អ្នកស្ម័គ្រចិត្តជាង ៥០០នាក់ហើយ បានចុះឈ្មោះចូលរួមសង្កេតការណ៍ប្រឡងបាក់ឌុបលើកទី២
គិតត្រឹមថ្ងៃចន្ទទី ២២ កញ្ញានេះ អ្នកស្ម័គ្រចិត្តដែលជាសង្គមស៊ីវិល វិស័យឯកជន និង បុគ្គលឯកជនប្រមាណជាង៥០០នាក់ហើយបានចុះឈ្មោះចូលរួមសង្កេតការណ៍ការប្រឡងបាក់ឌុបលើកទីពីរ ជាមួយអង្គភាពប្រឆាំងអំពើពុករលួយ។ នេះបើតាមលោកស្រី ម៉ា សូយ៉ិនដាប្រធាននាយកដ្ឋានអប់រំ បង្ការ និងទប់ស្កាត់នៃអង្គភាពប្រឆាំងអំពើពុករលួយដែលបានបញ្ជាក់ប្រាប់វិទ្យុបារាំងអន្តរជាតិ RFIនៅរសៀលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
អង្គភាពប្រឆាំងអំពើពុករលួយ ទទួលបានអ្នកស្ម័គ្រជាង ៥០០នាក់ហើយសម្រាប់ចូលរួមសង្កេតការណ៍ការប្រឡងបាក់ឌុបលើកទីពីរដែលនឹងធ្វើឡើងនៅថ្ងៃទី១៣ និង ១៤ តុលាខាងមុខនេះ។
លោកស្រីម៉ា សូយ៉ិនដា បានលើកឡើងថា អ្នកស្ម័គ្រទាំងនេះ មានខ្លះជាអ្នកស្ម័គ្រចាស់ដែលបានចូលរួមសង្កេតការណ៍ការប្រឡងបាក់ឌុបលើកទីមួយ និង ខ្លះទៀតជាអ្នកស្ម័គ្រចិត្តថ្មី។ សូមជម្រាបជូនថា អង្គភាពប្រឆាំងអំពើពុករលួយ បានប្រកាសស្វែងរកអ្នកស្ម័គ្រចិត្តឲ្យចូលរួមសង្កេតការណ៍ការប្រឡងបាក់ឌុបលើកទី២កាលពីថ្ងៃទី០៩ កញ្ញា ហើយគ្រោងនឹងឈប់ទទួលចុះឈ្មោះនៅថ្ងៃទី០៣ តុលា។ បើតាមលោកស្រី ម៉ា សូយ៉ិនដា អ្នកស្ម័គ្រទាំង ៥០០នាក់នោះ មានទាំងសង្គមស៊ីវិល និង បុគ្គលឯកជន។
គួរបញ្ជាក់ដែរថា នៅក្នុងឆ្នាំ២០១៤នេះ ក្រសួងអប់រំ យុវជន និងកីឡា បានរឹតបន្តឹងការប្រឡងបាក់ឌុប ដើម្បីវាស់ស្ទង់ចំណេះដឹងសិស្ស និង លុបបំបាត់អំពើពុករលួយនៅក្នុងការប្រឡង។ ក្រសួងអប់រំ បានសហការគ្នាជាមួយអង្គភាពប្រឆាំងអំពើពុករលួយក្នុងការជ្រើសរើសអ្នកស្ម័គ្រចូលរួមសង្កេតការណ៍ ដើម្បីឲ្យការរឹតបន្តឹងការប្រឡងកាន់តែមានប្រសិទ្ធភាព។ កាលពីសម័យប្រឡងបាក់ឌុបលើកទីមួយ នៅថ្ងៃទី៤ និងទី៥ សីហា អ្នកស្ម័គ្រចិត្តដែលជាសង្គមស៊ីវិល វិស័យឯកជន និងបុគ្គលឯកជនប្រមាណជាង២ ៧០០នាក់ បានចូលរួមសង្កេតការណ៍។
ជាលទ្ធផល សិស្សតែជាង២៥ភាគរយប៉ុណ្ណោះបានប្រឡងជាប់។
ស្របពេលកំពុងស្វែងរកអ្នកស្ម័គ្រចិត្តសម្រាប់ការប្រឡងបាក់ឌុបលើកទីពីរនេះ អង្គភាពប្រឆាំងអំពើពុករលួយក៏គ្រោងនឹងរៀបចំកម្មវិធីប្រគល់លិខិតសរសើរ និង ថ្លែងអំណរគុណដល់អ្នកស្ម័គ្រទាំងអស់ដែលបានចូលរួមសង្កេតការណ៍ការប្រឡងបាក់ឌុបលើកទី១ផងដែរ។
កម្មវិធីនេះនឹងធ្វើឡើងនៅវិទ្យាស្ថានបច្ចេកវិទ្យាកម្ពុជា នៅថ្ងៃសៅរ៍ ទី២៧ ក្នុងសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ