កម្ពុជានឹងជជែកពីបំណុល នៅពេលមានដំណើរទស្សនកិច្ចរបស់ប្រមុខការទូតទៅកាន់រុស្ស៊ី
ប្រមុខការទូត និងរដ្ឋមន្ត្រីក្រសួងហិរញ្ញវត្ថុកម្ពុជា នឹងត្រូវអញ្ជើញទៅប្រទេសរុស្ស៊ី ដើម្បីជជែកពីបញ្ហាបំណុលដែលកម្ពុជាបានជំពាក់អតីតសហភាពសូវៀត និងបញ្ហាជាច្រើនទៀត ដោយស្មារតីមិត្តភាព។ នៅក្នុងជំនួបរវាងលោកឧបនាយករដ្ឋមន្ត្រីកម្ពុជា ហោ ណាំហុង និងឯកអគ្គរដ្ឋទូតថ្មី នៃប្រទេសរុស្ស៊ី កាលពីព្រឹកថ្ងៃចន្ទនេះ ក្រៅពីបំណុល ភាគីទាំងពីរបានពិភាក្សាគ្នា លើបញ្ហាជាច្រើនទៀត រួមមានបញ្ហាសហប្រតិបត្តិការ និងបញ្ហាពាណិជ្ជកម្មផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នៅក្នុងជំនួបជាមួយឯកអគ្គរដ្ឋទូតថ្មីរបស់ប្រទេសរុស្ស៊ី លោក Dmitry Tsvetkov កាលពីព្រឹកថ្ងៃទី០៥ឧសភានេះ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសនៃប្រទេសកម្ពុជាបានរំលឹកថា ប្រទេសរុស្ស៊ីបានជួយដល់ប្រទេសកម្ពុជាយ៉ាងច្រើនបន្ទាប់ពីប្រទេសនេះងើបពីរបបប្រល័យពូជសាសន៍។
ពាក់ព័ន្ធនឹងជំនួយរបស់រុស្ស៊ីនាពេលនេះ ជំនួបពិភាក្សារវាងប្រមុខការទូតកម្ពុជា និងឯកអគ្គរដ្ឋទូតរុស្ស៊ី ក៏បានលើកមកពិភាក្សាគ្នាផងដែរពីបញ្ហាបំណុលដែលអតីតសហភាពសូវៀត បានជួយមកដល់ប្រទេសកម្ពុជាចាប់តាំងពីទសវត្សឆ្នាំ៨០មក។
លោក កុយ គួង អ្នកនាំពាក្យក្រសួងការបរទេសកម្ពុជាបានថ្លែងប្រាប់អ្នកកាសែតបន្ទាប់ពីជំនួបការទូតនេះថា បញ្ហាបំណុលគឺជាបញ្ហាសំខាន់មួយដែលប្រទេសកម្ពុជានិងរុស្ស៊ីនឹងលើកជជែកគ្នា នៅប្រទេសរុស្សីនាពេលខាងមុខ។
«បញ្ហាបំណុលដែលកម្ពុជាយើងជំពាក់អតីតសហភាពសូវៀតនោះ គឺភាគីទាំងពីរបានខិតខំដោះស្រាយដោយស្មារតីមិត្តភាព ដើម្បីជាប្រយោជន៍នៃប្រទេសទាំងពីរ។ ហើយក្នុងនោះគឺរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុក៏ត្រូវបានភាគីរុស្ស៊ីនឹងអញ្ជើញទៅបំពេញទស្សនកិច្ចនៅរុស្ស៊ីដែរ ដើម្បីពិភាក្សាក្នុងស្មារតីមិត្តភាព»។
មន្ត្រីរដ្ឋាភិបាលកម្ពុជាមិនបានបញ្ជាក់ពីតួលេខច្បាស់លាស់នៃបំណុលដែលកម្ពុជាត្រូវសងរុស្ស៊ីទេ ក៏ប៉ុន្តែយោងតាមឯកសារនានា បង្ហាញថាប្រទេសកម្ពុជាធ្លាប់ជំពាក់ប្រទេសរុស្ស៊ីប្រមាណជា១៥០លានដុល្លារ ចាប់តាំងពីទសវត្សទី៨០។ ក៏ប៉ុន្តែ រុស្ស៊ីបានលុបចោលអស់៧០ភាគរយហើយ ហើយនៅសល់ទាំងប៉ុន្មាន កម្ពុជាធ្លាប់ស្នើឲ្យសភាឌូម៉ាបង្វែរបណុលទាំងនេះទៅជាជំនួយអភិវឌ្ឍន៍វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ