ពលរដ្ឋខ្មែរកាន់តែច្រើនស្វែងរកការកសាងជីវិតថ្មីនៅបរទេស
ចំនួនពលរដ្ឋខ្មែររៀបអាពាហ៍ពិពាហ៍ជាមួយជនបរទេស បានកើនឡើងនៅដើមឆ្នាំ ២០១៤នេះ ក៏ប៉ុន្តែការរៀបអាពាហ៍ពិពាហ៍ជាមួយចិនតៃវ៉ាន់នៅមិនទាន់អនុញ្ញាតនោះទេ ប្រសិនបើមិនឆ្លងកាត់ស្ថានទូតចិននៅកម្ពុជា។ មន្ត្រីជាន់ខ្ពស់ក្រសួងមហាផ្ទៃបានថ្លែងថា រដ្ឋាភិបាលបាននិងកំពុងយកចិត្តទុកដាក់ចំពោះការឆ្លៀតឱកាសណាមួយដែលយកអាពាហ៍ពិពាហ៍ជាឈ្នាន់ដើម្បីជាមធ្យោបាយ ស្វែងរកការតាំងទីលំនៅក្នុងប្រទេសគេដោយខុសច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
មន្ត្រីជាន់ខ្ពស់ក្រសួងមហាផ្ទៃបានថ្លែងឲ្យដឹងថាតួលេខនៃការរៀបអាពាហ៍ពិពាហ៍រវាងស្ត្រីជនជាតិខ្មែរ និងជនបរទេសនៅដើមឆ្នាំ ២០១៤នេះមានការកើនឡើង ធៀបទៅនឹងឆ្នាំ ២០១៣។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃបានថ្លែងប្រាប់អ្នកកាសែតថា លោកស្រី
គ្រាន់តែធ្វើការប្រៀបធៀបរយៈពេល៣ខែដើមឆ្នាំ ២០១៤ ទៅរយៈពេលដូចគ្នានៃឆ្នាំ២០១៣ ឃើញថាមានការកើនឡើងប្រមាណជា១០០នាក់។
តាមការឲ្យដឹងពីមន្ត្រីក្រសួងមហាផ្ទៃ ការរៀបអាពាហ៍ពិពាហ៍ជាមួយជនបរទេសពេញមួយឆ្នាំ ២០១៣ មានចំនួនជាង១៧០០នាក់។ ក្នុងនោះមានច្រើនសញ្ជាតិ មានទាំងអឺរ៉ុប អាមេរិក
អូស្ត្រាលី និងអាស៊ី ហើយកូរ៉េមានអត្រារៀបការជាមួយពលរដ្ឋខ្មែរខ្ពស់ជាងគេ ខណៈដែលតួលេខបន្ទាប់គឺអាមេរិក ពោលគឺភាគច្រើនសំដៅទៅលើជនជាតិអាមេរិកកាំង ដើមកំណើតខ្មែរ។
លោកស្រីជូ ប៊ុនអេង បានបញ្ជាក់ថា ការរៀបអាពាហ៍ពិពាហ៍ជាមួយជនបរទេសមានទាំងបុរស និងស្ត្រី ក៏ប៉ុន្តែ ជនបរទេសជាបុរសច្រើនតែមករៀបអាពាហ៍ពិពាហ៍ជាមួយស្ត្រីខ្មែរ រីឯបុរសខ្មែររៀបការជាមួយស្ត្រីបរទេសវិញ គឺមានតិចតួចណាស់។
ទោះជាយ៉ាងនេះក្តីមានការកត់សម្គាល់ថា មានបញ្ហាប្រឈមមួយចំនួនបានកើតឡើងបន្ទាប់ពីអាពាហ៍ពិពាហ៍ឆ្លងទ្វីបនេះ ដោយសារមានគូរមួយចំនួនបានបែកគ្នាបន្ទាប់ពីរៀបអាពាហ៍ពិពាហ៍ហើយ ហើយក៏បានវិលត្រលប់មកស្រុកកំណើតវិញដែរ និងគូរខ្លះទៀតកំពុងតែស្ថិតនៅក្នុងសំណុំរឿងលែងលះ ព្រមទាំងស្នើសុំមករៀបអាពាហ៍ពិពាហ៍ជាថ្មីនៅប្រទេសកម្ពុជា។
ជាមួយគ្នានេះ ក្រសួងមហាផ្ទៃក៏បានបញ្ជាក់ផងដែរថា ករណីពលរដ្ឋខ្មែររៀបអាពាហ៍ពិពាហ៍ ជាមួយចិនតៃវ៉ាន់ អាជ្ញាធរកម្ពុជានៅមិនទាន់ទទួលការស្នើសុំនៅឡើយ ដោយណែនាំឲ្យមានការទទួលស្គាល់និងឆ្លងកាត់ពីស្ថានទូតចិននៅកម្ពុជា ជាកន្លែងដែលអាចមានទំនាក់ទំនងព័ត៌មានជាមួយអាជ្ញាធរកម្ពុជា នៅពេលដែលមានបញ្ហាកើតឡើង។
ជាទូទៅ ស្ត្រីកម្ពុជាតែងរងគ្រោះដោយសារការរៀបការជាមួយនឹងបុរសតៃវ៉ាន់។ ក្រៅពីរៀបអាពាហ៍ពិពាហ៍ជាប្រពន្ធប្តី ចេញពីប្រទេសកម្ពុជា ស្ត្រីមួយចំនួនត្រូវបានគេជួញដូរ។ បញ្ហានេះត្រូវអាជ្ញាធរកម្ពុជាអះអាងថា បានជួយអន្តរាគមន៍ដល់ពួកគេផងដែរ ដោយមានជំនួយពី
សហរដ្ឋអាមេរិក ក៏ប៉ុន្តែភាគច្រើននៃស្ត្រីទាំងនោះបដិសេធវិលមកប្រទេសកម្ពុជាវិញ និងសុំសិទ្ធិរស់នៅប្រទេសគេ។
ជាមួយគ្នានេះ រដ្ឋាភិបាលកម្ពុជាមិនមានគោលការណ៍ឲ្យយកអាពាហ៍ពិពាហ៍ជាឈ្នាន់ក្នុងការតាំងទីលំនៅក្នុងប្រទេសគេដោយខុសច្បាប់ ឬដើម្បីផលប្រយោជន៍ណាមួយដែលផ្ទុយពីអាពាហ៍ស្របតាមឆន្ទៈក៏ទេដែរ នេះបើតាមការបញ្ជាក់បន្ថែមពីលោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ