ពលរដ្ឋខេត្តបាត់ដំបង និងព្រះសីហនុ រំលឹកពីវិវាទដីធ្លីចាស់ដល់ចៅហ្វាយខេត្តថ្មី
ប្រជាពលរដ្ឋដែលមានទំនាស់ដីធ្លីនៅតាមខេត្តមួយចំនួន ហាក់ដូចជាកក្រើកឡើងវិញហើយឡើងទៅតវ៉ារកខុសរកត្រូវ ដោយពួកគេបានស្នើសុំឲ្យអាជ្ញាធរខេត្តជួយដោះស្រាយឲ្យពួកគេប្រឈមនឹងក្រុមអ្នកមានលុយ និងអ្នកមានអំណាចមួយចំនួន។ ការឡើងតវ៉ាជាថ្មីលើរឿងដីធ្លីចាស់នេះ បានកើតឡើងបន្ទាប់ពីគណៈកម្មការមួយត្រូវបានបងើ្កតឡើង និងការស្តីបន្ទោសត្រង់ៗរបស់លោកនាយករដ្ឋមន្ត្រី ហ៊ុន សែន ទៅលើមន្ត្រីដែលស្ពឹកស្រពន់។
ចុះផ្សាយនៅថ្ងៃ៖
នៅតាមបណ្តាខេត្តនានានៅថ្ងៃចន្ទនេះ មានចលនាតវ៉ាដីធ្លីមួយចំនួនត្រូវគេកត់សម្គាល់ថាបានកើតឡើងដំណាលគ្នា។ ការចាប់ផ្តើមធ្វើការតវ៉ាសាជាថ្មីនេះបានកើតឡើងបន្ទាប់ពីលោកនាយករដ្ឋមន្ត្រី ហ៊ុន សែន បានស្តីបន្ទោសមន្ត្រីរបស់លោកជាសាធារណៈ កាលពីពេលថ្មីៗនេះ និងការបង្កើតគណៈកម្មការដោះស្រាយវិវាទដីធ្លីមួយជាបន្ទាន់។
ប្រជាពលរដ្ឋជាច្រើនគ្រួសារនៅក្នុងខេត្តចំនួនពីរ ក្នុងនោះមានខេត្តបាត់ដំបង និងខេត្តព្រះសីហនុ បាននាំគ្នាទៅដាក់ញត្តិតវ៉ានៅសាលាខេត្តដូចគ្នានៅថ្ងៃនេះ ដោយសារតែខេត្តទាំងពីរនេះសុទ្ធតែទើបតែផ្លាស់ប្តូរចៅហ្វាយខេត្តថ្មីដូចគ្នា។
មន្ត្រីអង្គការឃ្លាំមើលការរំលោភសិទ្ធិមនុស្សនៃសមាគមអាដហុក ប្រចាំខេត្តបាត់ដំបង លោក យិន ម៉េងលី ក៏ដូចជាអ្នកស្រី ជៀប សុធារី នៅខេត្តព្រះសីហនុដែរ បានអះអាងស្រដៀងគ្នាថា សំណុំរឿង និងបណ្តឹងផ្សេងៗដែលប្រជាជនបានដាក់ចូលទៅកាន់គណៈអភិបាលខេត្តចាស់ សុទ្ធតែមិនទាន់បានដោះស្រាយ និងដោះស្រាយប្រកបដោយភាពអយុត្តិធម៌។
រីឯអភិបាលនៃគណៈអភិបាលខេត្តថ្មីទាំងពីរសុទ្ធតែមិនទាន់បានដឹងពីសំណុំឯកសារដីធ្លីចាស់។ ហេតុដូច្នេះហើយទើប ប្រជាពលរដ្ឋដែលមានទំនាស់ដីធ្លីជាមួយនឹង អ្នកមាននិងឧកញ៉ា នាំគ្នាឡើងមកដាក់ញត្តិជាថ្មីដើម្បីផ្តល់ព័ត៌មាននេះ ចៅហ្វាយខេត្តថ្មី រួមទាំងទទូចឲ្យមានការដោះស្រាយជូនពួកគេចៀសវាងភាពរ៉ាំរៃជាទំលាប់ដូចកាលពីមុន។
លោក យិន ម៉េងលី តំណាង អាដហុកនៅខេត្តបាត់ដំបងបញ្ជាក់ថា នៅក្នុងខេត្តនោះមានប្រជាពលរដ្ឋចំនួន៣ក្រុម មកពីស្រុកបវិលខេត្តបាត់ដំបង ដែលកន្លងមកបញ្ហាដីធ្លីរបស់ពួកគាត់ មិនមានដំណោះស្រាយអ្វីជាក់ស្តែង មានតែការចោទប្រកាន់ និងចាប់ឃុំអ្នកតវ៉ា ថាបានរំលោភទៅលើដីរបស់ក្រុមហ៊ុន។ភាពព្រងើយកន្តើយរបស់អាជ្ញាធរខេត្តកន្លងមក ត្រូវបានរិះគន់ផងដែរពីមន្ត្រីការពាសិទ្ធិមនុស្សអាដហុក។
ដោយឡែកនៅឯខេត្តព្រះសីហនុវិញ តំណាងអាដហុកនៅទីនោះបញ្ជក់ថា មានប្រជាជនចំនួន៩សហគមន៍ ហើយមានបញ្ហាជម្លោះដីធ្លីជាមួយនឹងឧកញ៉ា និងអ្នកមានធនធានដែលការពារដោយអ្នកមានអំណាចមួយចំនួនផងដែរ។
មន្ត្រីនៅក្នុងគណៈកម្មការដោះស្រាយវិវាទដីធ្លី ដែលទើបតែបង្កើតថ្មីពុំអាចទាក់ទងបានទេ តែទោះយ៉ាងណាមន្ត្រីសាលាខេត្តទាំងពីរបានទទួលជួបជាមួយក្រុមអ្នកតវ៉ា និងយល់ព្រមទទួលយកបណ្តឹងពីពួកគេ ហើយបានប្រាប់ថានឹធ្វើការដោះស្រាយនៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ