តុលាការកាត់ទោសលោក វន់ ពៅ និងបុរស ២៤ នាក់ផ្សេងទៀត ពាក់ព័ន្ធនឹងបាតុកម្មរោងចក្រកាត់ដេរ
តុលាការក្រុងភ្នំពេញនៅថ្ងៃសុក្រ ទី២៥មេសានេះ បានបើកសវនាការ ៣ ដាច់ដោយឡែកពីគ្នា ពាក់ព័ន្ធនឹងសំណុំរឿងបង្ក្រាបបាតុកម្មលើកម្មកររោងចក្រកាត់ដេរ។ ទី១ ជាសវនាការលើលោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធ សកម្មជនសិទ្ធិមនុស្ស និងកម្មករ សរុប ១០ នាក់ ដែលត្រូវបានចាប់ខ្លួន កាលពីបាតុកម្ម ថ្ងៃទី២មករា នៅរោងចក្រយ៉ាកជីង។ សវនាការទី២ ជាសំណុំរឿង ប្រឆាំងនឹងបាតុករ ១៣ នាក់ ដែលប៉េអឹមបង្ក្រាបបាតុកម្ម នៅផ្លូវវេងស្រេង កាលពីថ្ងៃទី៣មករា និងសវនាការបន្ទប់ទី៣ ជាសំណុំរឿងឃាត់ខ្លួនយុវជនពីរនាក់ ក្នុងពេលប៉ូលិសបង្ក្រាបបាតុកម្ម លើកម្មកររោងចក្រ SL នៅម្តុំវត្តស្ទឹងមានជ័យ។ បន្ទាប់ពីបើកសវនាការពេញមួយថ្ងៃនេះ ចៅក្រមបានសម្រេចលើកពេលទៅបន្តសវនាការ នៅថ្ងៃទី៦ ខែឧសភាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
សវនាការ ៣ ក្នុងថ្ងៃតែមួយ បានធ្វើឡើង នៅតុលាការក្រុងភ្នំពេញ នាថ្ងៃសុក្រនេះ។ បុរសជាប់ចោទពីបទប្រើអំពើហិង្សាលើកងកម្លាំងទាហាន ប៉ូលិស និងប៉េអឹម ព្រមទាំងបទបំផ្លិចបំផ្លាញទ្រព្យសម្បត្តិរោងចក្រកាត់ដេរ សរុបចំនួន ២៥ នាក់ ត្រូវបាននាំខ្លួន មកចូលរួមការកាត់ក្តី។
ប៉ុន្តែសវនាការ ពាក់ព័ន្ធនឹងការបង្ក្រាបបាតុកម្មរបស់កម្មកររោងចក្រកាត់ដេរ នាពេលនេះ មិនមែនជាការកាត់ក្តីលើជនដៃដល់ ដែលដកកាំភ្លើងបាញ់ បណ្តាលឲ្យមនុស្សស្លាប់យ៉ាងហោចណាស់ ៦ នាក់ និងរបួសជាង ៤០ នាក់នោះទេ។ ផ្ទុយទៅវិញ គឺជាសវនាការ កាត់ក្តីលើបុរសបាតុករ ដែលត្រូវទាហាន ប៉ូលិស និងប៉េអឹម វាយឲ្យរបួស ហើយចោទថា ជាអ្នកព្រួតគ្នាវាយទាហាន ប៉ូលិស និងប៉េអឹម ព្រមទាំងវាយ ដុតបំផ្លាញទ្រព្យសម្បត្តិរោងចក្រ កាត់ដេរ ក្នុងពេលធ្វើបាតុកម្ម។
ក្នុងនោះ មានទាំងសំណុំរឿងប៉ូលិសបង្ក្រាបបាតុកម្មកម្មកររោងចក្រកាត់ដេរ SL នៅមុខវត្តស្ទឹងមានជ័យ។ សំណុំរឿងរោងចក្រយ៉ាកជីង និងបាតុកម្មរបស់កម្មករ នៅផ្លូវវេងស្រេង កាលពីថ្ងៃទី២ និងថ្ងៃទី៣មករា ឆ្នាំ២០១។
នៅថ្ងៃទី១ នៃសវនាការ នាថ្ងៃសុក្រនេះ សំណុំរឿងបង្ក្រាបបាតុកម្ម នៅរោងចក្រ យ៉ាកជីង ដែលមានបាតុករ ១០ នាក់ រួមទាំងលោកវន់ពៅ គឺចៅក្រម ទើបតែសួរនាំយុវជន ជាជនជាប់ចោទ ៤ នាក់ និងសាក្សីម្នាក់ ជាមេទាហាន នៅកងពល ៩១។ រីឯសំណុំរឿង នៅផ្លូវវេងស្រេង ដែលមានបាតុករ ១៣ នាក់ គឺចៅក្រម បានតែសួរនាំពីប្រវត្តិរូបសង្ខេបរបស់យុវជនជាជនជាប់ចោទ សាក្សី និងដើមបណ្តឹង ជាប៉េអឹម ប៉ូលិស និងតំណាងក្រុមហ៊ុនឯកជនជាង ៤០ នាក់។
ដោយឡែកសំណុំរឿងបង្ក្រាបបាតុកម្មរបស់កម្មករនៅរោងចក្រ SL គឺចៅក្រម បានសួរនាំយុវជន ២ នាក់ ជាជនជាប់ចោទ សាក្សី និងដើមបណ្តឹង ចប់សព្វគ្រប់ហើយ នៅសល់តែការសន្និដ្ឋានប៉ុណ្ណោះ។
សវនាការទាំង ៣ បានបញ្ចប់ដំណាលគ្នា នៅត្រឹមម៉ោង ៣ និង ៣០ នាទី ហើយចៅក្រម សម្រេចលើកទៅធ្វើបន្ត នៅថ្ងៃទី៦ឧសភា។ មូលហេតុ មកពីប្រធានអនុរក្សពន្ធនាគារព្រៃស អះអាងពីសុវត្ថិភាពរបស់ជនជាប់ចោទ ហើយត្រូវដឹក ទៅកាន់ពន្ធនាគារ ឲ្យបានឆាប់រហ័ស។
សវនាការលើជនជាប់ចោទទាំង ២៥ នាក់ ដែលសកម្មជនសិទ្ធិមនុស្ស និងមហាជនភាគច្រើន អះអាងថា ជាជនរងគ្រោះ ត្រូវបានបញ្ចប់ទៅ ក្រោមសំរែក ទាមទារយុត្តិធម៌ពីសាច់ញត្តិក្រុមគ្រួសារ និងសកម្មជនដីធ្លី យ៉ាងកងរំពង នៅមុខតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ