កិច្ចប្រជុំអន្តរជាតិចំនួន១០ក្នុងក្របខណ្ឌអាស៊ាននៅហាណូយ
ប្រមុខរដ្ឋាភិបាលខ្មែរលោកហ៊ុន សែនបានចេញដំណើរទៅទីក្រុងហាណូយហើយកាលពីព្រឹកថ្ងៃ២៨តុលានេះ ដើម្បីចូលរួមកិច្ចប្រជុំកំពូលអាស៊ានលើកទី១៧ និងកិច្ចប្រជុំអន្តរជាតិជាច្រើនទៀតក្នុងក្របខណ្ឌអាស៊ាន។ ដោយឡែកនៅកម្ពុជាវិញ រដ្ឋមន្ត្រីការបរទេសអាមេរិក លោកស្រីហ៊ីលឡារី គ្លីនតុននឹងមកបំពេញទស្សនកិច្ចរយៈពេល៣ថ្ងៃពីថ្ងៃទី៣០តុលាដល់ថ្ងៃទី១វិច្ឆិកា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
លោកនាយករដ្ឋមន្ត្រីហ៊ុន សែនបានដឹកនាំគណៈប្រតិភូជាន់ខ្ពស់របស់កម្ពុជា ទៅកាន់តុប្រជុំកំពូលអាស៊ានលើកទី១៧នៅក្នុងទីក្រុងហាណូយប្រទេសវៀតណាម។ រដ្ឋមន្ត្រីការបរទេស រដ្ឋមន្ត្រីក្រសួងពាណិជ្ជកម្ម និងរដ្ឋមន្ត្រីអមប្រតិភូនាយករដ្ឋមន្ត្រីបានអមដំណើរលោកហ៊ុន សែនចេញពីប្រទេសកម្ពុជាកាលពីព្រឹកថ្ងៃព្រហស្បតិ៍ទី២៨តុលានេះ។
នៅក្នុងក្របខណ្ឌនៃកិច្ចប្រជុំកំពូលអាស៊ាននេះ កិច្ចប្រជុំទ្វេភាគី និងពហុភាគីរវាងអាស៊ាន និងដៃគូជាច្រើននឹងត្រូវរៀបចំធ្វើជាបន្តបន្ទាប់គ្នា។ កិច្ចប្រជុំដែលត្រូវផ្តើមប្រព្រឹត្តពីថ្ងៃទី២៨ដល់ថ្ងៃទី៣០តុលា។ កិច្ចប្រជុំទាំងនោះរួមមានៈ កិច្ចប្រជុំអាស៊ានបូក៣ អាស៊ានបូកចិន អាស៊ានបូកជប៉ុន អាស៊ានបូកសាធារណរដ្ឋកូរ៉េ អាស៊ាន-អង្គការសហប្រជាជាតិ អាស៊ានបូករុស្ស៊ី ឥណ្ឌា អូស្ត្រាលី និងកិច្ចប្រជុំរំលឹកខួបអាស៊ាន នូវែលហ្សេឡង់។
នៅមុនពេលចេញដំណើរពីប្រទេសកម្ពុជា លោកស្រ៊ី ថាមរុង្គ រដ្ឋមន្ត្រីអមប្រតិភូនាយករដ្ឋមន្ត្រីបានថ្លែងប្រាប់អ្នកសារព័ត៌មានអោយដឹងថា កិច្ចប្រជុំអាស៊ាន និងកិច្ចប្រជុំផ្សេងៗទៀតទាំងនេះ នឹងផ្តោតទៅលើសហគមន៍អាស៊ានឆ្នាំ២០១៥ ដែលក្នុងនោះរួមមានការដោះស្រាយបញ្ហាសេដ្ឋកិច្ច នយោបាយ និងសន្តិសុខក្នុងតំបន់។ បើយោងតាមមន្ត្រីជាន់ខ្ពស់រូបនេះដដែល កិច្ចប្រជុំកំពូលនានាក្នុងក្របខណ្ឌអាស៊ាន ក៏នឹងផ្តោតផងដែរទៅលើបញ្ហាសន្តិសុខស្បៀង និងការប្រែប្រួលអាកាសធាតុ។
ដោយឡែក ព័ត៌មានមួយផ្សេងទៀតទាក់ទងនឹងដំណើរទស្សនកិច្ចផ្លូវការរបស់រដ្ឋមន្ត្រីក្រសួងការបរទេសសហរដ្ឋអាមេរិក លោកស្រីហ៊ីលឡារី គ្លីនតុន ក្រសួងការបរទេសកម្ពុជាបានផ្សព្វផ្សាយជាផ្លូវការហើយ ថាលោកស្រីប្រមុខការទូតអាមេរិកនឹងមកដល់ក្រុងសៀមរាបនៅថ្ងៃទី៣០តុលា ដើម្បីទស្សនាប្រាសាទអង្គរវត្តរហូតដល់ថ្ងៃទី៣១តុលា។ នៅថ្ងៃទី១វិច្ឆិកា លោកស្រីហ៊ីលឡារី គ្លីនតុននឹងចូលក្រាបបង្គំព្រះមហាក្សត្រ ព្រះបាទ ព្រះបរមនាថ នរោត្តម សីហមុនី ជួបសម្តែងការគួរសមជាមួយលោកនាយករដ្ឋមន្ត្រីហ៊ុន សែន និងជួបពិភាក្សាទ្វេភាគីជាមួយលោករដ្ឋមន្ត្រីការបរទេសហោ ណាំហុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ