កាសែតអាមេរិកចុះផ្សាយថាវ៉ាស៊ីនតោនបារម្ភពីការវាយប្រហាររបស់ចោរព័ត៌មានវិទ្យា ដែលមានចិននៅពីក្រោយ
អាមេរិកកំពុងប្រមាញ់ តាមរកកម្មវិធី ដែលចោរព័ត៌វិទ្យាបង្កប់ទុក នៅក្នុងបណ្តាញគ្រប់គ្រងហេដ្ឋារចនាសម្ព័ន្ធសំខាន់ៗរបស់កងទ័ពអាមេរិក។ តាមការចុះផ្សាយ នៅថ្ងៃសៅរ៍ របស់កាសែតអាមេរិក New York Times ដែលបានដកស្រង់សំដីរបស់មន្រ្តីជាន់ខ្ពស់អាមេរិក វ៉ាស៊ីនបារម្ភខ្លាចថា កម្មវិធីរបស់ចោរព័ត៌មានវិទ្យា ដែលមានទំនាក់ទំនងជាមួយទីក្រុងប៉េកាំងនឹងអាចជាគ្រាប់បែកម៉ោង ដែលអាចទៅបន្ទុចបង្អាក់បេសកកម្មយោធារបស់អាមេរិក នៅក្នុងករណីមានជម្លោះ ដែលនៅក្នុងនោះមានផងដែរ ការវាយប្រហាររបស់ចិន ដើម្បីចូលគ្រប់គ្រងតៃវ៉ាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
រដ្ឋបាលលោកចូ បៃដិនកំពុងព្យាយាមតាមរកកូដកុំព្យូទ័រ ដែលក្រុមចោរព័ត៌មានវិទ្យាលាក់បង្កប់ទុក នៅក្នុងបណ្តាញគ្រប់គ្រងហេដ្ឋារចនាសម្ព័ន្ធសំខាន់ៗរបស់អាមេរិក។ តាមមន្រ្តីយោធា និងក្រុមស៊ើបការណ៍សម្ងាត់អាមេរិក ដែលដកស្រង់សំដីដោយកាសែតអាមេរិក New York Times ដោយសារតែគេនៅមិនទាន់រកឃើញ កម្មវិធីរបស់ចោរព័ត៌មានវិទ្យា វ៉ាស៊ីនតោននៅបារម្ភខា្លចថា ក្រុមចោរព័ត៌មានវិទ្យាដែលអាមេរិកចោទថា ធ្វើការបម្រើឲ្យកងទ័ពប្រជាជនចិន នឹងអាចប្រើកម្មវិធី កូដកុំព្យូទ័រនៅថ្ងៃណាមួយ ដែលកើតមានជម្លោះប្រដាប់អាវុធ ដើម្បីទៅបន្ទុចបង្អាក់ រំខានទំនាក់ទំនងទូរសារគមនាគមន៍ ការផ្គត់ផ្គង់ភ្លើង និងទឹក សម្រាប់មូលដ្ឋានទ័ព មិនថា នៅក្នុងទឹកដីអាមេរិក ឬនៅបរទេស ដូចជានៅកោះហ្គាំជាដើម។
សម្រាប់សមាជិកព្រឹទ្ធសភាអាមេរិក កូដកុំព្យូទ័រដែលចោរព័ត៌មានវិទ្យាចិន បង្កប់លាក់ទុកក្នុងប្រព័ន្ធព័ត៌មានវិទ្យាអាមេរិក ជាគ្រាប់បែកម៉ោងដែលនឹងផ្ទុះនៅថ្ងៃណាមួយ ដើម្បីបើកដៃឲ្យចិនមានអំណាចចូលទៅបង្អាក់ រំខានសកម្មភាពយោធារបស់អាមេរិក ដូចជាការពង្រាយទ័ព ការផ្គត់ផ្គង់ភស្តុភាសម្រាប់មូលដ្ឋានទ័ពអាមេរិកនៅបរទេស។
ប្រភពផ្សេងទៀតរបស់កាសែតNew York Times បានលើកឡើងទ្រឹស្តីមួយផ្សេងទៀត ដែលថា ដោយប្រើកម្មវិធីកូដកុំព្យូទ័រទៅរំខាន បណ្តាញផ្គត់ផ្គង់ទឹក និងភ្លើងនៅអាមេរិក ចិន តាមរយៈក្រុមចោរព័ត៌មានវិទ្យាអាចទៅពង្វក់ប្រជាជនអាមេរិកឲ្យផ្តោតសំខាន់តែទៅលើបញ្ហាក្នុងស្រុក ជាជាងសង្រ្គាមរបស់អាមេរិកនៅទឹកដីបរទេស។
ក្តីបារម្ភរបស់អាមេរិកពីការវាយប្រហាររបស់ចោរព័ត៌មានវិទ្យា កើតមានឡើង បន្ទាប់ពី ទីភ្នាក់ងារសន្តិសុខព័ត៌មានវិទ្យាអាមេរិក កាលពីខែឧសភាកន្លងទៅបានចេញសេចក្តីថ្លែងការណ៍រួមជាមួយ អូស្ត្រាលី និងនូវែលសេឡង់ ដើម្បីព្រមានពីគ្រោះថ្នាក់របស់ចោរព័ត៌មានវិទ្យាចិនឈ្មោះ Volt Typhoon ដែលធ្វើសកម្មភាពចូលទៅពួនសំងំនៅតាមបណ្តាញប្រព័ន្ធព័ត៌មានវិទ្យាអាមេរិក និងប្រទេសលោកខាងលិចផ្សេងទៀត។ នៅខែឧសភាដដែល ក្រុមហ៊ុនអាមេរិក Microsoft បានអះអាងដែរថា ក្រុមហ៊ុនចាប់បានសញ្ញាកូដកុំព្យូទ័រដ៏ចម្លែក នៅក្នុងបណ្តាញទូរសាគមនាគមន៍របស់អាមេរិក នៅកោះហ្គាំដែលជាទីតាំងមូលដ្ឋានទ័ពដ៏ធំរបស់អាមេរិក នៅមហាសមុទ្រប៉ាស៊ីហ្វិក។ តាមMicrosoft បច្ចេកទេសរបស់ក្រុមចោរ Volt Typhoon គឺពួនសំងំ នៅក្នុងប្រព័ន្ធ ដោយគ្មាននរណាដឹង និងរង់ចាំឱកាសវាយឆ្មក់ បើកការវាយប្រហារ ធ្វើឲ្យរាំងស្ទះដល់បណ្តាញទំនាក់ទំនងធំៗ រវាងអាមេរិក ជាមួយនឹងបណ្តាប្រទេសនៅអាស៊ី ក្នុងករណីដែលមានវិបត្តិអន្តរជាតិណាមួយកើតឡើង ទៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ