ជំនួបកំពូលអាស៊ានលើកទី ១៧ចាប់ផ្តើមជាមួយនឹងអវត្តមានប្រធានាធិបតីឥណ្ឌូនេស៊ី
ចាប់ពីថ្ងៃព្រហស្បតិ៍ ទី២៨ រហូតដល់ថ្ងៃសៅរ៍ ទី៣០ តុលា សមាជិកទំាង ១០ ប្រទេសរបស់សមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន នឹងចាប់ផ្តើមបើកជំនួបកំពូលលើកទី ១៧ របស់ខ្លួននៅក្នុងទីក្រុងហាណូយ ប្រទេសវៀតណាម។ ក្រៅពីជំនួបរវាងប្រទេសអាស៊ានទំាង ១០ ក៏មានជំនួបកំពូលអាស៊ានជាមួយប្រទេសដៃគូផ្សេងទៀត។ តើកម្មវីធីទំាង ៣ថ្ងៃនៃជំនួបកំពូលអាស៊ានលើកទី ១៧ និងអាស៊ានជាមួយប្រទេសដៃគូមានអ្វីខ្លះ ?
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គួច គន្ធារ៉ា ពីទីក្រុងហាណូយ
ជំនួបកំពូលអាស៊ានលើកទី ១៧ និងជំនួបកំពូលអាស៊ានជាមួយប្រទេសដៃគូផ្សេងទៀត ត្រូវរៀបចំឡើងនៅក្នុងមជ្ឈមណ្ឌលសន្និសីទជាតិ ដែលស្ថិតនៅក្នុងស្រុកមួយឈ្មោះ ម៉ីដីញ។ ស្រុកម៉ីដីញដែលស្ថិតនៅចម្ងាយប្រមាណជា ១០គីឡូម៉ែត្រ ពីទីក្រុងហាណូយ។ តាមកម្មវិធីដែលបានគ្រោងទុកសម្រាប់រយៈ៣ថ្ងៃ រួមមាន ៖
ទីមួយ គឺកិច្ចប្រជុំកំពូលអាស៊ានលើកទី ១៧ ដែលចូលរួមដោយប្រមុខរដ្ឋ និងប្រមុខរដ្ឋាភិបាលទំាង ១០ប្រទេសជាសមាជិក។
ទីពីរ គឺកិច្ចប្រជុំកំពូលអាស៊ាន-ជប៉ុន ប្រទេសជប៉ុនដែលបានក្លាយជាដៃគូសន្ទនាពេញសិទ្ធិរបស់អាស៊ាន នៅឆ្នំា ១៩៧៧ និងជាដៃគូពាណិជ្ជកម្មធំបំផុតរបស់អាស៊ាន ដែលបានរួមចំណែកជាង ១២% នៃពាណិជ្ជកម្មសរុបរបស់អាស៊ាន។
ទីបី គឺកិច្ចប្រជុំកំពូលអាស៊ាន-កូរ៉េខាងត្បូង។ កូរ៉េខាងត្បូងដែលបានក្លាយជាដៃគូសន្ទនាពេញសិទ្ធិរបស់អាស៊ាន នៅឆ្នំា ១៩៩១។
ទីបួន គឺកិច្ចប្រជុំកំពូលអាស៊ាន-ចិនលើកទី ១៣។ ចិនដែលបានក្លាយជាដៃគូសន្ទនាពេញសិទ្ធិរបស់អាស៊ាន នៅឆ្នំា ១៩៩៦។
ទីប្រាំ គឺកិច្ចប្រជុំកំពូលអាស៊ានបូក ៣។ ៣ប្រទេសមានចិន កូរ៉េខាងត្បូង និងជប៉ុន។ កិច្ចសហប្រតិបត្តិការអាស៊ានបូក ៣ ដែលបានចាប់ផ្តើមក្រៅផ្លូវការនៅឆ្នំា ១៩៩៧ និងជាផ្លូវការនៅឆ្នំា ១៩៩៩។
ទីប្រាំមួយ គឺកិច្ចប្រជុំកំពូលអាស៊ាន-ឥណ្ឌាលើកទី ៨។ ឥណ្ឌាដែលបានក្លាយជាដៃគូសន្ទនាពេញសិទ្ធិរបស់អាស៊ាន នៅឆ្នំា ១៩៩៥។
ទីប្រាំពីរ គឺកិច្ចប្រជុំកំពូលអាស៊ីបូព៌ាលើកទី ៥។
ទីប្រាំបី គឺកិច្ចប្រជុំកំពូលអាស៊ាន-អូស្រ្តាលី។ ប្រទេសអូស្រ្តាលីដែលជាដៃគូសន្ទនាពេញសិទ្ធិដំបូងគេរបស់អាស៊ាន នៅឆ្នំា ១៩៧៤។
ទីប្រាំបួន គឺកិច្ចប្រជុំកំពូលរម្លឹកខួបអនុស្សាវរីយ៍អាស៊ាន-នូវែលហ្សេឡង់។ ប្រទេសនូវែលហ្សេឡង់ដែលបានក្លាយជាដៃគូសន្ទនាពេញសិទ្ធិរបស់អាស៊ាន នៅឆ្នំា ១៩៧៥។
ទីដប់ គឺកិច្ចប្រជុំកំពូលអាស៊ាន-រុស្ស៊ីលើកទី ២។ ប្រទេសរុស្ស៊ីដែលបានក្លាយជាដៃគូសន្ទនាពេញសិទ្ធិរបស់អាស៊ាន នៅឆ្នំា ១៩៩៦។
ចុងក្រោយ គឺកិច្ចប្រជុំកំពូលអាស៊ាន-អង្គការសហប្រជាជាតិលើកទី ៣។ កិច្ចប្រជុំកំពូលអាស៊ាន-អង្គការសហប្រជាជាតិលើកទី ១ នៅក្នុងទីក្រុងបាងកក ប្រទេសថៃ កាលពីឆ្នំា ២០០០ និងលើកទី ២ ក្នុងឆ្នំា ២០០៥ នៅទីស្នាក់ការអង្គការសហប្រជាជាតិ។
ប្រមុខរដ្ឋ និងប្រមុខរដ្ឋាភិបាលបានផ្តើមមកដល់ ជាបណ្តើរៗហើយ តំាងតែពីដើមសប្តាហ៍នេះមក។ សម្រាប់កម្ពុជា លោកនាយករដ្ឋមន្រ្តី ហ៊ុន សែន នឹងអញ្ជើញមកដល់នៅថ្ងៃព្រហស្បតិ៍ ទី២៨ តុលាស្អែក។
ទាក់ទងនឹងប្រទេសឥណ្ឌូនេស៊ីវិញ លោកប្រធានាធិបតី Susilo Bambang Yudhoyono ដែលទើបអញ្ជើញមកដល់នៅថ្ងៃអង្គារ ទី២៦ តុលាម្សិលមិញ បានចាកចេញជាបន្ទាន់ទៅប្រទេសវិញ។ ការចាកចេញ ដោយសារតែឥណ្ឌូនេស៊ីទើបទទួលរងគ្រោះធម្មជាតិចំនួនពីរ គឺការផ្ទុះភ្នំភ្លើង Merapi កាលពីយប់មិញ និងគ្រោះរញ្ជួយដី បង្កជារលកយក្សស៊ូណាមី នៅកោះស៊ូម៉ាត្រា។
ព័ត៌មានចុងក្រោយដែលយើងទទួលបាននៅទីនេះ លោក Yudhoyono អាចនឹងត្រឡប់មកចូលរួមជំនួបកំពូលអាស៊ាន នៅថ្ងៃចុងក្រោយ គឺថ្ងៃ សៅរ៍ ទី៣០ តុលា។ សូមជម្រាបជូនថា ប្រទេសឥណ្ឌូនេស៊ីនឹងត្រូវធ្វើជាម្ចាស់ផ្ទះ រៀបចំជំនួបកំពូលអាស៊ានលើកទី ១៨ និង១៩ នៅឆ្នំាក្រោយ ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ