គ្រប់ទីតាំងទាំងអស់ក្នុងក្រុងភ្នំពេញនឹងមាននៅលើផែនទីGoogle ក្នុងពេលឆាប់ៗ
មិនយូរនោះឡើយ ទីតាំងផ្សេងៗនៅក្នុងរាជធានីភ្នំពេញដែលមិនទាន់មាននៅលើផែនទី Googleនោះ នឹងចាប់ផ្តើមមានក្នុងពេលឆាប់ៗខាងមុខនេះ។ បណ្តាញក្រុមយុវជនអាជីវកម្ម Googleប្រចាំនៅប្រទេសកម្ពុជា នៅព្រឹកថ្ងៃសៅរ៍ ទី២៩មីនា នេះបានរៀបចំចុះប្រតិបត្តិការស្រង់នូវទីតាំងក្នុងក្រុងភ្នំពេញមួយចំនួនដែលមិនទាន់មានក្នុងផែនទីGoogleដើម្បីបញ្ចូលទៅក្នុងផែនទីអេឡិចត្រូនិកនេះ។ គោលបំណងនៃប្រតិបត្តិការនេះ គឺដើម្បីផ្តល់ភាពងាយស្រួលដល់អ្នកធ្វើអាជីវកម្ម ភ្ញៀវទេសចរ និង ប្រជាពលរដ្ឋនានាស្វែងរកទីតាំងផ្សេងៗនៅក្នុងរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ទីតាំងមួយចំនួនក្នុងរាជធានីភ្នំពេញដូចជា សណ្ឋាគារ ភោជនីយដ្ឋាន និង មន្ទីរពេទ្យជាដើមនោះ ដែលមិនទាន់មាននៅលើផែនទី Googleនឹងចាប់ផ្តើមមានក្នុងពេលឆាប់ៗខាងមុខនេះ។បណ្តាញក្រុមយុវជនអាជីវកម្ម Google ប្រចាំនៅកម្ពុជា នៅព្រឹកថ្ងៃសៅរ៍ ទី២៩មីនា នេះបានចុះប្រមូល និងស្រង់នូវទីតាំងមួយចំនួនបន្ថែមទៀតដែលមិនទាន់មាននៅលើផែនទី Googleដើម្បីបញ្ចូនទៅក្នុងផែនទីអេឡិចត្រូនិកមួយនេះ។ បណ្តាញក្រុមយុវជនអាជីវកម្ម Googleបានជួបប្រជុំគ្នាជាមួយយុវជនស្ម័គ្រចិត្តប្រមាណជា ៣០នាក់ផ្សេងទៀតនៅភោជនីយដ្ឋាន Park Café ដើម្បីបង្ហាញពីបច្ចេកទេសប្រមូលស្ថិតិ និង ការចុះអនុវត្តផ្ទាល់។
លោក ពេជ្រ វិរៈ ប្រធានបណ្តាញក្រុមយុវជនអាជីវកម្ម Google ហៅកាត់ថា GBG ប្រចាំនៅរាជធានីភ្នំពេញ បានឲ្យដឹងថា នេះជាលើកទីមួយដែលក្រុមរបស់លោកចុះស្រង់ទីតាំងផ្សេងៗដែលមិនទាន់មាននៅលើផែនទី Google ហើយប្រមូលទិន្នន័យនេះបញ្ជូនទៅឲ្យក្រុមហ៊ុន Google ដើម្បីបញ្ចូលទៅក្នុងផែនទីរបស់ខ្លួន។ លោក បានបញ្ជាក់ថា គោលបំណងនៃការចុះប្រមូលទីតាំងដែលមិនទាន់មានទាំងនោះ គឺដើម្បីផ្តល់ភាពងាយស្រួលប្រជាពលរដ្ឋ ក៏ដូចជា អ្នកធ្វើអាជីវកម្ម និង ភ្ញៀវទេសចរស្វែងរកទីតាំងផ្សេងៗបន្ថែមទៀតនៅក្នុងរាជធានីភ្នំពេញ។
បណ្តាញក្រុមយុវជនអាជីវកម្ម Google និង យុវជនស្ម័គ្រដែលជានិស្សិតប្រមាណជា30 នាក់ផ្សេងទៀតបានចែកជាបួនក្រុម ចុះទៅបួនកន្លែងផ្សេងគ្នាក្នុងរាជធានីភ្នំពេញដើម្បីប្រមូល និង ស្រង់ទីតាំងដែលមិនទាន់មានក្នុងផែនទី Google ទាំងនោះ។
យ៉ាងណាក៏ដោយ លោក ពេជ្រ វិរៈ បានអះអាងថា ប្រហែលត្រូវការរយៈមួយសប្តាហ៍បន្ទាប់ពីដំណើរការប្រមូលទីតាំងទាំងនេះបញ្ជូនទៅក្រុមហ៊ុន Google ហើយ ទើបគេអាចស្វែងរកទីតាំងទាំងនោះបាននៅលើផែនទី Google។
សូមបញ្ជាក់ថា នៅខែដើមមេសា ខាងមុខនេះ ក្រុមហ៊ុន Google នឹងរៀបចំពិធីប្រកាសបញ្ចូលប្រទេសកម្ពុជាជាផ្លូវការនៅលើផែនទី Google។ កម្មវិធីនេះ នឹងរៀបចំធ្វើឡើងនៅលើទឹកដីអង្គរក្នុងខេត្តសៀមរាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ