អាមេរិកចាប់ខ្លួនទាហានជើងទឹក២នាក់ក្នុងបទសង្ស័យលួចការណ៍សម្ងាត់ឲ្យកងទ័ពចិន
នាយទាហានជើងទឹកអាមេរិកពីររូប ត្រូវប៉ូលិសសហព័ន្ធ FBI ចាប់ខ្លួន កាលពីថ្ងៃពុធ នៅរដ្ឋកាលីហ្វ័នីញ៉ា ក្នុងបទសង្ស័យផ្តល់ព័ត៌មានសម្ងាត់របស់កងទ័ពជើងទឹកអាមេរិកទៅឲ្យចិន។ នៅថ្ងៃព្រហស្បតិ៍ទី៣ សីហា ក្រសួងយុត្តិធម៌អាមេរិកប្រកាសចោទប្រកាន់ទាហានជើងទឹកទាំងពីរ ពីបទប្រព្រឹត្តឧក្រិដ្ឋ លួចផ្តល់ព័ត៌មានសម្ងាត់របស់កងទ័ពអាមេរិកទៅឲ្យសាធារណរដ្ឋប្រជាមានិតចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
ក្រសួងយុត្តិធម៌អាមេរិក កាលពីថ្ងៃព្រហស្បតិ៍ប្រកាសចោទប្រកាន់ទាហានជើងទឹកអាមេរិកពីររូប ដែលបានបញ្ជូនរូបថត វីដេអូ និងឯកសារសំខាន់ៗទាក់ទងនឹងការគ្រប់គ្រង រចនាសម្ព័ន្ធរបស់កងទ័ពអាមេរិកទៅឲ្យចិន។
តាមរដ្ឋអាជ្ញាក្នុងរដ្ឋកាលីហ្វ័នីញ៉ា MARTIN ESTRADA ទាហានជើងទឹកទាំងពីរបានលួចផ្តល់ព័ត៌មានសម្ងាត់អាមេរិកទៅឲ្យកងទ័ពចិន ជាថ្នូរនឹងកញ្ចប់ប្រាក់ជាច្រើនពាន់ដុល្លារ។ តាមលោកMARTIN ESTRADA ជនសង្ស័យទី១ ឈ្មោះ Zhao Wenhen អាយុ ២៦ឆ្នាំ ជាទាហានជើងទឹកដែលធ្វើការនៅមូលដ្ឋានទ័ពVentura ខាងជើងទីក្រុងLos Angeles។ អាជ្ញាធរអាមេរិកសង្ស័យថា ទាហានអាមេរិកដើមកំណើតចិនរូបនេះបានផ្តល់ព័ត៌មានទាក់ទងនឹងមូលដ្ឋានទ័ពអាមេរិក ទៅឲ្យចារកិច្ចចិនម្នាក់ដែលបន្លំខ្លួនថា ជាអ្នកស្រាវជ្រាវខាងផ្នែកជំនួញជើងទឹក។ តាមរដ្ឋអាជ្ញាអាមេរិក ២០២៣ ចារកិច្ចចិនបានផ្ទេរលុយ ជិត ១៥០០០ដុល្លារ ទៅឲ្យទាហានជើងទឹក Zhao Wenhen ជាថ្នូរនឹងការផ្តល់ព័ត៌មានលម្អិត ស្តីពីសមយុទ្ធយោធារបស់អាមេរិកនៅអាស៊ីប៉ាស៊ីហ្វិក បណ្តាញអគ្គិសនី និងផែនទីបណ្តាញរ៉ាដានៅមូលដ្ឋានទ័ពអាមេរិកនៅអូគីណាម៉ា ប្រទេសជប៉ុន។
ជនសង្ស័យទី២ ឈ្មោះJinchao Wei អាយុ ២២ឆ្នាំ ត្រូវប៉ូលិសFBI ចាប់ខ្លួននៅកន្លែងធ្វើការនៅមូលដ្ឋានទ័ពជើងទឹកនៅSan Diego។ ជាអ្នកជួសជុលគ្រឿងម៉ាស៊ីននៅលើកប៉ាល់ចម្បាំងអាមេរិក U.S.SEssex WeiJinchao ត្រូវអាជ្ញាធរអាមេរិកសង្ស័យថា បានលួចយកការណ៍សម្ងាត់ទៅឲ្យកងទ័ពចិន តាំងពីដើមឆ្នាំ ២០២២ ដែលនៅក្នុងនោះមានព័ត៌មានទាក់ទងនឹងដំណើរការរបស់កប៉ាល់ចម្បាំង សន្តិសុខ និងអាវុធដែលមាននៅលើកប៉ាល់ចម្បាំង។
តាមបទចោទប្រកាន់របស់រដ្ឋអាជ្ញា ជនសង្ស័យទី២ បានផ្តល់ព័ត៌មានសម្ងាត់របស់កប៉ាល់ចម្បាំងអាមេរិកជាថ្នូរនឹងលុយឌីជីថល គ្រីបតូ រាប់ម៉ឺនដុល្លារ។ ក្នុងករណីគេរកឃើញភស្តុតាងដូចការចោទប្រកាន់ Wei Jinchao ត្រូវប្រឈមនឹងការផ្តន្ទាទោសជាប់ពន្ធនាគារមួយជីវិត ចំណែក ទាហានជើងទឹក Zhao Wenhenអាចជាប់ពន្ធនាគា២០ឆ្នាំ។
សម្រាប់អ្នកទទួលខុសត្រូវប៉ូលិសFBI ទទួលបន្ទុកផ្នែកប្រយុទ្ធប្រឆាំងចារកម្ម ទាហានជើងទឹកទាំងពីរបានលួចផ្តល់ទៅឲ្យចិន នូវព័ត៌មានសម្ងាត់ ដែលអាចធ្វើឲ្យសន្តិសុខជាតិអាមេរិករងគ្រោះថ្នាក់ធ្ងន់ធ្ងរ។ ម្យ៉ាង ការចាប់ខ្លួនទាហានជើងទឹក ដែលលួចផ្តល់ព័ត៌មានសម្ងាត់ទៅឲ្យចិន សបញ្ជាក់ថា កងទ័ពចិនព្យាយាមមិនឈប់ឈរ បំផ្លិចបំផ្លាញលទ្ធិប្រជាធិបតេយ្យ និងគំរាមកំហែងកងទ័ពអាមេរិកដែលមាននាទីការពារប្រជាធិបតេយ្យអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ