រុស្ស៊ី៖« សង្រ្គាមអ៊ីស្រាអែលប្រឆំាងអ៊ីរ៉ង់អាចនឹងបង្កចេញនូវគ្រោះមហន្តរាយធ្ងន់ធ្ងរ »
កាលពីថ្ងៃពុធ ទី៨ កុម្ភៈម្សិលមិញ លោក Mikhaïl Oulianov នាយកការិយាល័យសន្តិសុខ និងរំសាយសព្វាវុធនៃក្រសួងការបរទេសរុស្ស៊ីបានថ្លែងថា ការចោទរបស់ប្រទេសអ៊ីស្រាអែលលើអ៊ីរ៉ង់ថាបាននិងកំពុងពួនសម្ងំផលិតគ្រាប់បែកបរមាណូ គឺជារឿងប្រឌិតសុទ្ធសាធ និងជាការជម្រុញឲ្យមានសង្រ្គាមប្រឆំាងអ៊ីរ៉ង់។ សម្រាប់រូបលោក Mikhaïl Oulianov សង្រ្គាមប្រឆំាងអ៊ីរ៉ង់អាចនឹងបង្កចេញនូវគ្រោះមហន្តរាយដ៏ធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៤
អ្វីដែលអ្នកទទួលខុសត្រូវរុស្ស៊ីបានថ្លែងមិនមែនជារឿងមួយគួរឲ្យភ្ញាក់ផ្អើលទេ ព្រោះថា រុស្ស៊ី និងចិន គឺជាសម្ព័ន្ធមិត្តរបស់អ៊ីរ៉ង់ ហើយរុស្ស៊ី និងចិនតែងតែបានចេញមុខការពារអ៊ីរ៉ង់គ្រប់ពេល ពោលគឺមិនចង់ឲ្យមានទ័ណ្ឌកម្មថ្មីទៀតដាក់លើប្រទេសអ៊ីរ៉ង់ទេ។ កន្លងមកយើងឃើញថា កិច្ចចរចា ៦ភាគីមានច្រើនរាប់មិនអស់ រីឯទ័ណ្ឌកម្មដាក់លើទីក្រុងតេហេរ៉ង់ក៏មានច្រើនដែរ តែគេនៅតែមិនទាន់អាចជម្នះអ៊ីរ៉ង់ឲ្យបោះបង់ចោលកម្មវិធីនុយក្លេអ៊ែរ។ ទន្ទឹមគ្នានេះ និងចំពេលដែលសំណុំរឿងនុយក្លេអ៊ែរអ៊ីរ៉ង់ចេះតែអូសបន្លាយ ក្តីបារម្ភក៏បានកើនឡើងទាក់ទងនឹងការសម្រេចចិត្តរបស់អ៊ីរ៉ង់ក្នុងការផលិតគ្រាប់បែកបរមាណូ។ កន្លងមក របាយការណ៍របស់ទីភ្នាក់ងារថាមពលបរមាណូអន្តរជាតិក៏បានបង្ហាញភស្តុតាងដែលថា កម្មវិធីនុយក្លេអ៊ែរអ៊ីរ៉ង់មានទ្រង់ទ្រាយជាកម្មវិធីនុយក្លេអ៊ែរយោធា។ នាពេលថ្មីៗនេះ សហរដ្ឋអាមេរិក និងសហភាពអឺរ៉ុបក៏បានសម្រេចដាក់ទ័ណ្ឌកម្មបន្ថែមលើវិស័យប្រេងកាតអ៊ីរ៉ង់។ បន្ទាប់មក ក្នុងរយៈពេលប៉ុន្មានសប្តាហ៍ចុងក្រោយនេះ មានពាក្យចចាមអារ៉ាមលេចឮថា ប្រទេសអ៊ីស្រាអែលអាចនឹងបើកការវាយប្រហារលើទីតំាងនុយក្លេអ៊ែររបស់អ៊ីរ៉ង់ដោយសំអាងថា អ៊ីរ៉ង់កំពុងផលិតគ្រាប់បែកបរមាណូ។ អ្នកឯកទេសអ៊ីស្រាអែលម្នាក់នៃក្រសួងស៊ើបការសម្ងាត់បានបញ្ជាក់កាលពីមួយសប្តាហ៍មុននេះថា ការវាយប្រហារអ៊ីរ៉ង់អាចនឹងចាប់ផ្តើមក្នុងឆ្នំា ២០១២ នេះ តែសម្រាប់លោករដ្ឋមន្រ្តីក្រសួងការពារជាតិអ៊ីស្រាអែលវិញ លោកមិនបានបញ្ជាក់ពីថ្ងៃ ខែឲ្យបានច្បាស់លាស់ទេ។ យ៉ាងណាក៏ដោយ ប្រទេសរុស្ស៊ីបានចាត់ទុកការចោទប្រកាន់របស់ប្រទេសអ៊ីស្រាអែលលើអ៊ីរ៉ង់ ថាជារឿងប្រឌិតសុទ្ធសាធ និងជាការជំរុញឲ្យមានសង្រ្គាមប្រឆំាងអ៊ីរ៉ង់។ សង្រ្គាមប្រឆំាងអ៊ីរ៉ង់ដែលអាចនឹងបង្កឲ្យមានផលវិបាកដ៏ធ្ងន់ធ្ងរ។
តើអ៊ីស្រាអែលពិតជាចង់វាយប្រហារអ៊ីរ៉ង់មែន ឬមួយក៏គ្រាន់តែកំញើញ ?
កន្លងមក អ៊ីស្រាអែលធ្លាប់បានទម្លាក់គ្រាប់បែកកម្ទេចទីតាំងនុយក្លេអ៊ែរមួយកន្លែងនៅក្នុងប្រទេសអ៊ីរ៉ាក់កាលពីឆ្នំា ១៩៨១។ បន្ទាប់មក ក្នុងឆ្នំា ២០០៧ ទាហានអ៊ីស្រាអែលក៏បានកម្ទេចទីតាំងមួយកន្លែងនៅស៊ីរីដែលខ្លួនសង្ស័យថា ជាទីតាំងនុយក្លេអ៊ែរ។ ដូច្នេះ គ្មានហេតុផលណាមួយដែលអ៊ីស្រាអែលមិនហ៊ានវាយកម្ទេចទីតំាងនុយក្លេអ៊ែររបស់អ៊ីរ៉ង់ទេ។ ម្យ៉ាងទៀត អ៊ីរ៉ង់ និងអ៊ីស្រាអែល គឺជាសត្រូវស៊ីសាច់ហុតឈាមនឹងគ្នា។ កន្លងមក លោកប្រធានាធិបតីអ៊ីរ៉ង់ Mahmoud Ahmadinejad ធ្លាប់បានប្រកាសជាសាធារណៈថា ចង់កម្ទេចប្រទេសអ៊ីស្រាអែលចេញឲ្យបាត់ ពីផែនទីពិភពលោក។ អ៊ីចឹងឃើញថា ទោះបីជាសង្រ្គាមរវាងអ៊ីរ៉ង់ និងអ៊ីស្រាអែលនៅមិនទាន់ផ្ទុះជាផ្លូវការក៏ដោយ ក៏ប្រទេសទំាងពីរកំពុងសង្កៀតធ្មេញដាក់គ្នាយ៉ាងខ្លំាង។ អ៊ីស្រាអែលប្រាកដជាមិនញញើតក្នុងការប្រើកម្លាំងទ័ពវាយប្រហារលើអ៊ីរ៉ង់ទេ ប្រសិនបើខ្លួនយល់ថា អ៊ីរ៉ង់ពិតជាកំពុងផលិតអាវុធនុយក្លេអ៊ែរមែន។
បើមានផ្ទុះសង្រ្គាមរវាងអ៊ីស្រាអែល និងអ៊ីរ៉ង់ តើអាចនឹងមានផលវិបាកអ្វីខ្លះ ?
ផលវិបាកធំទី១ គឺអស្ថិរភាពនៅក្នុងតំបន់ដើមបូព៌ាទំាងមូល ឬក៏អាចរាលដាលទៅជាសង្រ្គាម។ ដូចយើងបានដឹងស្រាប់ហើយថា ស្ថានភាពនៅតំបន់ដើមបូព៌ានាពេលបច្ចុប្បន្នកំពុងតែតានតឹងស្រាប់។ បើយើងពិនិត្យជារួមទៅ ឃើញថា អ៊ីស្រាអែលមានសត្រូវច្រើនជាងមិត្ត នៅជុំវិញខ្លួន។ ប្រសិនបើសង្រ្គាមផ្ទុះឡើងរវាងអ៊ីស្រាអែល និងអ៊ីរ៉ងមែន វានឹងបង្កឲ្យមានសង្រ្គាមរវាងអ៊ីស្រាអែល និងក្រុម Hamas នៅប៉ាឡេស្ទីន និងសង្រ្គាមរវាងអ៊ីស្រាអែល និងក្រុម Hezbollah ដែលកំពុងកាន់អំណាចនៅក្នុងប្រទេសលីបង់។ សង្រ្គាមផ្ទុះឡើងរវាងអ៊ីស្រាអែល និងប៉ាឡេស្ទីនអាចនឹងរីករាលដាលទៅកាន់ប្រទេសអារ៉ាប់ផ្សេងទៀតប្រឆំាងនឹងអ៊ីស្រាអែល។ រីឯប្រទេសស៊ីរីដែលជាប្រទេសជិតខាងអ៊ីស្រាអែល ក៏មានទំនាក់ទំនងស្អិតល្មួតជាមួយអ៊ីរ៉ង់ដែរ។ ប្រទេសស៊ីរីដែលលោកប្រធានាធិបតី Bachar el Assad កំពុងតែប្រឈមមុខនឹងការបះបោរប្រឆាំងនៅក្នុងប្រទេស។ ដូច្នេះ បើអ៊ីស្រាអែលវាយប្រហារលើអ៊ីរ៉ង់ មេដឹកនាំស៊ីរីអាចនឹងយកលេសទៅធ្វើសង្រ្គាមជាមួយអ៊ីស្រាអែល ដោយបង្វែរបញ្ហាផ្ទៃក្នុង ទៅជាសង្រ្គាមជាមួយអ៊ីស្រាអែលវិញ។
ចំណែកផលវិបាកធំទី២ គឺកង្វះខាតប្រេងកាត ព្រោះថា អ៊ីរ៉ង់គឺជាប្រទេសនាំចេញប្រេងកាតលំដាប់ទី៤ នៅលើពិភពលោក (បន្ទាប់ពីរុស្ស៊ី អារ៉ាប៊ីសាអ៊ូឌីត និងអារ៉ាប់រួម)។ អ៊ីរ៉ង់អាចនឹងយកប្រេងកាតមកធ្វើជាអាវុធសងសឹក ដោយធ្វើការកាត់ផ្តាច់ផ្លូវដឹកជញ្ជូនប្រេងពីដើមបូព៌ា ទៅកាន់ទីផ្សារអន្តរជាតិ។ គួរបញ្ជាក់ថា ក្នុងមួយឆ្នាំៗ ប្រេងឆៅប្រមាណ ១៧% នៃទីផ្សារពិភពលោក ត្រូវដឹកជញ្ជូនតាមដៃសមុទ្រ Ormuz ដែលជាប់នឹងប្រទេសអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ