បន្ទាប់ពីបរិស្ថាន ប្រធានាធិបតីបារាំងនិងប្រេស៊ីលសម្ពោធនាវាមុជទឹកមួយគ្រឿងថ្មី
លោកប្រធានាធិបតីបារាំង អេម៉ានុយអែល ម៉ាក្រុង កំពុងបន្តទស្សនកិច្ចផ្លូវរដ្ឋនៅក្នុងប្រទេសប្រេស៊ីល ដើម្បីបញ្ជាក់អំពីទំនាក់ទំនងជិតស្និទ្ធរវាងគ្នា។ បន្ទាប់ពីបានប្រកាសកម្មវិធីវិនិយោគដើម្បីការពារបរិស្ថានអាម៉ាហ្សូន នៅថ្ងៃពុធទី ២៧មីនានេះបារាំងនិងប្រេស៊ីល ចង់បង្ហាញអំពីភាពជាដៃគូក្នុងវិស័យនាវាមុជទឹកម្តង។ ប្រធានាធិបតីម៉ាក្រុងនិងសមភាគី លូឡា ត្រូវចូលរួមសម្ពោធនាវាមុជទឹកបារាំង-ប្រេស៊ីលមួយគ្រឿងថ្មីទៀត នៅមូលដ្ឋានសាងសង់Italguai ភាគខាងត្បូងក្រុងRio de janeiro។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ប្រធានាធិបតីបារាំង លោក អេម៉ានុយអែលម៉ាក្រុង កំពុងបន្តបំពេញទស្សនកិច្ចផ្លូវរដ្ឋនៅប្រេស៊ីលដែលជាមហាប្រទេសអាមេរិកឡាទីនដ៏ធំមួយក្នុងចំណោមប្រទេសកំពុងមានសេដ្ឋកិច្ចលូតលាស់ខ្លាំង។ បន្ទាប់ពីបរិស្ថាន ចូលដល់សំណុំរឿងនាវាមុជទឹក និងសេដ្ឋកិច្ចម្តង។ នៅថ្ងៃអង្គារម្សិលមិញ ប្រធានាធិបតីបារាំងនិងប្រេស៊ីលបានប្រកាសបង្កើតកម្មវិធីសម្រួលការវិនិយោគបៃតង សម្រាប់ការពារបរិស្ថាននិងអភិវឌ្ឍសេដ្ឋកិច្ចដើម្បីតំបន់ព្រៃអាម៉ាហ្សូនប្រេស៊ីលនិងបារាំង ក្នុងតម្លៃទឹកប្រាក់ប្រមាណ១ពាន់លានអឺរ៉ូ។
នៅព្រឹកថ្ងៃពុធនេះ ប្រធានាធិបតីទាំងពីរ ត្រូវសម្ពោធនាវាមុជទឹកទីបី ក្នុងចំណោមនាវាមុជទឹកបួនគ្រឿងដែលបារាំងលក់ឱ្យប្រេស៊ីល។ កាលពីខែធ្នូឆ្នាំ២០០៨ បារាំងនិងប្រេស៊ីលបានចុះកិច្ចព្រមព្រៀងលក់ឧទ្ធម្ភាគចក្រ៥០គ្រឿង និងនាវាមុជទឹកបួនគ្រឿង ក្នុងតម្លៃ៦៧០០លានអឺរ៉ូ ដើម្បីអភិវឌ្ឍសមត្ថភាពនិងឧស្សាហកម្មយោធាជើងទឹករបស់ប្រេស៊ីល ក្រោមកម្មវិធីដែលមានឈ្មោះថា Prosub។ បើតាមNaval Group ដែលជាក្រុមហ៊ុនឧស្សាហកម្មយោធាជើងទឹកបារាំងទទួលបន្ទុកសាងសង់នាវាមុជទឹក កិច្ចព្រមព្រៀងបារាំងប្រេស៊ីលជាការផ្ទេរបច្ចេកវិទ្យាយ៉ាងពេញលេញមិនធ្លាប់មានចុះជាមួយនរណាទេពីមុនមក។
នៅផ្នែកទីមួយនៃកិច្ចព្រមព្រៀង ការសាងសង់នាវាមុជទឹកបួនគ្រឿង ដើរដោយថាមពលម៉ាហ្សូតនិងភ្លើងអគ្គិសនី ត្រូវធ្វើនៅលើទឹកដីប្រេស៊ីល។ វិស្វករនិងអ្នកបច្ចេកទេសប្រេស៊ីលមកទទួលការសិក្សាបំពាក់បំប៉ននៅបារាំង។ ឯក្រុមហ៊ុនNaval Groupបារាំងផ្តល់ប្លង់ សម្ភារៈបរិក្ខារ និងជំនួយបច្ចេកវិទ្យាខ្លះ។ នាវាមុជទឹកទីមួយ បានចាប់ដំណើរការតាំងពីខែកញ្ញា២០២២មក ទីពីរចាប់ផ្តើមបំពាក់គ្រឿងកាលពីខែមករា ទីបីរៀបចំចុះទឹកនៅថ្ងៃពុធនេះ និងទីបួននឹងចាប់ផ្តើមនៅឆ្នាំ២០២៥។ នាវាមុជទឹកធម្មតាទាំងនេះ មានប្រវែង៧១ម៉ែត្រ ទម្ងន់១៨៧០តោន អាចមានសមត្ថភាពបាញ់គ្រាប់ធុនF21 ឬមីស៊ីលបាន។
ផ្នែកទីពីរ ជាគម្រោងសាងសង់មូលដ្ឋានទ័ពជើងទឹក និងការដ្ឋានសាងសង់នាវមុជទឹកដែលបានសម្ពោធរួចហើយកាលពីឆ្នាំ២០១៨។ ចំណែកផ្នែកទីបីមានបង្កប់មហិច្ឆតាខ្លាំងណាស់ ព្រោះវាអាចនឹងនាំប្រេស៊ីលឱ្យមាននិងចេះធ្វើនាវាមុជទឹកដើរដោយថាមពលនុយក្លេអ៊ែរ មុនគេបន្ទាប់ពីមហាអំណាចជាសមាជិកអចិន្ត្រៃយ៍នៃក្រុមប្រឹក្សាសន្តិសុខទាំង៥ប្រទេស។ ប្រេស៊ីលចង់ឱ្យបារាំងជួយបង្រៀនធ្វើនាវាមុជទឹកដើរដោយថាមពលនុយក្លេអ៊ែរ ដែលតាមគម្រោងត្រូវចាប់ផ្តើមនៅរវាងពីឆ្នាំ២០៣៦-៣៧។ ជានាវាដ៏ធំ ប្រវែង១០០ម៉ែត្រ ទម្ងន់៧ពាន់តោន តែគម្រោងជួបការយឺតយ៉ាវខ្លាំង ដោយបញ្ហាថវិកាផង និងដោយបារាំងហាក់នៅស្ទាក់ស្ទើរ ខ្លាំងមិនចង់ផ្ទេរបច្ចេកវិទ្យានេះផង។ ជាសំណុំរឿងយុទ្ធសាស្ត្រ រសើប និងងាយប៉ះពាល់ដល់កាតព្វកិច្ចមិនរីកសាយភាយនុយក្លេអ៊េរ។ សម្រាប់នាវាមុជទឹកដើរដោយនុយក្លេអ៊ែរប្រេស៊ីល បារាំងព្រមជួយផ្នែកបច្ចេកវិទ្យាសាងសង់គ្រប់មុខ តែផ្នែកនុយក្លេអ៊ែរត្រូវធ្វើដោយភាគីបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ