ជំនួយសង្គ្រោះជប៉ុនមកដល់ពេលអ្នកស្លាប់ដោយទឹកជំនន់កើនដល់២០៦នាក់
ខណៈដែលទឹកជំនន់បង្កផលប៉ះពាល់កាន់តែធ្ងន់ធ្ងរឡើង ជំនួយមនុស្សធម៌បានមកដល់កម្ពុជាជាបណ្តើរៗ។ ជាក់ស្តែង ជំនួយរបស់ជប៉ុនសម្រាប់សង្គ្រោះបន្ទាន់ដល់ជនរងគ្រោះដោយទឹកជំនន់បានមកដល់ភ្នំពេញកាលពីយប់ថ្ងៃសៅរ៍ម្សិលមិញ។ ជំនួយសង្គ្រោះទាំងនោះមានដូចជាធុងច្រោះទឹក មុង ភួយ កន្ទេល តង់ និងសម្ភារៈប្រើប្រាស់ផ្សេងទៀតដែលមានតម្លៃ ៣៣ម៉ឺនដុល្លារ។ ជំនួយជប៉ុននេះ បានមកដល់ ខណៈដែលតុល្យាការនៃចំនួនអ្នកស្លាប់បានកើនឡើងដល់២០៦នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
អំណោយមនុស្សធម៌របស់រដ្ឋាភិបាលជប៉ុនដើម្បីសង្គ្រោះជនរងគ្រោះដោយទឹកជំនន់នៅកម្ពុជាបានមកដល់ភ្នំពេញហើយកាលពីយប់មិញនេះ។ អំណោយដែលមានតម្លៃជាង៣០ម៉ឺនដុល្លារអាមេរិកត្រូវបានរដ្ឋាភិបាលជប៉ុនផ្តល់ជូនតាមរយៈអង្គការ JICA។អំណោយមនុស្សធម៌ទាំងនោះមានដូចជា ធុងសម្រាប់ចម្រោះទឹក ធុងដាក់ទឹក តង់ មុង កន្ទេល ភួយនិងសម្ភារៈផ្សេងៗជាច្រើនទៀតសម្រាប់ឆ្លើយតបទៅនឹងការសង្គ្រោះបន្ទាន់ដល់ជនរងគ្រោះដែលលិចលង់ដោយទឹកជំនន់។
ការមកដល់នៃជំនួយសង្គ្រោះរបស់ជប៉ុនគឺនៅខណៈពេលដែលតុល្យការចំនួនអ្នកស្លាប់កាន់តែកើនឡើងជាលំដាប់។ លោក ញឹម វណ្ណដា អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្ដរាយបានមានប្រសាសន៍ខណៈពេលទៅទទួលជំនួយនៅព្រលានយន្ដហោះអន្ដរជាតិភ្នំពេញថា គិតរហូតមកដល់ពេលនេះ ចំនួនអ្នកស្លាប់ដោយសារតែទឹកជំនន់នៅកម្ពុជាបានកើនឡើងដល់២០៦នាក់ហើយ។ ក្រៅពីនោះ ប្រជាជនជាង១លាននាក់បានទទួលរងផលប៉ះពាល់ និងផ្ទះចំនួន១៨ម៉ឺនខ្នងបានលិចលង់ រីឯដំណាំស្រូវរាប់ម៉ឺនហិកតាត្រូវបំផ្លាញ។
បើយោងតាមលោក ញឹម វណ្ណដា ក្នុងរយៈពេលពីរខែកន្លងទៅនេះប្រជាពលរដ្ឋដែលរងគ្រោះដោយសារតែទឹកជំនន់ជិត១០ម៉ឺនគ្រួសារត្រូវបានជម្លៀសទៅកាន់ទីទួលសុវត្ថិភាព។ ពួកគេកំពុងទទួលការសង្គ្រោះពីរដ្ឋាភិបាល និងកាកបាទក្រហម។ ក្នុងស្ថានភាពដ៏លំបាកនេះ កម្ពុជាត្រូវការជំនួយសង្គ្រោះបន្ទាន់ជាច្រើនទៀត។ ឯកអគ្គរាជទូតជប៉ុនប្រចាំកម្ពុជា លោក ម៉ាសាហ្វូមី គូរ៉ូគី បានមានប្រសាសន៍ថា ថ្វីដ្បិតតែអំណោយមនុស្សធម៌នេះ មានចំនួនតិចតួច ក៏ប៉ុន្តែ វាបានបង្ហាញពីទឹកចិត្តរបស់រដ្ឋាភិបាល និងប្រជាជនជប៉ុនចំពោះប្រជាជនកម្ពុជា។
ស្របពេលជាមួយគ្នានេះដែរ អភិបាលរាជធានីភ្នំពេញ លោកកែប ជុតិមា ក៏បានអំពាវនាវរកជំនួយពីសប្បុរសជននានាសម្រាប់សង្គ្រោះប្រជាពលរដ្ឋរងគ្រោះដោយទឹកជំនន់ក្នុងទីក្រុងភ្នំពេញផងដែរ។
ការអំពាវនាវនេះបានធ្វើឡើងតាមរយៈសេចក្តីប្រកាសព័ត៌មានជាសាធារណៈមួយនៅចុងសប្តាហ៍នេះ។ សេចក្តីប្រកាសព័ត៌មានឲ្យដឹងថា ទឹកនៅតែបន្តជន់លិចខណ្ឌចំនួន៤ របស់រាជធានីភ្នំពេញគឺ ខណ្ឌឬស្សីកែវ ខណ្ឌមានជ័យខណ្ឌសែនសុខ និងខណ្ឌដង្កោ។ ទឹកជំនន់បានបណ្តាលឲ្យលំនៅដ្ឋាន សាលារៀន វត្តអារាម មណ្ឌលសុខភាព ផ្លូវ ជាច្រើនកន្លែងក្នុងរាជធានី លិចលង់ដែលធ្វើឲ្យជីវភាពរស់នៅប្រចាំថ្ងៃរបស់ប្រជាពលរដ្ឋជាច្រើនស្ថិតក្នុងស្ថានភាពដ៏លំបាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ