បញ្ហាទំនាស់ដីធ្លីនៅតែអង្រួនទីក្រុងភ្នំពេញ
នៅថ្ងៃពុធទី ២៧ សីហានេះ ខណៈដែលសភាកម្ពុជាកំពុងតែដំណើរការជ្រើសរើសក្បាលម៉ាស៊ីនជាបន្តទៀតនោះ មានការប្រមូលផ្តុំតវ៉ាពីរផ្សេងគ្នាស្តីពីបញ្ហាដីធ្លីបានកើតឡើង។ នោះគឺបាតុកម្មតវ៉ារបស់អតីតអ្នកភូមិបឹងកក់ និង ប្រជាពលរដ្ឋភូមិឡពាង។មួយក្រុមតវ៉ានៅមុខសភា មួយក្រុមទៀតនៅខាងមុខផ្ទះលោកនាយករដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០១:៥៥
អ្នកភូមិឡពាងនិងអ្នកមានទំនាស់ដីធ្លីនៅឃុំតាជេសខេត្តកំពង់ឆ្នាំង រួមទាំងអតីតអ្នកភូមិបឹងកក់បានធ្វើបាតុកម្មតវ៉ាចំនួនពីរកន្លែងផ្សេងគ្នាក្នុងទីក្រុងភ្នំពេញ។ អតីតអ្នកភូមិបឹងកក់ដែលរងការបណ្តេញចេញ ប្រមាណ១០០នាក់ បានប្រមូលផ្តុំគ្នាដាក់ញត្តិនៅស្ថានទូតសិង្ហបូរីនិងស្រែកតវ៉ាក្បែរវិមានរដ្ឋសភា។ រដ្ឋសភាដែលកំពុងតែបន្តរបៀបវារៈប្រជុំរើសក្បាលម៉ាស៊ីនដឹកនាំរបស់ខ្លួន។ ប៉ុន្តែការប៉ុនប៉ងទៅកាន់មុខរដ្ឋសភាពីអតីតប្រជាពលរដ្ឋនៅតំបន់បឹងកក់ ដែលភាគច្រើនជាស្ត្រីនោះត្រូវបានរារាំងពីកងកម្លាំងរដ្ឋាភិបាលដែលបានដាក់ពង្រាយនៅជុំវិញរដ្ឋសភា។ ក្នុងលិខិតផ្ញើទូតសិង្ហបូរី ប្រជាពលរដ្ឋរងគ្រោះទាំងអស់ បានស្នើឱ្យប្រទេសសិង្ហបូរី និងក្រុមហ៊ុនពាក់ព័ន្ធដែលបានទិញដីតំបន់បឹងកក់ ត្រូវតែបញ្ឈប់សកម្មភាពរបស់ខ្លួន។
ដោយឡែកប្រជាពលរដ្ឋចំនួន៨២គ្រួសារ មកពីភូមិឡពាង និងភូមិចំនួន៤ផ្សេងទៀត នៅក្នុងខេត្តកំពង់ឆ្នាំង បានប្រមូលផ្តុំគ្នាដាក់ញត្តិស្វែងរកកិច្ចអន្តរាគមន៍ពីលោកនាយករដ្ឋមន្ត្រីហ៊ុន សែន ក្នុងជម្លោះដីធ្លីរ៉ាំរ៉ៃជាមួយក្រុមហ៊ុន KDC របស់លោកស្រីជាខេង ភិរិយាលោក ស៊ុយ សែម។ ក្នុងលិខិតស្វែងរកកិច្ចអន្តរាគមន៍ជាបន្តបន្ទាប់ទៅកាន់ស្ថាប័នរដ្ឋផ្សេង អ្នកភូមិឡពាងដែលបានធ្វើដំណើរដោយថ្មើជើងមកទីក្រុងភ្នំពេញនោះ បានសុំឱ្យដោះលែងតំណាងសកម្មជនដីធ្លីចំនួន៥រូបឱ្យមានសេរីភាពឡើងវិញ។ ដោះស្រាយបញ្ចប់ជម្លោះដីធ្លីឱ្យបាន និងបញ្ចប់ការចោទប្រកាន់នានាមកលើប្រជាពលរដ្ឋ។
សូមបញ្ជាក់ថា ឆ្លើយតបចំពោះបញ្ហាដីធ្លីនេះលោកនាយករដ្ឋមន្ត្រីហ៊ុន សែន កាលពីពេលថ្មីៗ បានបើកកិច្ចប្រជុំពិសេសមួយជាបន្ទាន់ដើម្បីដោះស្រាយវិវាទដីធ្លីដែលបានកើតឡើងទាំងទីក្រុងភ្នំពេញ និងតាមបណ្តាខេត្តមួយចំនួន។ ចំពោះទីក្រុងភ្នំពេញ អ្នកនាំពាក្យសាលារាជធានី លោកឡុងឌីម៉ង់ បានលើកឡើងថា បញ្ហាបូរីកីឡាគឺកំពុងដោះស្រាយបញ្ចប់តាមរយៈវេទិការសាធារណៈកាលពីពេលថ្មីៗ។ ចំណែកតំបន់បឹងកក់ គឺនៅសល់តែក្រុមគ្រួសារបន្តិចបន្តួចដែលឯកសារមិនទាន់ស្របគ្នាតែប៉ុណ្ណោះ។
យ៉ាងណាក៏ដោយ ការតវ៉ាពីអតីតអ្នកភូមិបឹងកក់ និងប្រជាពលរដ្ឋអ្នកភូមិឡពាងបានរំសាយហើយនៅព្រឹកថ្ងៃពុធនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ