាន់របស់អ៊ីស្រាអែលទៅលើអ៊ីរ៉ង់ រដ្ឋមន្រ្តីការបរទេសថៃបានសន្យាទាក់ទងស្ថានទូតអ៊ីរ៉ង់ ដើម្បីបញ្ជាក់ពីអត្តសញ្ញាណរបស់ជនសង្ស័យ ដែលគេបានចាប់ខ្លួន។ ថៃក៏ចង់បញ្ជាក់ប្រាប់ទៅអ៊ីរ៉ង់ពីភាពអព្យាក្រិត និងថា កុំឲ្យយកថៃធ្វើជាទឹកដីសម្រាប់ត្រៀមរៀបចំការវាយប្រហារណាមួយ។
នៅថ្ងៃព្រហស្បតិ៍ថា ប្រធានក្រុមប្រឹក្សាសន្តិសុខជាតិថៃ បាននិយាយថា ឧប្បត្តិហេតុ កើតឡើង កាលពីថ្ងៃអង្គារ គឺបណ្តាលមកមានភាពតានតឹងក្នុងពិភពលោក បច្ចុប្បន្ន។ ប្រទេសថៃបានក្លាយជាប្រទេសរងគ្រោះ ជាផ្ទាំងស៊ីប ដោយសារថៃជាប្រទេសទេសចរណ៍ សម្បូរជនបរទេសចូលមកទស្សនាច្រើន។
កាលពីដើមខែមករា ស្ថានទូតអាមេរិកធ្លាប់បានប្រកាស ប្រាប់ប្រជាជនខ្លួន ពីលទ្ធភាពអាចកើតមាន អំពើភេរវកម្ម ក្នុងប្រទេសថៃ និងអំពាវនាវឲ្យពួកគេប្រុងប្រយ័ត្ន កុំធ្វើដំណើរទៅកន្លែងដែលសម្បូរអ្នកទេសចរ។ ក្រោយមក គេក៏ចាប់បានជនជាតិស៊ុយអែដម្នាក់ ដែលមានពាក់ព័ន្ធនឹងពួកHezbollah និងមានគ្រឿងផ្ទុះជាច្រើនគីឡូ។ ជនសង្ស័យបានសារភាពថា ខ្លួនប៉ុនប៉ងធ្វើគ្រាប់សម្លាប់ជនជាតិអ៊ីស្រាអែល និងអាមេរិក នៅក្នុងប្រទេសថៃ។
អ៊ីស្រាលអែលវិញជឿថា ការវាយប្រហាររបស់អ៊ីរ៉ង់លើកនេះទៅលើស្ថានទូតរបស់ខ្លួន នៅបរទេស គឺដើម្បីសងសឹកអ៊ីស្រាអែលដែលអ៊ីរ៉ង់ចោទថា បានសម្លាប់មេដឹកនាំHezbollah និងថ្មីនេះលួចធ្វើឃាតមន្រ្តីជំនាញនុយក្លេអ៊ែររបស់អ៊ីរ៉ង់ម្នាក់។
នេះមិនមែនជាលើកទីមួយទេដែលក្រុមភេរវជនមកពីតំបន់ដើមបូព៌ា យកប្រទេសថៃ ធ្វើជាទីតាំង ដើម្បីវាយប្រហារលើរាល់ប្រយោជន៍អ៊ីស្រាអែល និងអាមេរិក។ ក្នុងរយៈពេល៤០ឆ្នាំ នេះជាលើកទីបួន ដែលក្រុមអ៊ីស្លាមមកពីតំបន់ប៉ូពាយកទឹកដីថៃ ធ្វើជាកន្លែងសងសឹក ក្នុងជម្លោះនៅតំបន់ដើមបូព៌ា។ ក្នុងប្រទេសថៃ មន្រ្តីនិងម្ចាស់ជំនួញអារ៉ាប៊ី សាអូឌីតធ្លាប់ត្រូវគេលួចសម្លាប់ ចំណែកមន្រ្តីទូតអ៊ីស្រាអែលក៏ធ្លាប់ត្រូវពួកអ៊ីស្លាមជ្រុលនិយមប៉ាឡេស្ទីនចាប់ជម្រិត ក្នុងឆ្នាំ ១៩៩៤។
មន្រ្តីទូតអង់គ្លេស វិញ ធ្លាប់បាននិយាយនៅក្នុងសន្និសីទកាសែតមួយថា គេមិនអាចមើលរំលងស្ថានភាពអសន្តិសុខដែលបង្កដោយក្រុមបះបោរ នៅភាគខាងត្បូងថៃទេ។ ក្រុមអ៊ីស្លាមជ្រុលនិយមនៅភាគខាងត្បូងដែលបង្កអំពើហិង្សា ភេរវកម្មតាំងពីឆ្នាំ ២០០៤ សម្លាប់មនុស្សជាង ៥ពាន់នាក់ អាចក្លាយជាបណ្តាញ និងផ្តល់ជម្រកដល់ពួកភេរវជន ពិភពលោក។
គេមិនដឹងថា តើជនសង្ស័យអ៊ីរ៉ង់ដែលប៉ូលិសចាប់បាន មានជាប់ពាក់ព័ន្ធ និងបានទទួលជំនួយពីក្រុមអ៊ីស្លាមជ្រុលនិយម នៅខេត្តភាគខាងត្បូង ប៉ុន្តែ ចំណុចមួយដែលគេគួរចាប់អារម្មណ៍ដែរនោះ គឺប៉ូលិសថៃបានរាយការណ៍ថា ជនសង្ស័យអ៊ីរ៉ង់បានចូលមករស់នៅដើរហើរដោយមានសេរីភាព តាំងពីដើមខែកុម្ភៈ និងបានទិញវត្ថុធាតុ ក្នុងស្រុកដើម្បីកែច្នៃធ្វើជាគ្រាប់ផ្ទុះ។ ដូច្នេះមានន័យថា ភេរវជនមិនចាំបាច់នាំគ្រឿងផ្ទុះ ឆ្លងកាត់ព្រំដែនទេ គឺគេអាចផលិតបាននៅក្នុងប្រទេសថៃតែម្តង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ