កម្មករបន្តឈប់សម្រាកឈានចូលថ្ងៃទីពីរក្រោយចូលឆ្នាំខ្មែរ
ក្រុមមេដឹកនាំសហជីពបានអះអាងពីការបន្តកូដកម្មរបស់កម្មករ ដើម្បីទាមទារឲ្យមានការដោះលែងអ្នកជាប់ឃុំ ២១នាក់ និងដំឡើងប្រាក់ឈ្នួល អប្បបរមា ១៦០ដុល្លារក្នុងមួយខែ។ ការបន្តកូដកម្មមិនចូលធ្វើការក្រោយចូលឆ្នាំខ្មែរ ដោយប្រើប្រាស់ការឈប់សម្រាកប្រចាំឆ្នាំរបស់កម្មករ ត្រូវក្រសួងការងារអំពាវនាវឲ្យមានការស្ងាត់ស្ងៀម និងពិចារណា រង់ចាំការជជែកគ្នា ដោយមានជំនួយបច្ចេកទេស ពីអង្គការ ILO។
ចុះផ្សាយនៅថ្ងៃ៖
ស្តាប់ - ០២:២៨
ក្រុមមេដឹកនាំសហជីព ដែលគាំទ្រការតវ៉ាដំឡើងប្រាក់ឈ្នួលកម្មករនៃវិស័យឧស្សាហកម្មកាត់ដេរ និងដេរស្បែកជើង បានប្រកាសថា មានកម្មករប្រមាណជា ៧០ភាគរយ បានសម្រាកនៅផ្ទះ និងមិនចូលធ្វើការ នៅថ្ងៃទីពីរ នៃការធ្វើពហិការរបស់ពួកគេបន្ទាប់ពីបុណ្យចូលឆ្នាំខ្មែរ។
លោក អាត់ ធន់ ប្រធានសហភាពការងារកម្ពុជា ដែលគ្រប់គ្រងសហម្ព័ន្ធសហជីពជាច្រើន រួមមានវិស័យសំណង់ និងសេដ្ឋកិច្ចក្រៅប្រព័ន្ធដែរនោះ បានប្រាប់វិទ្យុបារាំងអន្តរជាតិ RFI នៅថ្ងៃសុក្រនេះថា ចំនួនកម្មករដែលបានធ្វើពហិការការងារបានថយចុះមកត្រឹម៧០ ភាគរយ ធៀបនឹងថ្ងៃម្សិលមិញ ដែលមានពី៨០ ទៅ៩០ភាគរយ។
តាមការប្រកាសពីលោក អាត់ ធន់ កម្មករប្រមាណជាជិត១០០ រោងចក្រ នៃតំបន់សេដ្ឋកិច្ចពិសេសស្វាយរៀង នឹងធ្វើពហិការការងារឡើងវិញនៅលា្ងចថ្ងៃសុក្រ។គួរបញ្ជាក់ថាគោលដៅនៃការឈប់សម្រាករបស់កម្មករព្រមៗគ្នាបន្ទាប់ពីបុណ្យចូលឆ្នាំ គឺដើម្បីដាក់សម្ពាធទៅលើរដ្ឋាភិបាល ដើម្បីតម្លើងប្រាក់ខែគោល ១៦០ដុល្លារក្នុងមួយខែ ស្នើសុំឲ្យមានការដោះលែងអ្នកជាប់ឃុំ ២១នាក់ និងទាមទារលក្ខខណ្ឌការងារមួយចំនួនទៀត។
ជុំវិញការធ្វើកូដកម្មនេះ ដោយប្រើប្រាស់រូបភាពពេលវេលាឈប់សម្រាកប្រចាំឆ្នាំនោះ មេដឹកនាំសហជីពកម្មកររូបនេះ បញ្ជាក់ថា លោកនឹងរង់ចាំមើលលទ្ធផលនៅថ្ងៃស្អែក ថាតើកម្មករនឹងអាចឈប់សម្រាក បានប៉ុន្មាននាក់ តាមសំណើរដែលដាក់រួមគ្នាដោយសហជីពទៅកាន់សមាគមរោងចក្រកាត់ដេរនៅកម្ពុជា GMAC កាលពីមុនចូលឆ្នាំខ្មែរ។
សំណើឈប់សម្រាកបន្តពីបុណ្យចូលឆ្នាំចាប់ពីថ្ងៃទី១៧ខែមេសា ដល់ថ្ងៃទី២២ខែមេសា ដោយប្រើប្រាស់ការឈប់សម្រាកប្រចាំឆ្នាំរបស់កម្មករ ត្រូវGMAC ទាត់ចោល និងបានពន្យល់តាមអង្គហេតុនិងអង្គច្បាប់ថាសហជីពមិនអាចធ្វើទៅកើតទេ ចំពោះការ សុំច្បាប់ជួសមុខឲ្យកម្មករទាំងអស់ ព្រោះថាវាខុសនឹងច្បាប់ការងារកម្ពុជា។ ក៏ប៉ុន្តែក្រុមមេដឹកនាំសហជីពបញ្ជាក់ថា ទង្វើរបស់ពួកគេ គឺធ្វើឡើងស្របទៅនឹងអនុសញ្ញាអង្គការពលកម្មអន្តរជាតិ ILO ដែល ប្រទេសកម្ពុជា ជាហត្ថលេខីផងដែរ។
ជាមួយគ្នានេះ លោក ហេង សួគ៌ អ្នកនាំពាក្យក្រសួងការងារ បានហៅការគម្រាមកូដកម្មរបស់សហជីពកម្មករថាជារឿងមួយហួសសម័យ ខណៈដែលរដ្ឋាភិបាលកម្ពុជាកំពុងស្នើសុំជំនួយបច្ចេកទេសនិងទទួលយកកម្មវិធីការងារតាំងអស់ពី ILO។ លោក ហេង សួគ៌ បញ្ជាក់ថាតំណាក់កាលនេះភាគីទាំងអស់គួរតែសិក្សាស្រាវជ្រាវឲ្យបានច្បាស់លាស់រង់ចាំជជែកគ្នាដោយមានជំនួយបច្ចេកទេសរបស់ILO ហើយមិនគួរលើកយកតួលេខណាមួយមកនិយាយដោយគ្មានមូលដ្ឋានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ