ហេតុអ្វីអាមេរិកប្តូរចិត្តមកទាមទារឲ្យមានបទឈប់បាញ់បន្ទាន់នៅហ្កាហ្សា?
នៅក្នុងកិច្ចប្រឹងប្រែងរបស់ខ្លួនក្នុងនាមជាអន្តរការីជំរុញឲ្យមានបទឈប់បាញ់នៅហ្កាហ្សា អាមេរិកបានអះអាងថា ខ្លួនបានស្នើសេចក្តីព្រាងសេចក្តីសម្រេចចិត្តមួយស្តីពីបទឈប់បាញ់បន្ទាន់ ទៅកាន់ក្រុមប្រឹក្សាសន្តិសុខអង្គការសហប្រជាជាតិ។ នេះបើតាមរដ្ឋមន្រ្តីការបរទេសអាមេរិក លោកអង់តូនី ប្លីងកិន ដែលកំពុងធ្វើទស្សនកិច្ចជាលើកទី៦ ទៅកាន់តំបន់ដើមបូព៌ា ដែលផ្តោតសំខាន់លើរឿងហ្កាហ្សា។ តាមប្រមុខការបរទេសអាមេរិក ក្រុមចរចាហាម៉ាស និងអ៊ីស្រាអែលកាន់តែខិតចូលជិតគ្នា នៅក្នុងការចរចាដែលគេសង្ឃឹមថា នឹងផ្តល់ពន្លឺក្នុងពេលឆាប់ៗខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៦
សង្រ្គាមសងសឹករបស់អ៊ីស្រាអែលទៅលើក្រុមហាម៉ាសនៅហ្កាហ្សា ជាហេតុផលតែមួយគត់ដែលធ្វើឲ្យរដ្ឋមន្រ្តីការបរទេសអាមេរិក ចុះឡើង ឥតឈប់ នៅតំបន់ដើមបូព៌ា។ នៅក្នុងទស្សនកិច្ចជាលើកទី៦ គិតចាប់តាំងពីអ៊ីស្រាអែលបើកសង្រ្គាមនៅហ្កាហ្សា ប្រមុខការបរទេសអាមេរិក លោកអង់តូនី ប្លីងកិនបានចុះចតមុនគេនៅទឹកដីអារ៉ាប៊ី សាអូឌីត មុននឹងធ្វើដំណើរ នៅថ្ងៃព្រហស្បតិ៍នេះទៅប្រទេសអេហ្ស៊ីប និងទៅជួបភាគីអ៊ីស្រាអែល នៅថ្ងៃសុក្រ។
ប៉ុន្តែ មុនជួបអន្តរការីអេហ្ស៊ីប និងកាតា នៅទីក្រុងគែរ នៅថ្ងៃព្រហស្បតិ៍ទី២១មីនា រដ្ឋមន្រ្តីការបរទេសអាមេរិកបានប្រាប់កាសែតអារ៉ាប៊ី សាអូឌីតថា អាមេរិកបានដាក់សេចក្តីព្រាងមួយទៅកាន់ក្រុមប្រឹក្សាសន្តិសុខអង្គការសហប្រជាជាតិ ដើម្បីទាមទារឲ្យមានបទឈប់បាញ់បន្ទាន់ ជាថ្នូរនឹងការដោះលែងចំណាប់ខ្មាំងនៅហ្កាហ្សា។
ជាសម្ព័ន្ធមិត្ត គាំទ្រអ៊ីស្រាអែលដែលអះអាងថា ធ្វើសង្រ្គាមហ្កាហ្សា កម្ទេចក្រុមហាម៉ាស នៅក្នុងហេតុផលការពារខ្លួន អាមេរិកធ្លាប់លើកដៃវេតូ ប្រឆាំងជាច្រើនដងសេចក្តីសម្រេចដែលទាមទារឲ្យមានបទឈប់បាញ់បន្ទាន់ នៅហ្កាហ្សា។ ជាក់ស្តែង នៅខែកុម្ភៈកន្លងទៅ អាមេរិកវេតូប្រឆាំងសេចក្តីសម្រេច ស្នើឡើងដោយប្រទេសអាល់ហ្សេរី ដែលបានទាមទារឲ្យមានបទឈប់បាញ់មនុស្សធម៌ ជាបន្ទាន់។
កាលណោះ អាមេរិកនិយាយការពារសិទ្ធិវេតូរបស់ខ្លួន ដោយថា អាមេរិកយល់ស្របជាមួយអ៊ីស្រាអែលដែលថា បទឈប់បាញ់នឹងអនុញ្ញាតឲ្យក្រុមហាម៉ាសមានពេលប្រមូលកម្លាំង ដើម្បីវាយប្រហារលើទឹកដីអ៊ីស្រាអែល។
តាមមន្រ្តីទូត ដែលទីភ្នាក់ងារព័ត៌មានបារាំងAFP សាកសួរសម្ភាសន៍ កាលពីថ្ងៃពុធ អាមេរិកធ្លាប់បានស្នើសេចក្តីព្រាងឲ្យមានបទបាញ់រយៈពេល៦សប្តាហ៍ ជាថ្នូរនឹងការដោះលែងចំណាប់ខ្មាំង។ ប៉ុន្តែដោយស្ទង់ដឹងថា ទំនងជាគ្មានបានទទួលការគាំទ្រនៅក្រុមប្រឹក្សាសន្តិសុខ អាមេរិកបានធ្វើសេចក្តីព្រាងថ្មី ដែលទាមទារឲ្យមានបទឈប់បាញ់បន្ទាន់ ជាថ្នូរនឹងការដោះលែងចំណាប់ខ្មាំង។
ប្រមុខការបរទេសអាមេរិកនិយាយថា សេចក្តីព្រាងថ្មីជាសារសំខាន់ ដើម្បីបញ្ជាក់ថា ជាការពិតអាមេរិក នៅតែឈរខាងអ៊ីស្រាអែលដែលប្រើសិទ្ធិការពារខ្លួន។ ប៉ុន្តែ ជាមួយគ្នានោះ អាមេរិកត្រូវផ្តោតអាទិភាពលើការការពារជីវិតប្រជាជនស៊ីវិល ដែលកំពុងឈឺចាប់ និងកំពុងត្រូវការជំនួយមនុស្សធម៌បន្ទាន់ នៅហ្កាហ្សា។
សេចក្តីព្រាងរបស់អាមេរិកមាននិយាយពីបទឈប់បាញ់បន្ទាន់ និងយូរអង្វែង ដើម្បីការពារប្រជាជនទាំងពីរ និងការបើកផ្លូវឲ្យមានការនាំជំនួយមនុស្សធម៌ចូលទឹកដីហ្កាហ្សា ដែលអ៊ីស្រាអែលបានបិទខ្ទប់ រហូតមក។ តើអ៊ីស្រាអែលនឹងយល់ព្រមធ្វើតាមការចង់បានរបស់សម្ព័ន្ធមិត្តអាមេរិកដែរឬទេ។ អាមេរិកធ្លាប់បានរំលឹកអ៊ីស្រាអែលកុំឲ្យបើកការវាយប្រហារជើងគោកចូលទីក្រុងរ៉ាហ្វា ដើម្បីជៀសវាងការសម្លាប់ជីវិតប្រជាជនស៊ីវិល។ ប៉ុន្តែ ជាថ្មី ម្តងទៀត នាយករដ្ឋមន្រ្តីអ៊ីស្រាអែលបញ្ជាក់ទៅភាគីអាមេរិកថា ដើម្បីកម្ទេចក្រុមហាម៉ាសឲ្យអស់ពីទឹកដីហ្កាហ្សា អ៊ីស្រាអែលនឹងបើកប្រតិបត្តិការយោធាចូលរ៉ាហ្វា ដូចដែលអ៊ីស្រាអែលធ្លាប់ធ្វើនៅភាគខាងជើង ហ្កាហ្សា។
ដោយសារបេ្តជ្ញាចិត្តគាស់រំលើងក្រុមហាម៉ាសនៅហ្កាហ្សា អ៊ីស្រាអែលចង់បានត្រឹមបទឈប់បាញ់រយៈពេល៦សប្តាហ៍ ជាថ្នូរនឹងការដោះលែងចំណាប់ខ្មាំង។ ប៉ុន្តែ ក្រុមហាម៉ាសវិញទាមទារចង់បានបទឈប់បាញ់ទាំងឡាយណាដែលនឹងទៅធានាបិទបញ្ចប់សង្រ្គាម នៅហ្កាហ្សា។
ក្រុមចរចាហាម៉ាសចង់ឲ្យអ៊ីស្រាអែលដោះលែងអ្នកទោសប៉ាឡេស្ទីន បើកផ្លូវឲ្យប្រជាជនប៉ាឡេស្ទីនធ្វើដំណើរវិលត្រលប់ទៅរស់នៅតំបន់ភាគខាងជើងហ្សាហ្សាឡើងវិញ។
ប៉ុន្តែ រហូតមកដល់ពេលនេះ អ៊ីស្រាអែលបានទាត់ចោលសំណើរបស់ហាម៉ាស ដោយថា នៅក្រោយចប់បទឈប់បាញ់ អ៊ីស្រាអែលនឹងចាប់ផ្តើមវាយប្រហារឡើងវិញ រហូតដល់អ៊ីស្រាអែលបំផ្លាញឲ្យខ្ទេចគ្មានសល់ រចនាសម្ព័ន្ធហាម៉ាសនៅហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ