កម្ពុជាត្រូវការ២០០លានដុល្លារដើម្បីអនុវត្តកម្មវិធីបន្ស៊ាំនឹងការប្រែប្រួលអាកាសធាតុ
វេទិកាថ្នាក់ជាតិលើកទី២ស្តីពីការប្រែប្រួលអាកាសធាតុបានបិទ បញ្ចប់ កាលពីល្ងាចថ្ងៃទី៥តុលា បន្ទាប់ពីបានដំណើរការរយៈពេល៣ថ្ងៃ។ វេទិកានេះបានបិទបញ្ចប់ជាមួយការប្រកាសប្តេជ្ញារបស់កម្ពុជាក្នុងការ ចូលរួមទប់ទល់ការប្រែប្រួលអាកាសធាតុ បើទោះជាកម្ពុជាមិនមែនជាតួអង្គបង្កអោយមានបាតុភូតិធម្មជាតិនេះក៏ ដោយ។ ប៉ុន្តែកម្ពុជាត្រូវការថវិកាពីប្រទេសអភិវឌ្ឍន៍ដើម្បីអាចអនុវត្ត ផែនការសកម្មភាពរបស់ខ្លួនបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
កម្ពុជាត្រូវការថវិកាប្រហែល២០០លានដុល្លារដើម្បីអនុវត្តអោយបានពេញលេញនូវសកម្មភាពបន្ស៊ាំបន្ទាន់នឹងការប្រែប្រួលអាកាសធាតុ។ នេះគឺជាការលើកឡើងរបស់លោកស៊ុំ ធី ប្រធាននាយកដ្ឋានប្រែប្រួលអាកាសធាតុរបស់ក្រសួងបរិស្ថាន។ នៅក្នុងវេទិកាថ្នាក់ជាតិលើកទី២ស្តីការប្រែប្រួលអាកាសធាតុ មន្ត្រីកម្ពុជារូបនេះបានថ្លែងថា កម្ពុជាកំពុងបញ្ចុះបញ្ចូលប្រទេសអភិវឌ្ឍអោយផ្តល់ ហិរញ្ញប្បទានថ្មីយ៉ាងហោចណាស់ ១,៥ភាគរយនៃផលិតផលសរុបក្នុងស្រុករបស់ពួកគេ ពីលើជំនួយអភិវឌ្ឍន៍ផ្លូវការ។
វាជាការអំពាវនាវរកជំនួយហិរញ្ញវត្ថុ ប៉ុន្តែវាក៏បានបង្ហាញផងដែរពីការប្តេជ្ញាចិត្តរបស់កម្ពុជា ក្នុងការចូលរួមទប់ទល់ការប្រែប្រួលអាកាសធាតុ។ ថ្លែងនៅក្នុងឱកាសបិទវេទិកាថ្នាក់ជាតិ លោកម៉ុក ម៉ារ៉េត រដ្ឋមន្ត្រីក្រសួងបរិស្ថាន និងជាប្រធានគណៈកម្មាធិការជាតិគ្រប់គ្រងការប្រែប្រួលអាកាសធាតុបានថ្លែងថា កម្ពុជាពិតជាជនរងគ្រោះនៃបញ្ហា ដែលខ្លួនមិនបានបង្កឡើង។ ប៉ុន្តែកម្ពុជាពេញចិត្តចូលរួមដោះស្រាយបញ្ហាជាសកលនេះ។ ចំពោះលោករដ្ឋមន្ត្រីបរិស្ថានកម្ពុជា គេអាចផ្លាស់ប្តូរវិបត្តិនៃការប្រែប្រួលអាកាសធាតុ អោយទៅជាឱកាសថ្មីនៃការអភិវឌ្ឍប្រកបដោយចីរភាព ដោយបង្កើតអោយមានតំបន់បៃតងអោយបានច្រើន បន្ថយការបំភាយឧស្ម័នកាបូនិក និងការធ្វើអោយកាន់តែស៊ាំនឹងអាកាសធាតុ។
គួរបញ្ជាក់ថា វេទិកាជាតិនេះបានផ្តល់ឱកាសអោយកម្ពុជារៀបចំគោលជំហររបស់ខ្លួនសម្រាប់សន្និសីទរបស់ភាគីលើកទី១៧ដែលនឹងប្រព្រឹត្តទៅទីក្រុង ឌូបាន ប្រទេសអាហ្វ្រិកខាងត្បូង នៅចុងឆ្នាំ២០១១នេះ។ មានការរំពឹងទុកថា សន្និសីទនោះ នឹងផ្តល់ឱកាសអោយប្រទេសទាំងអស់ឯកភាពគ្នា ក្នុងការដោះស្រាយបែបពហុភាគីលើការប្រែប្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ