អាមេរិកអះអាងថា អ៊ីស្រាអែលសម្លាប់បានមេដឹកនាំធំទី៣របស់ហាម៉ាស
មេកើយធំទី៣របស់ក្រុមហាម៉ាសនៅហ្កាហ្សា ស្លាប់នៅក្នុងការវាយប្រហាររបស់កងទ័ពអ៊ីស្រាអែល នៅក្នុងការវាយប្រហារទៅលើបណ្តាញរូងក្រោមដីដ៏ប្រទាក់ក្រឡាមួយរបស់ក្រុមហាម៉ាស នៅក្នុងទឹកដីហ្កាហ្សា កាលពីសប្តាហ៍មុន។ តាមការបញ្ជាក់របស់សេតវិមាន Marwan Issa អនុប្រធានកងកម្លាំង Izzedine Al-Qassam ដែលជាចលនាប្រដាប់អាវុធរបស់ហាម៉ាស នៅហ្កាហ្សា ស្លាប់ កាលពីសប្តាហ៍មុន។ ប៉ុន្តែ ទាំងកងទ័ពអ៊ីស្រាអែល និងក្រុមហាម៉ាសមិនទាន់បញ្ជាក់ដំណឹងនេះ នៅឡើយទេ។ Marwan Issaជាថ្នាក់ដឹកនាំហាម៉ាស ទី២ ដែលស្លាប់ដោយសារស្នាដៃរបស់កងទ័ពអ៊ីស្រាអែល។ នៅខែមករា ដើមឆ្នាំនេះ អនុប្រធានការិយាល័យនយោបាយរបស់ហាម៉ាស ដែលជាឥស្សរជនសំខាន់លំដាប់ទី២របស់ចលនាហាម៉ាស ស្លាប់នៅក្នុងការវាយប្រហាររបស់ផ្លូវអាកាសរបស់អ៊ីស្រាអែល ទៅលើទីក្រុងបីរូត ប្រទេសលីបង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:១២
នៅក្នុងសង្រ្គាមសងសឹក នៅហ្កាហ្សា កងទ័ពអ៊ីស្រាអែលមានគោលដៅធំជាងគេ គឺតាមប្រមាញ់សម្លាប់មេក្រុមហាម៉ាស ដែលអ៊ីស្រាអែលចាត់ទុកជាមេខ្លោងគំនិត រៀបចំការវាយប្រហារភេរវកម្មសម្លាប់មនុស្សជាង ១ពាន់នាក់ នៅក្នុងទឹកដីអ៊ីស្រាអែល កាលពីថ្ងៃទី ៧តុលា។ តាំងពីបើកសមរភូមិហ្កាហ្សា នៅថ្ងៃ ទី ៧តុលា កងទ័ពអ៊ីស្រាអែលបានសម្លាប់អ្នកទទួលខុសត្រូវរបស់ក្រុមប្រដាប់អាវុធហាម៉ាសជាច្រើននាក់។ ប៉ុន្តែ តាមសេតវិមាន កងទ័ពអ៊ីស្រាអែលទើបបានសម្លាប់មេកើយធំទី៣របស់ហាម៉ាស ឈ្មោះ Marwan Issa នៅក្នុងការវាយប្រហារទៅលើបណ្តាញរូងក្រោមដី ខា្វត់ខ្វែង នៅជំរំជនភៀសខ្លួន Nuseirat ភាគកណ្តាលហ្កាហ្សា។
ទាំងចលនាហាម៉ាស និងកងទ័ពអ៊ីស្រាអែលមិនទាន់បញ្ជាក់ជាផ្លូវការ ដំណឹងដែលផ្តល់ដោយភាគីអាមេរិក។ ប៉ុន្តែ កងទ័ពអ៊ីស្រាអែលធ្លាប់បានប្រកាសថា ខ្លួនបានបើកការវាយប្រហារផ្លូវអាកាសទៅលើមូលដ្ឋានទ័ពក្រោមដី នៅភាគខាងកណ្តាលហ្កាហ្សា ដែលអ៊ីស្រាអែលជឿថា ជាកន្លែងលាក់ខ្លួនរបស់មេដឹកនាំជាន់ខ្ពស់របស់ហាម៉ាស ដែលនៅក្នុងនោះ ១នាក់ ជា Marwan Issa។
ជាមនុស្សសំខាន់ទី៣ នៅក្នុងចលនាដឹកនាំហាម៉ាស នៅហ្កាហ្សា Marwan Issaជាអនុប្រធានកងកម្លាំង Izzedine Al-Qassam ដែលជាសាខាប្រដាប់អាវុធ មានរចនាសម្ព័ន្ធដូចយោធារបស់ប្រទេសមួយ និងដែលដឹកនាំដោយមេកើយធំ គឺ Mohammed Dief។
ធ្លាប់ពន្ធនាគារអ៊ីស្រាអែល ៥ឆ្នាំ ដោយសារជាប់ពាក់ព័ន្ធនឹងក្រុមហាម៉ាស និងបន្ទាប់មកត្រូវអាជ្ញាធរប៉ាឡេស្ទីនចាប់ដាក់ពន្ធនាគារដែរ នៅឆ្នាំ ១៩៩៧ មុននឹងត្រូវដោះលែងនៅក្នុងអំឡុងសង្រ្គាមគប់ដុំថ្ម Intifada លើកទី២ នៅឆ្នាំ ២០០០ Marwan Issaបានឡើងឋានៈ តួនាទីជាបន្តបន្ទាប់ នៅក្នុងចលនាប្រដាប់អាវុធហាម៉ាសនៅហ្កាហ្សា។ ក្លាយជាផ្ទាំងស៊ីបវាយប្រហាររបស់អ៊ីស្រាអែល Marwan Issaត្រូវអ៊ីស្រាអែលចាត់ទុកជាមនុស្សស្រមោល ដោយសារតែសមត្ថភាព ចេះតែគេចខ្លួនផុតពីរ៉ាដា ក្រុមចារកិច្ចរបស់អ៊ីស្រាអែល។
នៅថ្ងៃចន្ទ ទីប្រឹក្សាសន្តិសុខអាមេរិក លោកJack Sullivan ដែលជាអ្នកបញ្ជាក់ថា Marwan Issaស្លាប់នៅក្នុងការវាយប្រហាររបស់អ៊ីស្រាអែល បានបន្ថែមថា មេដឹកនាំធំៗផ្សេងទៀតរបស់ហាម៉ាស កំពុងរត់គេច លាក់ខ្លួន នៅក្នុងរូងក្រោមដីដ៏សែនជ្រៅ នៅហ្កាហ្សា។ អស់ពីMarwan Issa ក្រុមហាម៉ាស នៅសល់ Yahya Sinwar ដែលជាមេដឹកនាំហាម៉ាសនៅហ្កាហ្សា ហើយនិងMohammed Diefដែលជាមេសាខាប្រដាប់អាវុធហាម៉ាស Izzedine Al-Qassam។ បើតាមលោក Jack Sullivan អាមេរិកនឹងបន្តជួយអ៊ីស្រាអែលដើម្បីតាមប្រមាញ់មេដឹកនាំហាម៉ាស ប៉ុន្តែ អាមេរិកនៅតែចង់ឲ្យអ៊ីស្រាអែលប្រើយុទ្ធសាស្រ្តផ្សេង ក្រៅពីប្រតិបត្តិការជើងគោក ទៅក្នុងទីក្រុងរ៉ាហ្វា ដើម្បីបំផ្លាញក្រុមហាម៉ាស។ សម្រាប់ ទីប្រឹក្សាសន្តិសុខជាតិអាមេរិក ការវាយប្រហារជើងគោករបស់អ៊ីស្រាអែល ចូលទីក្រុងរ៉ាហ្វា នៅក្នុងគោលដៅ គាស់រំលើងក្រុមហាម៉ាស គឺជាកំហុសឆ្គងមួយដ៏ធំ ព្រោះវានឹងសម្លាប់ប្រជាជនស្លូតត្រង់ ធ្វើឲ្យស្ថានភាពមនុស្សធម៌ដែលអាក្រក់ កាន់តែធ្លាក់ធ្ងន់ធ្ងរ បង្កអនាធិបតេយ្យនៅហ្កាហ្សា ហើយនិងធ្វើឲ្យអ៊ីស្រាអែលកាន់តែឯកោនៅ ឆាកអន្តរជាតិ។
លោកប្រធានាធិបតីចូ បៃដិនបាននិយាយប្រាប់អ្នកកាសែតថា នៅក្នុងការសន្ទនាតាមទូរស័ព្ទ ជាមួយនាយករដ្ឋមន្រ្តីអ៊ីស្រាអែល កាលពីថ្ងៃចន្ទ លោកបានទាមទារឲ្យអ៊ីស្រាអែលបញ្ជូនគណៈប្រតិភូមួយទៅវ៉ាស៊ីនតោនដើម្បីបង្ហាញផែនការយោធារបស់អ៊ីស្រាអែល សម្រាប់ត្រៀមវាយចូលហ្កាហ្សា។
សម្រាប់ទីប្រឹក្សាសន្តិសុខជាតិអាមេរិក វត្តមានរបស់គណៈប្រតិភូអ៊ីស្រាអែលនៅអាមេរិក អាចជាឱកាសពន្យារពេល ព្រោះថា អ៊ីស្រាអែលបានបញ្ជាក់ហើយថា នឹងមិនបើកប្រតិបត្តិការយោធា ចូលរ៉ាហ្វា នៅមុន ការបញ្ជាក់ផែនការប្រាប់អាមេរិកនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ