អ្នកដៅផែនទីហ្គូហ្គល៖ នរណាក៏អាចប្ដូរឈ្មោះទីលានប្រជាធិបតេយ្យបានដែរ
កាលពីម្សិលមិញ ទីលានប្រជាធិបតេយ្យ ក្បែរវត្តភ្នំ ក្នុងរាជធានីភ្នំពេញ ត្រូវបានផែនទីហ្គូហ្គល ប្ដូរឈ្មោះជា ទីលានវាយតប់ទៅវិញ។ ការផ្លាស់ប្ដូរនេះ បានធ្វើឲ្យអ្នកប្រើប្រាស់បណ្ដាញសង្គមភ្ញាក់ផ្អើល ហើយផ្សព្វផ្សាយព័ត៌មាននេះតៗគ្នា។ ឥឡូវ ផែនទីហ្គូហ្គលបង្ហាញឈ្មោះត្រឹមត្រូវរបស់ទីលានប្រជាធិបតេយ្យវិញហើយ។ ប៉ុន្តែនៅមានសំណួរមួយចំនួន ដែលត្រូវការចម្លើយ… តើការផ្លាស់ប្ដូរនេះ ធ្វើឡើងដោយនរណា? ហើយធ្វើឡើងក្នុងហេតុផលអ្វី?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
នរណាក៏អាចប្ដូរឈ្មោះទីលានប្រជាធិបតេយ្យ នៅលើផែនទីហ្គូហ្គលបានដែរ។ នេះជាការបញ្ជាក់របស់អ្នកស្ម័គ្រចិត្តដៅផែនទីហ្គូហ្គល Google នៅកម្ពុជា លោកចិត្រ សុវិជ្ជា។ ក្នុងកិច្ចសន្ទនាជាមួយវិទ្យុបារាំង តាមរយៈបណ្ដាញសង្គមនៅព្រឹកថ្ងៃអង្គារនេះ លោកសុវិជ្ជា គូសបញ្ជាក់ថា អ្នកដែលមានគណនីរបស់ហ្គូហ្គល ឬប្រើប្រាស់សារអេឡិចត្រូនិកជីមែល Gmail គឺសុទ្ធតែអាចដៅផែនទីហ្គូហ្គល ឬផ្លាស់ប្ដូរឈ្មោះទីតាំងណាមួយនៅលើផែនទីហ្គូហ្គលបាន។
បើតាមអ្នកដៅផែនទីហ្គូហ្គលនៅកម្ពុជារូបនេះ អ្នកប្រើប្រាស់ទូទៅ អាចចូលរួមដៅផែនទីអេឡិចត្រូនិកនេះបាន ដោយប្រើកម្មវិធីបង្កើតផែនទី ឬ Mapmaker។ ប៉ុន្តែ រាល់ការដៅផែនទី ឬកែតម្រូវព័ត៌មានណាមួយលើផែនទី ចាំបាច់ត្រូវមានការយល់ព្រមពី ហ្គូហ្គលសិន។ ក្នុងករណីដែលអ្នកប្រើប្រាស់ ធ្លាប់ដៅផែនទី ឬធ្លាប់កែតម្រូវលើផែនទីច្រើនដង ហើយគេជឿទុកចិត្ត នោះការផ្លាស់ប្ដូរអាចធ្វើឡើងដោយស្វ័យប្រវត្តិ មិនចាំបាច់មានការយល់ព្រមពីហ្គូហ្គលឡើយ។
ទីលានប្រជាធិបតេយ្យ ឬទីលានសេរីភាព នៅលើផែនទីហ្គូហ្គល ត្រូវបានគេផ្លាស់ប្ដូរឈ្មោះជា ទីលានវាយតប់ ឬ Fighting Park កាលពីថ្ងៃចន្ទ ទី៥ឧសភា។ ការផ្លាស់ប្ដូរនេះ រក្សាទុកបានតែប៉ុន្មានម៉ោងប៉ុណ្ណោះ មុននឹងហ្គូហ្គល ផ្លាស់ឈ្មោះមកជាទីលានប្រជាធិបតេយ្យ ឬទីលានសេរីភាពឡើងវិញ។
នៅចុងឆ្នាំ២០១០ ទីលានប្រជាធិបតេយ្យ នៅខាងលិចស្ពាននាគ រាជធានីភ្នំពេញ ត្រូវបាន សម្ពោធដាក់ឲ្យប្រើប្រាស់ជាសាធារណៈ ដើម្បីឲ្យប្រជាពលរដ្ឋអាចជួបជុំ និងបញ្ចេញមតិ។ ប៉ុន្តែនៅក្រោយការប៉ះទង្គិចកាលពីដើមខែមករា ឆ្នាំ២០១៤ ទីលានប្រជាធិបតេយ្យនេះ ត្រូវបានបិទ មិនអនុញ្ញាតឲ្យមានការជួបជុំសម្ដែងមតិឡើយ។
អាជ្ញាធរបានបញ្ជាក់ថា ទីលាននេះ នឹងនៅតែបិទមិនឲ្យមានការជួបជុំ ដរាបណាការស៊ើបអង្កេត ពាក់ព័ន្ធនឹងអំពើហិង្សាកាលពីដើមខែមករា នៅមិនទាន់ចប់សព្វគ្រប់។ ប៉ុន្តែសកម្មជនសិទ្ធិមនុស្ស សហជីព ក៏ដូចជាគណបក្សប្រឆាំង តែងតែបរិហារបម្រាមនេះ ដោយលើកឡើងថា វាជាការរំលោភសិទ្ធិសេរីភាពនៃការជួបជុំបញ្ចេញមតិ របស់ប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ