អាមេរិកសន្យាការពារហ្វីលីពីន តែចិនថាវ៉ាស៊ីនតោនគ្មានសិទ្ធិនៅសមុទ្ទចិនខាងត្បូង
សហរដ្ឋអាមេរិកគ្មានហេតុផលស្របច្បាប់ណាមួយដែលត្រូវចូលមកលូកលាន់ក្នុងជម្លោះនៅសមុទ្ទចិនខាងត្បូងទេ។ នេះជាប្រតិកម្មរបស់ប៉េកាំង នៅថ្ងៃអង្គារទី១៩មីនា ក្រោយពីលោក អង់តូនី ប្លីងកិន ប្រមុខការទូតអាមេរិកបានបញ្ជាក់ជំហរការពារហ្វីលីពីនប្រឈមនឹងគ្រប់បញ្ហា រាប់ទាំងការវាយប្រហារប្រដាប់អាវុធ ជាយថាហេតុណាមួយ នៅក្នុងសមុទ្ទចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
សហរដ្ឋអាមេរិកគ្មានចំណែកនៅក្នុងសមុទ្ទចិនខាងត្បូងទេ ដូច្នេះអាមេរិកគ្មានសិទ្ធិចូលមកលូកលាន់ក្នុងជម្លោះរវាងចិននិងហ្វីលីពីននៅក្នុងសមុទ្ទចិនខាងត្បូងឡើយ។ បើតាមអ្នកនាំពាក្យក្រសួងការបរទេសចិន កិច្ចសហប្រតិបត្តិការយោធាអាមេរិក-ហ្វីលីពីន មិនត្រូវប៉ះពារដល់បូរណភាពដែនដី និងសិទ្ធិ ព្រមទាំងផលប្រយោជន៍ចិននៅសមុទ្ទចិនខាងត្បូងឡើយ ហើយក៏មិនអាចយកមកធ្វើជាទម្រក្នុងជម្លោះនៅតំបន់សមុទ្ទចិនខាងត្បូងបានដែរ។ ទង្វើរបស់ហ្វីលីពីនផ្ទុយនឹងដំណើរបែបបទដែលម៉ានីលតវ៉ានៅមុខតុលាការអន្តរជាតិហើយ។ នេះប្រតិកម្មខ្លាំងៗរបស់ចិន ក្រោយពីអាមេរិកបានប្រកាសគាំទ្រហ្វីលីពីនប្រឈមនឹងគ្រប់បញ្ហានៅសមុទ្ទចិនខាងត្បូង។
ក្នុងពេលកំពុងស្ថិតនៅទីក្រុងម៉ានីល លោកប្រមុខការទូតអាមេរិក អង់តូនី ប្លីងកិន បានរំឮកថា អាមេរិកការពារសម្ព័ន្ធមិត្តហ្វីលីពីន ពីរាល់គ្រប់ទម្រង់នៃការគំរាមកំហែងប្រដាប់អាវុធជាយថាហេតុណាមួយ នៅក្នុងសមុទ្ទចិនខាងត្បូង ព្រោះសមុទ្ទនេះជាផ្លូវចរាចរណ៍ដ៏សំខាន់សម្រាប់សន្តិសុខ សេដ្ឋកិច្ចរបស់ហ្វីលីពីន និងសម្រាប់តំបន់ទាំងមូល រាប់ទាំងអាមេរិកផង ព្រមទាំងពិភពលោកទៀត។ ហេតុដូច្នេះហើយបានជាអាមេរិក ត្រូវនៅក្បែរហ្វីលីពីន និងគាំទ្រម៉ានីលដូចមានចែងសន្ធិសញ្ញាការពារគ្នាទៅវិញមក។
ប៉េកាំងទាមទារគ្រប់គ្រងតំបន់សមុទ្ទចិនខាងត្បូងស្ទើរទាំងស្រុង បំពានលើប្រទេសជិតខាងដូចជាវៀតណាម ហ្វីលីពីន ម៉ាឡេស៊ី ឬព្រុយណេ។ មួយរយៈចុងក្រោយនេះ ជម្លោះចិននិងហ្វីលីពីន បានឡើងតានតឹងដល់កំរិតកំពូល។ គឺក្នុងស្ថានភាពនេះ ដែលហ្វីលីពីនបានចុះកិច្ចព្រមព្រៀងយោធាជាមួយសហរដ្ឋអាមេរិកនិងអូស្ត្រាលី ដោយអាមេរិកអាចមានសិទ្ធប្រើប្រាស់មូលដ្ឋានទ័ពហ្វីលីពីនចំនួន៩។
នេះជាទស្សនកិច្ចលើកទីពីររបស់លោកអង់តូនី ប្លីងកិនហើយ គិតចាប់តាំងហ្វីលីពីនមានរដ្ឋាភិបាលថ្មីដឹកនាំដោយលោកប្រធានាធិបតីហ្វ៊ែរឌីណង់ ម៉ាកូស ជូញ៉រ នៅឆ្នាំ២០២២មក។ បើតាមអ្នកវិភាគ ទស្សនកិច្ចរបស់លោកប្រមុខការទូតមានទិសដៅរឹតចំណងសម្ព័ន្ធភាពអាមេរិក-ហ្វីលីពីន ឱ្យបានកាន់តែប្រសើរឡើងផង និងក៏ជាឱកាសសម្រេចសម្រួចគម្រោងជំនួបត្រីភាគី រវាងប្រធានាធិបតីអាមេរិកចូបៃដិនជាមួយសមភាគីហ្វីលីពីននិងនាយករដ្ឋមន្ត្រីជប៉ុន នៅទីក្រុងវ៉ាស៊ីនតោន នាថ្ងៃទី១១មេសាខាងមុខ។
ក្រៅពីរឹងចំណងសម្ព័ន្ធភាពនយោបាយនិងយោធា ហ្វីលីពីនបានក្លាយជាដៃគូកាន់តែចម្បងឡើងៗរបស់អាមេរិក។ មុនផ្តើមជំនួបផ្លូវការ លោកអង់តូនីប្លីងកិន បានអញ្ជើញទៅបំពេញទស្សនកិច្ចសហគ្រាសផលិតសឺមីកុងឌុចទ័រ បន្ទះឈីបអេឡិចត្រូនិកដ៏សំខាន់នៃសេដ្ឋកិច្ចពិភពលោក។ យឺតយ៉ាវខ្លាំងក្នុងវិស័យនេះ អស់ជាច្រើនឆ្នាំ សហរដ្ឋអាមេរិកកំពុងស្វះស្វែងពង្រឹងជំហរជាមេកើយផ្នែកឧស្សាហកម្មបន្ទះឈីប ដើម្បីហេតុផលសន្តិសុខជាតិផង និងដើម្បីប្រកួតប្រជែងនឹងចិនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ