រដ្ឋាភិបាល ដាក់ចេញនូវវិធានការ២ចំណុច ដើម្បីទប់ទល់នឹងគ្រោះទឹកជំនន់
នៅព្រឹកថ្ងៃចន្ទនេះ រដ្ឋាភិបាល បានបើកកិច្ចប្រជុំពិសេស ដោយសម្រេចដាក់ចេញនូវវិធានការ២ចំណុច ដើម្បីទប់ទល់គ្រោះទឹកជំនន់។ ទី១-វិធានការចំពោះមុខ និងទី២-វិធានការក្រោយទឹកស្រក។ នោះគឺរដ្ឋាភិបាលបានសម្រេចចំណាយលុយប្រមាណ ២០០ លានរៀល ប្រហែលជា ៥ម៉ឺនដុល្លារ សម្រាប់អាជ្ញាធរខេត្តនីមួយៗ ប្រើប្រាស់សម្រាប់ទប់ទល់នឹងគ្រោះទឹកជំនន់។ ចំណែកអង្ករប្រមាណ ១៧០០ តោន ក៏ត្រូវបានបញ្ជូនទៅកាន់ខេត្ត ដែលលិចលង់ ដោយលោកនាយករដ្ឋមន្ត្រី ហ៊ុនសែន បានដាក់បទបញ្ជាថា មិនឲ្យប្រជាជនខ្មែរណាម្នាក់ ស្លាប់ដោយអត់បាយ ពេលទឹកជំនន់នៅគ្រានេះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
កិច្ចប្រជុំគណៈរដ្ឋមន្ត្រីពិសេស រយៈពេលប្រហែល ៤ ម៉ោង នៅព្រឹកថ្ងៃច័ន្ទនេះ រដ្ឋាភិបាលបានសម្រេចដាក់ចេញនូវវិធានការទប់ទល់នឹងគ្រោះទឹកជំនន់ ចំនួន ២ ចំណុច គឺទី១ វិធានការចំពោះមុខ និងទី២ វិធានការក្រោយពេលទឹកស្រក។ នេះបើតាមការបញ្ជាក់របស់លោក ខៀវ កាញារីទ្ធ អ្នកនាំពាក្យរដ្ឋាភិបាលកម្ពុជា។
លោក ខៀវ កាញារីទ្ធ បានមានប្រសាសន៍ថា វិធានការចំពោះមុខ សំខាន់គឺការដោះស្រាយ ធ្វើយ៉ាងណា ដើម្បីធានាកុំឲ្យមានអ្នកស្លាប់ ដោយអត់បាយ។ ក្នុងនោះ អភិបាលខេត្តទាំងអស់ ត្រូវនៅនឹងកន្លែង មិនត្រូវចេញទៅក្រៅប្រទេស ឬក៏មកប្រជុំនៅភ្នំពេញទេ។ អាជ្ញាធរខេត្តក៏ត្រូវសហការជាមួយកាកបាទក្រហម ដើម្បីបន្តផ្តល់ជំនួយដល់ប្រជាជនរងគ្រោះផងដែរ។
លោកខៀវកាញារីទ្ធ បានបន្ថែមថា រដ្ឋាភិបាលបានសម្រេចបញ្ជូនទៅកាន់ខេត្ត ដែលរងគ្រោះ ដោយទឹកជំនន់នូវកញ្ចប់ថវិកាចំនួន ២០០ លានរៀល ដើម្បីចុះទៅជួយសង្គ្រោះភ្លាមៗនៅតាមខេត្តនីមួយៗ រួមទាំងអង្ករមួយចំនួនទៀត។
ចំណែកវិធានការក្រោយពេលទឹកស្រក ត្រូវបានលោក ខៀវ កាញារីទ្ធ បញ្ជាក់ថា សំខាន់គឺស្តារដំណាំស្រូវឡើងវិញ ឬកន្លែងណា ដាំស្រូវមិនបាន គឺយើងធ្វើដំណាំផ្សេង និងទី២ ត្រូវពិនិត្យលើសុខភាពប្រជាជន នៅពេលទឹកស្រក ព្រមទាំងត្រៀមខ្លួន ដើម្បីស្តារផ្លូវ ដែលខូចខាត។
លោករដ្ឋមន្ត្រី ខៀវ កាញារីទ្ធ ក៏បានលើកយករបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ មកបង្ហាញថា មកដល់ថ្ងៃ២៦កញ្ញានេះ ទឹកជំនន់បានលិចលង់ខេត្តចំនួន ១៤ ក្នុងស្រុកចំនួន ៨៧ និងមានប្រជាជន ៩០.៣០៣ គ្រួសារ ត្រូវរងគ្រោះ។ ក្នុងនោះ មានអ្នកស្លាប់ដោយទឹកជំនន់សរុបចំនួន ៦១ នាក់ ដែលមានកុមារ ៣៤ នាក់។
ចំណែកប្រជាជន ១៣.៤០២ គ្រួសារ ត្រូវបានជម្លៀសទៅកាន់ទីទួលសុវត្ថិភាព។ ផ្ទះប្រជាជនចំនួន ៨៣.០០៧ ខ្នង ត្រូវបានលិចលង់ ហើយផ្ទះចំនួន ២៣៨ ខ្នង ត្រូវបានបំផ្លាញដោយទឹកជំនន់។
អំពីស្ថានភាពទឹកជំនន់ ត្រូវបានលោក ម៉ៅ ហាក់ អគ្គនាយករង ទទួលបន្ទុកកិច្ចការបច្ចេកទេស និងជាប្រធាននាយកដ្ឋានជលសាស្ត្រ នៃក្រសួងធនធានទឹក និងឧតុនិយម បានបញ្ជាក់ថា ទឹកទន្លេមេគង្គនៅផ្នែកខាងលើ ដូចជា នៅខេត្តស្ទឹងត្រែង ក្រចេះ និងខេត្តកំពង់ចាម បានចាប់ផ្តើមស្រកចុះហើយ គិតមកដល់ថ្ងៃទី២៦កញ្ញានេះ។
រីឯនៅទន្លេមេគង្គ ផ្នែកខាងក្រោម ដូចជា នៅភ្នំពេញ និងនៅទន្លេសាក់ ទន្លេសាប ទឹកនៅឡើងបន្តិចបន្តួច រហូតដល់ទី២៨កញ្ញា ទើបស្រកចុះ។ ដោយឡែកទឹកជំនន់ទឹកភ្លៀង នៅតាមស្ទឹង ដែលលិចលង់ខេត្តសៀមរាប និងខេត្តកំពង់ធំ បានស្រក់ចុះបណ្តើរៗហើយ។
តាមមន្ត្រីជំនាញឧតុនិយម ពេលនេះ មានព្យុះ ២ទៀត កំពុងកើតមាននៅមហាសមុទ្រ ប៉ាស៊ីហ្វិក ក៏ប៉ុន្តែព្យុះនោះ នឹងជះឥទ្ធិពលខ្សោយលើប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ