ប្រមុខទូតអាមេរិកអំពាវនាវឲ្យសហគមអន្តរជាតិរួមគ្នាប្រយុទ្ធប្រឆាំងគ្រឿងញៀនសំយោគ
រដ្ឋមន្រ្តីក្រសួងការបរទេសសហរដ្ឋអាមេរិក លោក អង់តូនី ប្ល៊ីងកិន អំពាវនាវឲ្យមជ្ឈដ្ឋានអន្តរជាតិរួមគ្នាប្រយុទ្ធប្រឆាំងគ្រឿងញៀនសំយោគ ប្រភេទ ហ្វង់តានីល។ ហ្វង់តានីល ជាគ្រឿងញៀនសំយោគ មានឥទ្ធិពលខ្លាំងជាង ហេរ៉ូអ៊ីន ៥០ដង ហើយនិងខ្លាំងជាង មរហ្វ៊ីន ដល់ទៅជាង ១០០ដង។ ក្នុងឱកាសសន្និសីទអន្តរជាតិស្តីពីគ្រឿងញៀន នៅប្រទេសអូទ្រីស, ប្រមុខទូតអាមេរិក បានបង្ហើបថា ហ្វង់តានីល មានកម្រិតឥទ្ធិពលខ្លាំង និងបានធ្វើឲ្យពលរដ្ឋអាមេរិក ស្លាប់បាត់បង់ជីវិត រាប់ពាន់នាក់ ក្នុង១ឆ្នាំៗ។
ចុះផ្សាយនៅថ្ងៃ៖
ស្តាប់ - ០២:៣១
«សារជាបន្ទាន់បំផុតរបស់ខ្ញុំចំពោះមហាសន្និបាតនេះ គឺថា បើយើងចង់ដោះស្រាយវិបត្តិគ្រឿងញៀននេះ មានផ្លូវតែ១គត់ គឺចូលរួមពួតដៃធ្វើការរួមគ្នា។» ការប្រកាសរបស់លោក អង់តូនី ប្ល៊ីងកិន ដូច្នេះ ធ្វើឡើងនៅចំពោះមុខគណៈកម្មាធិការអង្គការសហប្រជាជាតិប្រឆាំងឧក្រិដ្ឋកម្មគ្រឿងញៀន។ ប្រទេសប្រមាណជាង ១៥០ ត្រូវជួបប្រជុំគ្នា រយៈពេល ១០ថ្ងៃ នៅក្រុងវីយែន ដើម្បីរក ដំណោះស្រាយទប់ស្កាត់គ្រឿងញៀន ពិសេសគឺ ហ្វង់តានីល។
ប្រមុខការទូត លោក អង់តូនី ប្ល៊ីងកិន បានគូសបង្ហាញថា ពលរដ្ឋអាមេរិក ច្រើនជាង ៤០% បានស្គាល់ មនុស្សដែលស្លាប់ព្រោះតែប្រើហ្វង់តានីលជ្រុលលើសកម្រិត។ រដ្ឋមន្រ្តីក្រសួងការបរទេសសហរដ្ឋអាមេរិក ក៏ឲ្យដឹងទៀតថា អ្នកស្លាប់នៅសហរដ្ឋអាមេរិក ភាគច្រើនជាយុវជននិងមនុស្សពេញកម្លាំង អាយុចន្លោះពី ១៨ ទៅ ៤៥ ឆ្នាំ។
នៅប្រទេសអូទ្រីស មន្ត្រីជាន់ខ្ពស់សហរដ្ឋអាមេរិករូបនេះ បានដាក់ស្នើគម្រោងវិធានការការពារ ទប់ស្កាត់ ប្រយុទ្ធប្រឆាំងគ្រឿងញៀនសំយោគ ទៅកាន់គណៈកម្មាធិការប្រឆាំងឧក្រិដ្ឋកម្មគ្រឿងញៀន របស់អង្គការសហប្រជាជាតិ។ គម្រោងនេះ នឹងត្រូវពិចារណា និងអនុម័ត ក្នុងសប្តាហ៍ខាងមុខ។ ជាវិធានការ សហរដ្ឋអាមេរិក បានប្រកាសថានឹងផ្តល់កញ្ចប់ជំនួយ ១៧៥លានដុល្លារ ក្នុងគម្រោងប្រយុទ្ធប្រឆាំងហ្វង់តានីល ទូទាំងពិភពលោក។
នៅសហរដ្ឋអាមេរិក អត្រាស្លាប់ព្រោះតែប្រើ ហ្វង់តានីល លើសកម្រិត ជាក្តីបារម្ភខ្លាំង។ សូម្បីប្រធានាធិបតីអាមេរិក ចូ បៃដិន ក៏បានយកបញ្ហាទប់ស្កាត់គ្រឿងញៀនសំយោគនេះ ទៅធ្វើជាប្រធានបទសំខាន់ សម្រាប់យុទ្ធនាការឃោសនាបោះឆ្នោតប្រធានាធិបតីអាមេរិក ឆ្នាំនេះដែរ។ នៅទឹកដីអាមេរិក, ហ្វង់តានីល នាំចូលច្រើនតាមច្រកព្រំដែនប្រទេស ម៉ិកស៊ិក ហើយធាតុផ្សំ ផលិតនៅស្រុកចិន Made in China ។ ជាញឹកញយ ក្នុងជំនួបទ្វេភាគី សហរដ្ឋអាមេរិក បានជំរុញឲ្យ រដ្ឋអំណាចចិន ជួយទប់ស្កាត់។ បើតាមព័ត៌មានពីទីភ្នាក់ងារព័ត៌មានបារាំងអាអេហ្វប៉េ, ក្នុងកិច្ចប្រជុំក្រុងវីយ៉ែន ថ្នាក់ដឹកនាំជាន់ខ្ពស់អាមេរិកនិងចិន គ្មានគម្រោងជួបគ្នាទេ។ ចិនបានបញ្ជូនអនុប្រធានគណៈកម្មាធិការប្រឆាំងគ្រឿងញៀន មកប្រជុំ។ ចំណែករុស្ស៊ី រដ្ឋបាលក្រុងម៉ូស្គូបានឲ្យអនុរដ្ឋមន្ត្រីក្រសួងការបទេស មកជាតំណាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ