អេក្វាទ័រ៖ ប្រធានាធិបតីដាក់ប្រទេសក្នុងភាពអាសន្ន ដោយហេតុជម្លោះប្រដាប់អាវុធផ្ទៃក្នុង
អេក្វាទ័រកំពុងធ្លាក់ក្នុងវិបត្តិអសន្តិសុខដ៏ធ្ងន់ធ្ងរបំផុតមិនធ្លាប់មានទេ តាំងពីបីថ្ងៃមកនេះ។ មានស្លាប់យ៉ាងហោចណាស់១០នាក់។ នេះបើតាមតួលេខបឋម។ លោក ដាញីយែល ណូបូអា Daniel Noboaប្រធានាធិបតីអេក្វាទ័រ បានចេញក្រិត្យនៅថ្ងៃអង្គារទី៩មករា២០២៤ ដាក់ប្រទេសក្នុងភាពអាសន្នជម្លោះប្រដាប់អាវុធផ្ទៃក្នុង ៦០ថ្ងៃ និងបានដាក់បញ្ជាឱ្យកម្ទេចក្រុមឧក្រិដ្ឋជនតែម្តង។
ចុះផ្សាយនៅថ្ងៃ៖
ស្តាប់ - ០៣:១៣
ភាពហិង្សាបានឡើងដល់កំរិតកំពូលនៅថ្ងៃអង្គារម្សិលមិញ ដោយជនពាលប្រដាប់អាវុធ មួយក្រុមបាននាំគ្នាសម្រុកចូលក្នុងស្ថានីយ៍ទូរទស្សន៍ជាតិ ហើយចាប់អ្នកសារព័ត៌មាន បុគ្គលិកទទួលបន្ទុករដ្ឋបាលនិងបច្ចេកទេសជាចំណាប់ថ្នូរ ដោយស្រែកថា កុំលេងសើចជាមួយក្រុមម៉ាហ្វីយ៉ា។ បើទោះបីជាគេបានផ្តាច់ភ្លើងនិងបិទកាមេរ៉ាក្នុងស្ទុយឌីយោហើយក៏ដោយ ក៏ទិដ្ឋភាពដ៏ស្តែងនេះត្រូវបានផ្សាយផ្ទាល់តាមកញ្ចក់ទូរទស្សន៍អស់ជាច្រើននាទី ទម្រាំមានអន្តរាគមន៍ពីក្រុមនគរបាល។ ជាសរុបប៉ូលិសចាប់ខ្លួនជនដៃដល់បាន១៣នាក់។ ប៉ុន្តែនៅពេលនោះរដ្ឋាភិបាលពុំទាន់អាចគ្រប់គ្រងស្ថានការណ៍បានទេ ព្រោះក្រុមឧក្រិដ្ឋជនកំពុងធ្វើសកម្មភាពផងនិងការប៉ះបោរក្នុងពន្ធនាគារចាប់អ្នកយាមជាចំណាប់ខ្លាំងនៅតាមពន្ធនាគារជាច្រើន គំរាមតាមបណ្តាញសង្គម។
ប្រឈមនឹងស្ថានភាពនេះ លោក ដានីញែល ណូបូអា ប្រធានាធិបតីអេក្វាទ័រវ័យ៣៤ឆ្នាំ បានប្រកាសដាក់ប្រទេសក្នុងភាពអាសន្នជម្លោះប្រដាប់អាវុធផ្ទៃក្នុង និងបានចេញបញ្ជាឱ្យកម្ទេចក្រុមឧក្រិដ្ឋជនទាំងអស់ដែលមានពាក់ព័ន្ធនឹងការជួញដូរគ្រឿងញៀន។ នៅក្នុងក្រិត្យប្រធានាធិបតីផ្សព្វផ្សាយជាសាធារណៈនៅថ្ងៃអង្គារ ប្រធានាធិបតីបានទទួលស្គាល់ថាប្រទេសកំពុងមានជម្លោះប្រដាប់អាវុធផ្ទៃក្នុងនិងបានសម្រេចប្រមូលផ្តុំកងកម្លាំងយោធានិងប៉ូលិសជាតិឱ្យចេញធ្វើអន្តរាគមន៍កម្ចាត់ក្រុមឧក្រិដ្ឋជន អង្គការភេរវកម្មនិងក្រុមអន្ធពាលប៉ះបោរ ដើម្បីធានាការពារបូរណភាពនិងអធិបតេយ្យភាពជាតិ។ លោកណូបូអា បានចុច ឈ្មោះក្រុមឧក្រិដ្ឋជនដោយចំៗ យ៉ាងហោច២២ក្រុមដែលត្រូវចាត់ទុកជាក្រុមភេរវនិយម (Aguilas, AguilasKiller, Ak47, Caballeros Oscuros, ChoneKiller, Choneros, Covicheros, Cuartel de las Feas, Cubanos, Fatales, Ganster, Kater Piler, Lagartos, Latin Kings, Lobos, Los p.27, Los Tiburones, Mafia 18, Mafia Trébol, Patrones, R7, Tiguerones)។
វិបត្តិសន្តិសុខបានផ្ទុះឡើងកាលពីថ្ងៃអាទិត្យ ដោយមេក្រុមម៉ាហ្វីយ៉ា Choneros ដែលមានកូនចៅប្រមាណ៨ពាន់នាក់ ឈ្មោះAdolfo Macias ហៅហ្វីតូ បានរត់ពីគុករួច។ ជាសត្រូវទីមួយរបស់អេក្វាទ័រ ជាប់សង្ស័យខាងប្រព្រឹត្តឧក្រិដ្ឋកម្ម ការជួញដូរគ្រឿងញៀន និងធ្វើឃាតមនុស្ស មានអាទិ៍ឃាតកម្មសម្លាប់បេក្ខជនប្រធានាធិបតីដ៏ចម្បងម្នាក់កាលពីខែសីហា២០២២ ហ្វីតូមានទោសជាប់ពន្ធនាគារ៣៤ឆ្នាំ តាំងពីឆ្នាំ២០១១មក និងធ្លាប់រត់ចេញពីគុកបានម្តងនៅឆ្នាំ២០១៣មុនចាប់បានមកវិញ។
ការគេចខ្លួនរបស់ហ្វីតូ នៅលើកនេះ អមដោយការបះបោរនិងចាប់ចំណាប់ខ្មាំងសម្រុតដោយផ្ទាល់តាមបណ្តាញសង្គម។ ហើយក្រុមឧក្រិដ្ឋជនបានបង្កភាពស្លន់ស្លោនិងវឹកវរ ដោយវាយប្រហារមិនរើសមុខលើអគារសាធារណៈ ទីតាំងប្រវត្តិសាស្ត្រ ឬរថយន្ត និងបានចាប់ប៉ូលិស៧នាក់ជាចំណាប់ខ្លាំង ក្នុងបំណងបំបែកកម្លាំងដើម្បីឱ្យមេក្រុមម៉ាហ្វីយ៉ាមួយក្រុមទៀតជាគូប្រជែងបានរត់រួចដែរ។ នេះសឱ្យឃើញថាគ្មានអ្វីអាចទប់វិបត្តិអសន្តិសុខនៅអេក្វាទ័របានឡើយ។ រដ្ឋាភិបាលបានថ្ងូចថ្ងូរថាក្រុមឧក្រិដ្ឋជនបានជ្រៀតចូលក្នុងស្ថាប័នរដ្ឋដល់កំរិតកំពូល ឯប្រព័ន្ធពន្ធនាគារវិញស្ថិតក្នុងភាពបរាជ័យទាំងស្រុង។
វិបត្តិដ៏ធ្ងន់ធ្ងរនេះ បានជំរុញឱ្យប៉េរ៉ូជិតខាងប្រកាសអាសន្នដែរនៅតាមព្រំដែនខាងជើងរបស់ខ្លួន ដោយបញ្ជូនកម្លាំងយោធាជាច្រើនទៅការពារខ្លាចក្រែងក្រុមពាលរាលឆ្លងមកដល់។ ចំណែកចិនវិញបានប្រកាសនៅថ្ងៃពុធនេះផ្អាកសកម្មភាពផ្នែកស្ថានកុងស៊ុលរហូតមានបញ្ជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ