អឺរ៉ុបចាប់ផ្តើមប្រតិបត្តិការ ការពារនាវាដឹកទំនិញនៅសមុទ្រក្រហម
សហភាពអឺរ៉ុបបានឲ្យដឹងថា គេបានចាប់ផ្តើមដំណើរការបេសកកម្ម ការពារចរាចរណ៍នាវាដឹកទំនិញនៅក្នុងសមុទ្រក្រហម។ បេសកកម្មនេះមានការចូលរួម ពីកងទ័ពជើងទឹកនៃប្រទេសអឺរ៉ុបមួយចំនួន ដើម្បីការពារសន្តិសុខនាវាដឹកទំនិញដែលឆ្លងកាត់តំបន់នេះ ព្រោះប៉ុន្មានខែមកនេះ ក្រុមឧទ្ទាមហ៊ូទីយេម៉ែន បានវាយប្រហារជាញឹកញាប់ ធ្វើឲ្យរំខានយ៉ាងខ្លាំង ដល់ចរាចរណ៍ដឹកទំនិញអន្តរជាតិ។
ចុះផ្សាយនៅថ្ងៃ៖
ស្តាប់ - ០៣:០៧
ដើម្បីការពារសន្តិសុខនាវាដឹកទំនិញ នៅសមុទ្រក្រហម សហភាពអឺរ៉ុបបានសម្រេច បើកបេសកកម្មមួយ ដោយដាក់ឈ្មោះថា បេសកកម្ម « Aspides » ជាភាសាក្រិកប្រែមកថា ខែលការពារ។ បេសកកម្មនេះ មានការចូលរួម ពីប៊ែលហ្ស៊ិក អ៊ីតាលី ក្រិក អាល្លឺម៉ង់ និងបារាំង។ ចំណែកអេស្ប៉ាញបានបដិសេធ មិនចូលរួមទេ។
នៅលើបណ្តាញសង្គម X លោកស្រី អៀរស៊ូឡា វុនឌឹឡេយែន ប្រធានគណកម្មការអឺរ៉ុប បានសរសេរអបអរសាទរ ថាអឺរ៉ុបនឹងចូលរួម ការពារសេរីភាពចរាចរណ៍ដឹកទំនិញ ក្នុងសមុទ្រក្រហម ដោយសហការយ៉ាងសកម្ម ជាមួយដៃគូអន្តរជាតិផ្សេងទៀត។
ផ្អែកតាមលោក Antonio Tajani រដ្ឋមន្ត្រីក្រសួងការបរទេសអ៊ីតាលី គឺកងទ័ពអ៊ីតាលីនឹងមានតួនាទីជាមេបញ្ជាការប្រតិបត្តិ ចំណែកអគ្គបញ្ជាការទូទៅ គឺស្ថិតក្រោមបង្គាប់របស់កងទ័ពក្រិក។ បេសកកម្ម « Aspides » មានរយៈពេលដំណើរការ១ឆ្នាំ ហើយអាចបន្តបន្ថែមទៀត ប្រសិនបើចាំបាច់។
ដោយឡែក ផ្អែកតាមប្រភពពីមន្ត្រីទូតអឺរ៉ុបម្នាក់ បានឲ្យដឹងថា គឺមិនទាន់ប្រាកដថា បេសកកម្មនេះនឹងអាចដំណើរការភ្លាមៗនេះទេ ព្រោះគេត្រូវរងចាំ រៀបចំឲ្យលទ្ធភាពបើកប្រតិបត្តិការជាក់ស្តែង ឲ្យគ្រប់គ្រាន់ជាមុនសិន។ ចំណុចនេះ អាចត្រូវការពេលច្រើនសប្តាហ៍ទៀត។
សូមបញ្ជាក់ថា គិតត្រឹមពេលនេះ នាវាចម្បាំងអាល្លឺម៉ង់មួយគ្រឿង ឈ្មោះ Hessen បានបើកចេញទៅតំបន់សមុទ្រក្រហមហើយ កាលពីថ្ងៃទី៨កុម្ភៈ ដោយនាំទៅជាមួយនូវសមាជិកកងនាវិកអាល្លឺម៉ង់ចំនួន ២៤០នាក់។ នាវានេះ នឹងប្រុងត្រៀមកម្លាំងជាប្រចាំ ដើម្បីឆ្លើយតបទៅនឹងការវាយប្រហារណាមួយរបស់ក្រុមឧទ្ទាមហ៊ូទី មិនថាជាការវាយប្រហារដោយមីស៊ីល យានដ្រូន ឬនាវាអត្តឃាត។ ដោយឡែក ប៊ែលហ្ស៊ិកបានប្រកាសថានឹងបញ្ជូននាវាចម្បាំងមួយឈ្មោះ Marie-Louise។ រីឯបារាំងវិញ បានឲ្យដឹងថា នឹងប្រើប្រាស់នាវាចម្បាំងរបស់ខ្លួន ដែលកំពុងមានវត្តមានស្រាប់ នៅសមុទ្រក្រហម ចូលរួមក្នុងបេសកកម្មថ្មីនេះ។
សូមរំលឹកថា រដ្ឋមន្ត្រីការបរទេសនៃប្រទេសអឺរ៉ុបទាំង២៧ បានព្រមព្រៀងគ្នា កាលពីខែមករា លើគោលការណ៍បង្កើតបេសកកម្មការពារសន្តិសុខនាវាដឹកទំនិញ ក្នុងសមុទ្រក្រហម។ ក៏ប៉ុន្តែបេសកកម្មនេះ គឺមានតម្លៃត្រឹមតែជាការការពារខ្លួនតែប៉ុណ្ណោះ។ មានន័យថា កងទ័ពអឺរ៉ុបដែលចូលរួម គឺអាចបាញ់គ្រាប់បាន តែក្នុងករណីការពារខ្លួន ឬការពារនាវាដឹកទំនិញ ពីការវាយប្រហារណាមួយរបស់ក្រុមឧទ្ទាមហ៊ូទី តែមិនអាចទៅបើកការវាយប្រហារ ទៅលើក្រុមហ៊ូទីក្នុងទឹកដីយេម៉ែនឡើយ។
គួរកត់សំគាល់ថា រវាង៣ខែមកនេះ ក្រុមហ៊ូទីយេម៉ែនដែលជាដៃយើងរបស់អ៊ីរ៉ង់ បានបើកការវាយប្រហារជាញឹកញាប់ ទៅលើនាវាដឹកទំនិញអន្តរជាតិដែលឆ្លងកាត់សមុទ្រក្រហម ដោយអះអាងថាដើម្បីសងសឹងទៅនឹងសង្គ្រាមដែលអ៊ីស្រាអែលធ្វើទៅលើតំបន់ហ្កាហ្សា។ ការវាយប្រហាររបស់ក្រុមហ៊ូទីនេះ បានធ្វើឲ្យរាំងស្ទះយ៉ាងខ្លាំង ដល់ចរាចរណ៍ដឹកទំនិញអន្តរជាតិ។ នៅថ្ងៃចន្ទទី១៩កុម្ភៈ ក្រុមហ៊ូទីបានអះអាងថាខ្លួន បានវាយប្រហារនាវាដឹកទំនិញមួយគ្រឿងទៀតរបស់អង់គ្លេសនៅឈូងសមុទ្រអាដិន។ ថ្មីៗនេះ សហរដ្ឋអាមេរិក ក៏បានប្រកាសបើកសម្ព័ន្ធភាពអន្តរជាតិមួយដែរ ដើម្បីការពារសន្តិសុខនៅក្នុងសមុទ្រក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ