លោកចូបៃដិនបង្ហាញក្តីបារម្ភក្រោយការបែកលេចធ្លាយឯកសារសម្ងាត់របស់មន្ទីរបញ្ចកោន
ការបែកលេចធ្លាយព័ត៌មានសម្ងាត់របស់មន្ទីរបញ្ចកោនកំពុងក្លាយជាកង្វល់ បារម្ភរបស់ប្រមុខរដ្ឋអាមេរិក។ នៅក្នុងទស្សនកិច្ច ទៅកាន់ទីក្រុងDublin របស់ប្រទេសអៀរឡង់ កាលពីថ្ងៃព្រហស្បតិ៍ ប្រធានាធិបតីអាមេរិក លោកចូ បៃដិនបាននិយាយប្រាប់អ្នកកាសែតថា លោកព្រួយបារម្ភដែលមានរឿងបែកលេចធ្លាយឯកសារសម្ងាត់យ៉ាងដូច្នេះ។ ក្រសួងយុត្តិធម៌អាមេរិកកំពុងបើកការស៊ើបអង្កេតព្រហ្មទណ្ឌ នៅក្រោយឯកសារសម្ងាត់ដែលនិយាយពីសង្រ្គាមអ៊ុយក្រែន និងការលួចស្តាប់សម្ព័ន្ធមិត្តអាមេរិកពីសំណាក់ភ្នាក់ងារស៊ើបការណ៍សម្ងាត់CIA ត្រូវបង្ហោះផ្សាយនៅលើបណ្តាញសង្គម នៅថ្ងៃព្រហស្បតិ៍សប្តាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
នៅក្រោយការបែកលេចធ្លាយព័ត៌មានសម្ងាត់របស់មន្ទីរបញ្ចកោន នៅលើបណ្តាញសង្គម ប្រធានាធិបតីអាមេរិក លោកចូ បៃដិនចេញមុខនិយាយជាលើកទី១ថា លោកបារម្ភនៅពេលមានរឿងនេះកើតឡើង ប៉ុន្តែ លោកគិតថា វាមិនគ្រោះថ្នាក់ភ្លាមៗនោះទេ។
នៅក្នុងទស្សនកិច្ចនៅទីក្រុងDublin ប្រធានាធិបតីអាមេរិកនិយាយដែរថា ការស៊ើបអង្កេតរបស់ក្រសួងយុត្តិធម៌ដើម្បីស្វែងរកប្រភពបែកធ្លាយឯកសារសម្ងាត់របស់CIA កំពុងឈានជិតដល់ទីបញ្ចប់ ប៉ុន្តែ លោកមិនលម្អិតបន្ថែមច្រើនជាងនេះ។
នៅមុនការប្រកាសរបស់អាជ្ញាធរអាមេរិក កាសែតអាមេរិក Washington Post ចុះផ្សាយកាលពីថ្ងៃពុធ ថា យុវជនម្នាក់ក្នុងវ័យ ២០ឆ្នាំ ដែលធ្វើការនៅមូលដ្ឋានទ័ពអាមេរិក ជាអ្នកធ្វើឲ្យបែកលេចធ្លាយឯកសារសម្ងាត់របស់មន្ទីរបញ្ចកោន នៅលើបណ្តាញសង្គម Discord។ កាសែត Washington Post ដកស្រង់សំដីរបស់សមាជិកពីរនាក់ នៅក្នុងក្រុមជាមួយយុវជនខាងលើ ដែលថា យុវជន រហស្សនាម OG បានចែកចាយឯកសារ ដែលគេយកបានពីមូលដ្ឋានទ័ពដែលគេធ្វើការ នៅក្នុងក្រុមឆាតដែលមានសមាជិក២៤នាក់ នៅលើបណ្តាញDiscord។ ក្រុមដែលមានយុវជនOG ជាសមាជិក ត្រូវបានបង្កើតឡើង នៅឆ្នាំ ២០២០ ដោយការបញ្ចេញយោបល់របស់ពួកគេភាគច្រើនផ្តោតទៅលើចំណង់ចំណូលចិត្តប្រើប្រាស់អាវុធ សព្វាវុធរបស់កងទ័ព និងសាសនា។
តាមWashington Post យុវជនOG បានសុំឲ្យសមាជិកដទៃទៀតកុំឲ្យផ្សព្វផ្សាយឯកសារបន្ត ព្រោះគេមិនចង់ក្លាយជាអ្នកទម្លាយឯកសារសម្ងាត់ របស់CIA។ តាមប្រភពសមាជិកដែលស្រង់សំដីដោយកាសែតWashington Post យុវជនOG ជាអ្នករិះគន់ប៉ូលិស ក្រុមស៊ើបការណ៍សម្ងាត់ និងរដ្ឋាភិបាល ដែលគេចោទថា បានរំលោភអំណាច។
តាមក្រសួងការពារជាតិអាមេរិកការបែកលេចធ្លាយឯកសារសម្ងាត់លើកនេះនឹងធ្វើឲ្យសន្តិសុខជាតិអាមេរិកត្រូវប្រឈមនឹងគ្រោះថ្នាក់ធ្ងន់ធ្ងរ។ វាមិនត្រឹមបង្ហាញពីជំនួយសព្វាវុធ និងវត្តមានកងទ័ពអូតង់ នៅក្នុងសង្រ្គាមអ៊ុយក្រែន ប៉ុន្តែ វាបង្ហាញផងដែរថា ភ្នាក់ងារស៊ើបការណ៍សម្ងាត់អាមេរិក កំពុងលួចស្តាប់យកការណ៍សម្ងាត់ពីប្រទេសសម្ព័ន្ធមិត្ត ដូចជាកូរ៉េខាងត្បូងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ