តុលាការដាក់លោកប៉ាវ ស៊ីណាឱ្យនៅក្រោមការត្រួតពិនិត្យ
ប្រធានសហព័ន្ធសហជីពចលនាកម្មករ លោកប៉ាវ ស៊ីណានៅថ្ងៃសុក្រទី១២កញ្ញានេះ ត្រូវបានតុលាការសម្រេចដាក់ឱ្យនៅក្រោមការត្រួតពិនិត្យនិងហាមប្រាមការធ្វើសកម្មភាពនានា ក្នុងរឿងក្តីបាតុកម្មហិង្សានៅលើផ្លូវវ៉េងស្រេង។ ក្រុមអ្នកគាំទ្របានឈរប្រមូលផ្តុំគ្នានៅខាងមុខតុលាការសាលាដំបូងរហូតដល់បញ្ចប់ការសាកសួរ។
ចុះផ្សាយនៅថ្ងៃ៖
ស្តាប់ - ០២:០០
ក្រោយការសាកសួរអស់រយៈពេលជាង២ម៉ោង តុលាការសាលាដំបូងរាជធានីភ្នំពេញ បានសម្រចដាក់លោកប៉ាវ ស៊ីណាប្រធានសហព័ន្ធសហជីពចលនាកម្មករឱ្យស្ថិតនៅក្រោមការត្រួតពិនិត្យ និងហាមធ្វើសកម្មភាពនានា។ ជាការសម្រេចក្រោមបទចោទចំនួន៤ ពីដើមបណ្តឹងសមាគមរោងចក្រកាត់ដេរ១៣០រោងចក្រ និងមន្ត្រីប៉ូលិសខណ្ឌ ក្នុងសំណុំរឿងអំពើហិង្សានៅផ្លូវវ៉េងស្រេងកាលពីដើមឆ្នាំ២០១៤ ក្នុងយុទ្ធនាការដំឡើងប្រាក់ខែរបស់កម្មករ។ បទចោទទាំងបួននោះគឺ ទី១ បង្កអំពើហិង្សាដោយចេតនា ទី២ ការគំរាមគំហែង ទី៣បំផ្លិចបំផ្លាញទ្រព្យសម្បតិ្តឯកជន និងសាធារណៈ និងទី៤ គឺ ការបង្កការកកស្ទះចរាចរណ៍ជាដើម។
ថ្លែងទៅកាន់អ្នកសារព័ត៌មាន ក្រៅតុលាការសាលាដំបូងរាជធានីភ្នំពេញ លោកប៉ាវ ស៊ីណា បានបញ្ជាក់ថា ការចោទប្រកាន់នេះ គឺផ្ទុយពីការពិត។ ព្រោះថាលោកមិនមានវត្តមាននៅទីតាំងកើតហេតុដូចការចោទប្រកាន់នោះទេ។ លោកប៉ាវ ស៊ីណា គូសបញ្ជាក់ថា ការចោទប្រកាន់ និងដាក់ឱ្យនៅក្រោមការត្រួតពិនិត្យនេះ គឺជាការបង្អាក់សកម្មភាពរបស់សហជីពនានាក្នុងយុទ្ធនាការដំឡើងប្រាក់ឈ្នួលអប្បរមានៅថ្ងៃទី១៧ខាងមុខនេះតែប៉ុណ្ណោះ។
តាំងពីម៉ោងប្រមាណ៨កន្លះព្រឹកមក លោកប៉ាវ ស៊ីណា ដែលមានពាក់អាវពណ៌ផ្កាឈូក បានដើរចូលទៅកាន់តុលាការសាលាដំបូងរាជធានីភ្នំពេញ ក្រោមការស្រែកគាំទ្រពីក្រុមកម្មករដែលបានប្រមូលផ្តុំគ្នានៅម្ខាងផ្លូវព្រះមុនីរ៉េតខាងមុខតុលាការ។ កម្មករដែលមានកាន់បដាសឹងគ្រប់ៗគ្នា ប្រមាណ៥០នាក់ បានស្រែកឱ្យតុលាកាទម្លាក់ការចោទប្រកាន់ទាំងអស់លើលោកប៉ាវ ស៊ីណា និងបណ្តាសហជីពដែលពាក់ពន្ធ័ក្នុងសំណុំរឿងបាតុកម្មនៅផ្លូវវ៉េងស្រេងទាំងអស់។
សូមរំលឹកបន្តិចថា ក្រៅពីការលោកប៉ាវ ស៊ីណា មេដឹកនាំសហជីពកម្មករចំនួន៥រូបផ្សេងទៀត ដែលរួមមានលោក អាត់ ធន់ លោករ៉ុង ឈុន និងលោកជាមុនីជាដើម នឹងត្រូវចូលខ្លួនបំភ្លឺនៅតុលាការសាលាដំបូងរាជធានីភ្នំពេញជាបន្តបន្ទាប់។ បើទោះបីជាតុលាការសម្រេចឱ្យប្រធានសហព័ន្ធសហជីព លោកប៉ាវ ស៊ីណាឱ្យស្ថិតនៅក្រោមការត្រួតពិនិត្យរបស់តុលាការក៏ដោយ ក៏ប៉ុន្តែប្រធានសហជីពរូបនេះអះអាងខ្លួននៅតែបន្តសកម្មភាពរបស់ខ្លួនដដែល ក្នុងយុទ្ធនាការទាមទារដំឡើងប្រាក់ខែចាប់ពីថ្ងៃទី១៧ កញ្ញាតទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ