សហរដ្ឋអាមេរិក
ទីក្រុងញូវយ៉កក្លាយជាទីក្រុងខ្មោច ពេលព្យុះសង្ឃរា Irène បក់កាត់
តាំងពីថ្ងៃសៅរ៍ ទី ២៧ ព្យុះកំបុតត្បូងIrène ដែលបោសសម្អាត ទីក្រុងជាប់មាត់សមុទ្រភាគខាងកើតអាមេរិកបានសម្លាប់មនុស្ស៩នាក់ និងធ្វើឲ្យមនុស្សជាង ១លាន គ្មានភ្លើងប្រើប្រាស់។ នៅថ្ងៃអាទិត្យនេះ ព្យុះសង្ឃរា Irène បានទៅដល់ទីក្រុងញូវយ៉ក ជាទីដែលមនុស្សជាង ២សែននាក់ត្រូវគេជម្លៀសចេញពីផ្ទះសម្បែង។
ចុះផ្សាយនៅថ្ងៃ៖
ស្តាប់ - ០១:៤៩
ផ្សាយពាណិជ្ជកម្ម
វាគឺជារឿងស្លាប់ និងរស់។ បើនរណាមិនបានចាកចេញទេ គេត្រូវស្ថិតនៅកន្លែងដដែល និងមិនត្រូវផ្លាស់ទីទេ ព្រោះវាយឺតពេលហើយ។ នេះជាសំដីដាស់តឿនរបស់ចៅហ្វាយក្រុងញូវយ៉ក នៅពេលព្យុះសង្ឃរា Irèneបក់ខិត កាន់តែចូលជិតទីក្រុងញូវយ៉ក។
ទីក្រុងញូវយ៉ក ដែលជាទីក្រុងសេដ្ឋកិច្ច ទេសចរណ៍អាមេរិក បានប្រែក្លាយជា ទីក្រុងខ្មោច គ្មានមនុស្សដើរ ដែលនេះ មិនធ្លាប់មានទេ ពីមុនមក។ អគារពាណិជ្ជកម្មខ្ពស់ៗ នៅក្នុងសង្កាត់Manhattan រងខ្យល់បក់ដែលរត់ក្នុងល្បឿន ១៣០គីឡូម៉ែត្រក្នុងមួយម៉ោង។ ឡានក្រុង រទេះភ្លើងក្រោមដី ហាងទំនិញ ភោជនីយដ្ឋាន កន្លែងកំសាន្ត ក្នុងសង្កាត់ដែលធ្លាប់តែអ៊ូអរ មានមនុស្សរាប់ពាន់ឆ្លងកាត់ ក្នុងមួយៗម៉ោង ត្រូវបិទស្ងាត់ជ្រងំ។
ព្រលានយន្តហោះបីរបស់ទីក្រុងវិញ ត្រូវបិទ មិនឲ្យហោះហើរ តាំងពីថ្ងៃសៅរ៍។ ភាពរញ៉េរញ៉ៃកើតមានពេញព្រលានយន្តហោះ នៅពេលជើងហោះហើររាប់ពាន់ត្រូវលុបចោល។ បើតាមការវាយតម្លៃ របស់អ្នកជំនាញ ខ្យល់ព្យុះនឹងបង្កឲ្យមានការខូចខាតធ្ងន់ធ្ងរ មានតម្លៃពី ៥ ទៅ ១២ពាន់លានដុល្លារ។
ពេលបក់ប៉ះដីគោកក្នុងរដ្ឋភ្លាម ព្យុះ Irèneបានបន្ថយឥទ្ធិពលរបស់ខ្លួន ធ្លាក់ចុះខ្សោយ ពីកម្រិតលេខពីរ មកត្រឹមលេខមួយ ក្នុងពេលដែលព្យុះប្រភេទនេះអាចមានកម្រិតដល់លេខប្រាំ។ ទោះជាបន្ថយឥទ្ធិពលខ្លួនបន្តិច ព្យុះ Irèneដែលមានល្បឿនជាង១០០គីឡូម៉ែត្រ ក្នុងមួយម៉ោង និងមានអង្កត់ផ្ចិត ដល់ទៅ ៨៤០គីឡូម៉ែត្រ នៅតែបង្កគ្រោះថ្នាក់ ព្រោះ ក្រៅតែពីមានខ្យល់ខ្លាំង វានាំមកនូវទឹកភ្លៀង បង្កជាទឹកជំនន់ និងការរលំបាក់ដី។
ទីក្រុងញូវយ៉ក មួយផ្នែកដែលធ្លាប់តែបញ្ចេញភ្លើងចិញ្ចាច ចិញ្ចែង ទៅក្នុងទឹកសមុទ្រ ត្រូវងងឹតសូន្យសុង និងរងបោកបក់ដោយខ្យល់ព្យុះកំបុតត្បូង Irène។ គ្រោះមហន្តរាយធម្មជាតិ ដែលទីក្រុងញូវយ៉កមិនធ្លាប់ជួបប្រទះទេ ក្នុងរយៈពេល ២០ឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ