គណបក្សទាំងពីរខ្វែងគំនិតគ្នាលើនីតិវិធីជ្រើសរើសក្បាលម៉ាស៊ីន គ.ជ.ប
គណបក្សប្រជាជនកម្ពុជានិងគណបក្សសង្គ្រោះជាតិ បានជួបប្រជុំគ្នាដូចការគ្រោងទុកមែននៅថ្ងៃព្រហស្បតិ៍ ទី១២ មិថុនានេះ។ ប៉ុន្តែការជជែកគ្នារវាងក្រុមចរចាគណបក្សទាំងពីរបានខ្ទាស់ត្រង់ចំណុចជ្រើសរើសក្បាលម៉ាស៊ីនគណៈកម្មាធិការជាតិរៀបចំការបោះឆ្នោត។ យ៉ាងណាក៏ដោយ គណបក្សប្រជាជនកម្ពុជា អះអាងថានៅតែរក្សាការចរចាជាបន្តទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ការជ្រើសរើសក្បាលម៉ាស៊ីនគណៈកម្មាធិការជាតិរៀបចំការបោះឆ្នោត គឺជាចំណុចខ្ទាស់គ្នារវាងក្រុមចរចានៃគណបក្សដែលកំពុងមានជម្លោះទាំងពីរ។ គណបក្សសង្គ្រោះជាតិគឺចង់ឱ្យមានការជ្រើសរើសសមាសភាពដឹកនាំគ.ជ.បដោយសំឡេងសមាជិកក្នុងសភាចំនួន២/៣ ប៉ុន្តែគណបក្សប្រជាជនអះអាងថា ការជ្រើសរើសក្បាលម៉ាស៊ីនត្រូវតែប្រើប្រាស់សំឡេង ដាច់ខាត ៥០+។ ពោលគឺយោងតាមច្បាប់វិសោធនកម្មកាលពីឆ្នាំ២០០៦កន្លងទៅ។
នៅក្រោយកិច្ចប្រជុំអស់រយៈពេលប្រមាណជាង១ម៉ោង ភាគីគណបក្សសង្គ្រោះជាតិមិនបានធ្វើសន្និសីទសារព័ត៌មាននោះទេ។ ប៉ុន្តែភាគីគណបក្សប្រជាជនកម្ពុជាដែលដឹកនាំដោយលោក ព្រុំ សុខា បានធ្វើសនិ្នសីទសារព័ត៌មាន។
លោក ព្រុំ សុខា រដ្ឋលេខាធិការក្រសួងមហាផ្ទៃ និងជាប្រធានក្រុមចរចាខាងគណបក្សប្រជាជនកម្ពុជា បានបញ្ជាក់ថា សំណើសុំរបស់គណបក្សសង្គ្រោះជាតិ គឺផ្ទុយពីច្បាប់។ បើតាមលោក ព្រុំ សុខា ដដែល ការទាមទាររបស់ភាគីគណបក្សសង្គ្រោះជាតិ ២/៣នេះ គឺបង្ហាញពីការមិនទុកចិត្តគ្នារវាងគណបក្សទាំងពីរនោះទេ។ ដោយមិនបាននិយាយចំចំពោះករណីខ្វែងគ្នានេះ គឺបណ្តាលឱ្យគាំងដំណើរការឈានទៅរកការចរចាបញ្ចប់ជម្លោះនយោបាយដែលបានអូសបន្លាយអស់រយៈពេលមួយខែនេះទេ។
នៅក្នុងការចរចានៅថ្ងៃព្រហស្បតិ៍នេះ ប្រព័ន្ធផ្សព្វផ្សាយរបស់បក្សប្រឆាំង គឺមិនមាននៅក្នុងរបៀបវារៈនោះទេ។ ពោលគឺនិយាយចរចាតែពីចំណុចការដាក់បញ្ចូលទៅក្នុងជំពូកនៃរដ្ឋធម្មនុញ្ញតែប៉ុណ្ណោះ។ បើតាមភាគីគណបក្សប្រជាជនកម្ពុជា ជំពូក១៥ ដែលស្តីពីគណៈកម្មាធិការជាតិរៀបចំការបោះឆ្នោតនោះ គឺមានចំនួនតែ២មាត្រាតែប៉ុណ្ណោះ។ មាត្រាទី១ គឺចែងពី មុខងារនិងតួនាទី និងភាពអព្យាក្រិតភាពនៃគណៈកម្មាធិការជាតិរៀបចំការបោះឆ្នោត។ និងទី២ គឺលក្ខណៈសម្បតិ្តនៃការជ្រើសតាំងបេក្ខជនដឹកនាំនៃគណៈកម្មការបោះឆ្នោត។ បើតាមលោក ព្រុំ សុខា ដដែល និតិវិធីនៃកិច្ចដំណើរការបោះឆ្នោតគឺត្រូវចង្អុលចូលទៅក្នុងច្បាប់រៀបចំចាត់តាំងអង្គការ។
សូមបញ្ជាក់ថា ការជួបចរចាគ្នាជាផ្លូវការណ៍សារជាថ្មីនេះ បន្ទាប់ពីថ្នាក់ដឹកនាំគណបក្សប្រជាជនកម្ពុជា លោកនាយករដ្ឋមន្ត្រីហ៊ុន សែន បានយល់ព្រមតាមសំណើរបស់គណបក្សសង្គ្រោះជាតិរបស់លោក សម រង្ស៊ី លើការដាក់បញ្ចូលគ.ជ.ប ទៅជាច្បាប់រដ្ឋធម្មនុញ្ញ និងការអនុញ្ញាតឱ្យបក្សប្រឆាំងមានប្រព័ន្ធផ្សព្វផ្សាយ។
លោក ព្រុំ សុខា បានស្នើឱ្យបក្សសង្គ្រោះជាតិ ពិចារណាឡើងវិញនូវការសម្បទានពីគណបក្សប្រជាជនកម្ពុជា។ ព្រោះថា រដ្ឋសភាជាតិ បានបង្កើតបន្ថែមនូវគណៈជំនាញរដ្ឋសភារហូតដល់១០ដែលបក្សទាំងពីរមានម្នាក់៥ គណៈកម្មការ។ ហើយគណៈអចិន្ត្រៃយ៍វិញ គឺបានបន្ថែមរហូតដល់ ១៣ ដែលគណៈបក្សសង្គ្រោះជាតិទទូលបាន៦ បក្សប្រជាជន៧ គណៈអចិន្ត្រៃយ៍។ មួយវិញទៀតគណបក្សសង្គ្រោះជាតិនឹងទទួលបានដំណែង អនុប្រធានទី១នៃរដ្ឋសភាផងដែរ។
ប៉ុន្តែយ៉ាងណាក៏ដោយ គណបក្សប្រជាជនកម្ពុជាតាមរយៈលោក ព្រុំ សុខា បានអះអាងថា បើថ្នាក់ចរចាបច្ចេកទេសមិនទាន់អាចសម្រេចអ្វីបាននោះ ជំនូបកំពូល និងការបិទបញ្ចប់ជម្លោះនយោបាយក៏ពិបាកនឹងទៅរួចនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ