ក្រុមការងារបក្សទាំងពីរជួបគ្នាថ្ងៃស្អែក ដើម្បីជជែកកំណែទម្រង់គ.ជ.ប និងការបង្កើតទូរទស្សន៍បក្សប្រឆាំង
ភ្លាមៗក្រោយការប្រកាសយល់ព្រមពីលោកនាយករដ្ឋមន្ត្រីហ៊ុន សែន បញ្ជូលគ.ជ.បទៅក្នុងច្បាប់រដ្ឋធម្មនុញ្ញ និងអនុញ្ញាតឱ្យបក្សប្រឆាំងបង្កើតប៉ុស្តិ៍ទូរទស្សន៍ខ្លួនឯងបាននោះ។ ក្រុមការងារនៃគណបក្សទាំងពីរ នឹងជួបចរចាគ្នានៅជាផ្លូវការណ៍ នៅវិមានព្រឹទ្ធសភា នៅថ្ងៃព្រហស្បតិ៍ស្អែកនេះ ដើម្បីនិយាយពីសម្រេច ពីការបញ្ចូលគ.ជ.បទៅជាជំពូកក្នុងរដ្ឋធម្មនុញ្ញ និងសំណើប្រព័ន្ធផ្សព្វផ្សាយរបស់បក្សប្រឆាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ក្រុមចរចារនៃគណបក្សប្រជាជនកម្ពុជា និងគណបក្សសង្គ្រោះជាតិ នឹងពិភាក្សាលំអិតពីការបញ្ចូលគណៈកម្មាធិការជាតិរៀបចំការបោះឆ្នោតចូលទៅជាជំពូកទី១៥នៃរដ្ឋធម្មនុញ្ញ និងការបង្កើតប៉ុស្តិ៍ទូរទស្សន៍របស់គណបក្សសង្គ្រោះជាតិ។
ក្រុមចរចារនៃគណបក្សទាំងពីរមានសមាសភាពម្ខាងចំនួន ៣រូប។ គណបក្សប្រជាជនកម្ពុជាដឹកនាំដោយ លោក ព្រុំ សុខា រដ្ឋលេខាធិការក្រសួងមហាផ្ទៃ និងអមដោយ លោក សក់ ស៊ីថា និងលោក កើត រិទ្ធ។ ដោយឡែកបក្សសង្គ្រោះជាតិ គឺដឹកនាំដោយលោក គួយ ប៊ុនរឿន តំណាងរាស្ត្រពីគណបក្សសង្គ្រោះជាតិ និងអមដោយ លោកអេង ឆៃអ៊ាង និងលោក យ៉ែម ប៉ុញ្ញឫទ្ធិ។ ការជួបចរចាសារជាថ្មីនេះ គឺកើតឡើងក្រោយពីប្រមុខដឹកនាំគណបក្សប្រជាជនកម្ពុជា លោកនាយករដ្ឋមន្ត្រីហ៊ុន សែន យល់ព្រមតាមសំណើររបស់គណបក្សសង្គ្រោះជាតិ កាលពីថ្ងៃអង្គារម្សិលមិញ។
ឆ្លើយប្រាប់វិទ្យុបារាំងអន្តរជាតិនៅព្រឹកថ្ងៃពុធនេះ លោកព្រុំ សុខា បានឱ្យដឹងថា ភាគីបក្សកាន់អំណាច បានរៀបចំឯកសារលំអិតរួចរាល់ហើយ សម្រាប់ដៃគូរចរចា។ ដោយឡែកតំណាងក្រុមចរចានៃគណបក្សសង្គ្រោះជាតិ លោក គួយ ប៊ុនរឿន បានអះអាងថាការចរចានៃកាលបរិច្ឆេទបោះឆ្នោតឡើងវិញ គឺជាតួនាទីនៃមេដឹកនាំនយោបាយកំពូល។
សូមរំលឹកជូនថា ក្រោយការចរចា ជាបន្តបន្ទាប់ក្រុមការងារបច្ចេកទេស នៃគណបក្សទាំងពីរបានសម្រេចចំណុចរួមចំនួន ១៤ចំណុច។ ក្រៅពីការបញ្ចូលគណៈកម្មាធិការជាតិរៀបចំការបោះឆ្នោតទៅក្នុងច្បាប់រដ្ឋធម្មនុញ្ញ និងប្រព័ន្ធផ្សព្វផ្សាយនោះ ក្នុងនោះក៏មានដែរ ច្បាប់ហិរញ្ញវត្ថុ ស្តីពីគណបក្សនយោបាយជាដើម។
ការជួបចរចាថ្នាក់បច្ចេកទេសសារជាថ្មីម្តងទៀត រវាងគណបក្សទាំងពីរនេះ ត្រូវបានគេមើលឃើញថា គឺជាតម្រុយដែលនឹងអាចឈានទៅបិទបញ្ចប់ជម្លោះនយោបាយ នៅកម្ពុជាដែលបានអូសបន្លាយអស់រយៈពេលជិតមួយឆ្នាំកន្លងមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ