សហភាពអឺរ៉ុបជំរុញយុទ្ធសាស្រ្តឧស្សាហកម្មយោធា ដើម្បីកាត់បន្ថយការពឹងផ្អែកលើសព្វាវុធអាមេរិក
សង្រ្គាមរុស្ស៊ីឈ្លានពានអ៊ុយក្រែន ដ៏អូសបន្លាយ និងស្ថានការណ៍នយោបាយបោះឆ្នោតអាមេរិក ជាទីដែលលោកដូណាល់ ត្រាំ អាចវិលត្រលប់មកដឹកនាំអាមេរិកសាជាថ្មី បានធ្វើឲ្យសហភាពអឺរ៉ុបភ្លឺភ្នែក ស្ទុះស្ទារកយុទ្ធសាស្រ្តដើម្បីផលិត បំពាក់អាវុធការពារខ្លួន។ បន្ទាប់ពីខ្ជីខ្ជាឧស្សាហកម្មយោធារបស់ខ្លួនអស់ជាច្រើនទសវត្សរ៍ និងរត់ទៅពឹងអាស្រ័យលើសព្វាវុធ និងការធានាការពារពីអាមេរិក និងអូតង់ សហភាពអឺរ៉ុប នៅថ្ងៃអង្គារទី ៥មីនាបានប្រកាសផែនការផ្តល់សន្ទុះដល់ឧស្សាហកម្មផលិតសព្វាវុធក្នុងរង្វង់ប្រទេសសមាជិកអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៥២
នៅចំពោះមុខការគំរាមកំហែងរបស់រុស្ស៊ី ដែលកំពុងធ្វើសង្រ្គាមឈ្លានពានអ៊ុយក្រែន និងក្តីបារម្ភខ្លាចលោកដូណាល់ ត្រាំឈ្នះឆ្នោត ត្រលប់មកដឹកនាំអាមេរិក អឺរ៉ុបបង្ហាញផែនការដ៏មានមហិច្ឆតាដើម្បីជំរុញឧស្សាហកម្មយោធាក្នុងរង្វង់សហភាពអឺរ៉ុប។
ទៅតាមផែនការ យុទ្ធសាស្រ្តឧស្សាហកម្មយោធាអឺរ៉ុប ដែលខ្លួនស្នើ កាលពីថ្ងៃអង្គារទី ៥មីនា គណៈកម្មការអឺរ៉ុបចង់ជំរុញការផលិត និងផ្គត់ផ្គង់សព្វាវុធ នៅក្នុងទឹកដីអឺរ៉ុប ដោយលែងសូវពឹងផ្អែកខ្លាំងលើការទិញនាំចូលអាវុធពីបរទេស ជាពិសេសអាមេរិក។
នៅក្នុងសន្និសីទកាសែត នៅទីស្នាក់ការអឺរ៉ុប ក្នុងទីក្រុងព្រុចសែល នៅថ្ងៃអង្គារ អនុប្រធានគណៈកម្មការអឺរ៉ុប លោកស្រី Margrethe Vestager បាននិយាយថា នៅក្នុងរឿងសន្តិសុខការពារខ្លួន អឺរ៉ុបត្រូវតែទទួលខុសត្រូវ ពឹងលើខ្លួនឯង ប៉ុន្តែនៅតែបន្តសកម្ម ចូលរួមក្នុងអង្គការអូតង់។
ប្រមុខការទូតអឺរ៉ុបលោក Joseph Borelle វិញទទួលស្គាល់ថា បន្ទាប់ពីកាត់បន្ថយការចំណាយលើវិស័យកងទ័ពអស់ជាច្រើនទសវត្សរ៍ ចាប់តាំងពីចប់សង្រ្គាមត្រជាក់ អឺរ៉ុបត្រូវការវិនិយោគច្រើនសម្បើមលើវិស័យឧស្សាហកម្មយោធា។
នៅក្នុងរយៈពេលវែង យុទ្ធសាស្រ្តឧស្សាហកម្មយោធាអឺរ៉ុបមានគោលដៅជំរុញឲ្យក្រុមហ៊ុន រោងចក្រផលិតអាវុធអឺរ៉ុបបោះទុនវិនិយោគបន្ថែម ដើម្បីបង្កើនសមត្ថភាពផលិតអាវុធឲ្យបានច្រើន ក្នុងល្បឿនលឿន មានប្រសិទ្ធិភាព និងផលិតក្នុងទឹកដីអឺរ៉ុប។
តាមរយៈ ផែនការយុទ្ធសាស្រ្តឧស្សាហកម្មយោធាអឺរ៉ុប គណៈកម្មការអឺរ៉ុបប្រាថ្នាចង់បានថា ពីពេលនេះ ដល់ឆ្នាំ ២០៣០ ពាក់កណ្តាលនៃសព្វាវុធដែលប្រទេសសមាជិកអឺរ៉ុបទិញសម្រាប់ការពារជាតិ មានប្រភពចេញមកពីរោងចក្រ ក្រុមហ៊ុនអឺរ៉ុប។ ត្រូវដឹងថា គិតចាប់តាំងពីមានសង្រ្គាមរុស្ស៊ី ឈ្លានពានអ៊ុយក្រែន នៅដើមឆ្នាំ ២០២២ ប្រទេសទាំងអស់ក្នុងសហភាពអឺរ៉ុប បានចំណាយលុយជាង ១០០ពាន់លានអឺរ៉ូសម្រាប់វិស័យកងទ័ព ដែលនៅក្នុងនោះ ៨០%បានចំណាយទៅលើការទិញសព្វាវុធពីបរទេស ក្រៅសហភាពអឺរ៉ុប។ ក្នុងចំណោមនោះ ៦០%ត្រូវចាយសម្រាប់ទិញអាវុធអាមេរិក។
តាមគណៈកម្មការអឺរ៉ុប យុទ្ធសាស្រ្តឧស្សាហកម្មយោធាអឺរ៉ុបមិនត្រឹមតែធ្វើឲ្យអឺរ៉ុបកាត់បន្ថយការពឹងផ្អែកទាំងស្រុងលើការទិញនាំចូលអាវុធពីបរទេស ជាពិសេស ពីអាមេរិកតែប៉ុណ្ណោះទេ ប៉ុន្តែ វានឹងជួយឲ្យអឺរ៉ុបអាចដើរតួជាគូប្រជែងរបស់អាមេរិកថែមទៀត។ នៅត្រង់ចំណុចនេះ គណៈកម្មការអឺរ៉ុបចង់ឲ្យក្រុមហ៊ុនរោងចក្រផលិតអាវុធអឺរ៉ុបធ្វើដូចក្រុមហ៊ុនអាមេរិក ពោលគឺផលិតអាវុធលើសតម្រូវការបញ្ជាទិញ ដើម្បីអាចស្តុកទុកខ្លះ នៅក្នុងឃ្លាំង នៅក្នុងករណីមានតម្រូវការចាំបាច់បន្ទាន់ ដូចជានៅក្នុងសង្រ្គាមអ៊ុយក្រែនជាដើម។
នៅក្នុងវគ្គដំបូងនៃផែនការយុទ្ធសាស្រ្តឧស្សាហកម្មយោធាអឺរ៉ុប គណៈកម្មការអឺរ៉ុបបានប្រកាសកញ្ចប់ថវិកាចំនួន ១៥០០លានអឺរ៉ូ។ អនុប្រធានគណៈកម្មការអឺរ៉ុប ទទួលស្គាល់ថា ទឹកប្រាក់នេះមានតិចតួចស្តួចស្តើងណាស់ បើប្រៀបធៀបនឹងកញ្ចប់ទឹកប្រាក់សរុប ១០០ពាន់លានអឺរ៉ូ ដែលគេត្រូវការសម្រាប់គម្រោងការដ៏មានមហិច្ឆតា។ ប៉ុន្តែ គណៈកម្មការអឺរ៉ុបសង្ឃឹមទទួលបានការចូលរួមវិភាគទានរបស់ប្រទេសសមាជិកទាំង២៧របស់សហភាពអឺរ៉ុប។ ប្រទេសមួយចំនួនដូចជាបារាំងជាដើមគាំទ្រគំនិតផ្តួចផ្តើមរបស់គណៈកម្មកាអឺរ៉ុបដែលចង់ផ្តួចផ្តើមឲ្យមានការចូលរួមបង់វិភាគទានរបស់ប្រទេសសមាជិក ដូចក្នុងសម័យកាលជំងឺកូវីដ។ មានន័យថា ប្រទេសសមាជិកនីមួយៗរបស់សហភាពអឺរ៉ុបត្រូវបង់វិភាគទាន ទៅតាមសមត្ថភាពរបស់ខ្លួន ទៅក្នុងកេសថវិការួមមួយ ដែលគណៈកម្មការអឺរ៉ុបយកទៅប្រើសម្រាប់បញ្ជាទិញ និងផ្គត់ផ្គង់សព្វាវុធដល់ប្រទេសអឺរ៉ុប ជាកញ្ចប់ ដូចគេធ្លាប់ទិញនិងផ្គត់ផ្គង់ វ៉ាក់សាំងសម្រាប់ជំងឺកូវីដ កាលពីប៉ុន្មានឆ្នាំមុន។ តាមមន្រ្តីអឺរ៉ុប ការបញ្ជាទិញជាកញ្ចប់នេះនឹងជួយឲ្យក្រុមហ៊ុនផលិតអាវុធនៅអឺរ៉ុបមានទុន សម្រាប់យកទៅ អភិវឌ្ឍ ធានាផលិតសព្វាវុធ សម្រាប់អឺរ៉ុប។
មិនមែនប្រទេសអឺរ៉ុបទាំងអស់គាំទ្រគំនិតនេះទេ។ អាល្លឺម៉ង់ផ្ទាល់ដែលមានឧស្សាហកម្មផលិតអាវុធគ្រាន់បើជាងគេនៅអឺរ៉ុប មិនចង់ផ្តល់អំណាចច្រើនដល់គណៈកម្មការអឺរ៉ុបដោយសារខ្លាចថា អឺរ៉ុបនឹងរំលោភចូលដែនអធិបតេយ្យ នយោបាយការពារជាតិរបស់អាល្លឺម៉ង់។ មតិរបស់ប្រទេសសមាជិកអឺរ៉ុបខ្លះទៀតចង់ឲ្យគណៈកម្មការអឺរ៉ុបយកផលចំណេញពីទ្រព្យសម្បត្តិរុស្ស៊ីដែលបង្កកទុក ក្នុងទឹកដីអឺរ៉ុប ប្រមាណ ៣០០ពាន់លានអឺរ៉ូ សម្រាប់យកទៅបង់ក្នុងផែនការជំរុញឧស្សាហកម្មយោធាអឺរ៉ុប ព្រោះថា ចង់ ឬមិនចង់ សព្វាវុធផលិតនៅអឺរ៉ុប មួយផ្នែក នឹងត្រូវប្រើសម្រាប់ជួយកងទ័ពអ៊ុយក្រែន នៅក្នុងសមរភូមិប្រយុទ្ធតទល់នឹងរុស្ស៊ី។ រុស្ស៊ីធ្លាប់បានព្រមានអឺរ៉ុបពីផលវិបាកធ្ងន់ធ្ងរ បើសិនអឺរ៉ុបហ៊ានប្រើប្រាស់លុយបង្កករបស់រុស្ស៊ីដើម្បីផលិតអាវុធជួយអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ